25 އަހަރު މަޖިލީހުގައި، އަމިއްލަ އެއްވެސް ދަތުރެއްގައި އެއަރޕޯޓުގެ ވީއައިޕީ ބޭނުމެއް ނުކުރަން: ރައީސް އިބޫ

ރައްޔިތުންގެ މަޖިލީހުގައި 25 އަހަރު ދުވަހު މެންބަރެއްގެ ހައިސިއްޔަތުން މަސައްކަތް ކުރެއްވި ނަމަވެސް ވެލާނާ އިންޓަނޭޝަނަލް އެއަރޕޯޓުގެ ވީއައިޕީގެ ޚިދުމަތް އަމިއްލަ އެއްވެސް ދަތުރުފުޅެއްގައި ބޭނުން ނުކުރައްވާ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެ އެވެ.

ބުރާސްފަތި ދުވަހު ފަށާއިރު ޕްރޮގްރާމްގައި ވާހަކަފުޅު ދައްކަވަމުން ރައީސް އިބޫ ވިދާޅުވީ ރައްޔިތުން މަޖިލީހުގައި މެންބަރެއްގައި ހައިސިއްޔަތުން ހޭދަކުރެއްވި 25 އަހަރު އަމިއްލަ އެއްވެސް ދަތުރުފުޅެއްގައި ވީއައިޕީގެ ޚިދުމަތް ހޯއްދަވާފައި ނުވާނެ ކަމަށެވެ.

އެދުވަސްވަރު ދަރިން ސިލޯންގައި ތައުލީމް ހާސިލްކުރަމުންގެންދާކަން ފާހަގަކުރައްވައި ރައީސް އިބޫ ވިދާޅުވީ ވަރަށް ގިނައިން ރާއްޖެއިން ބޭރަށް ދަތުރު ކުރެއްވި ކަމަށެވެ. އޭރު ވެސް ރައްޔިތުން މަޖިލީހުގައި އެދުމުން އެހުރިހާ ކަމެއްގެ އިންތިޒާމް ހަމަޖައްސަވައިދެއްވާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ރައީސް އިބޫ ވިދާޅުވީ ދައުލަތުގެ ފައިސާ އަމިއްލަ ބޭނުންތަކުގައި ބޭނުންކޮށްގެންވާނެ ކަމަށް ގަބޫލުނުކުރައްވާ ކަމަށެވެ.

އަޅުގަނޑު ރައްޔިތުން މަޖިލީހުގެ މެންބަރު ކަމުގައި ތިވިދާޅުވިހެން 5 ދައުރު 25 އަހަރު ކޮށްފައި އެތަނުން އިސްތިއުފާ ދިނީ ރައީސުލްޖުމްހޫރިއްޔާ ކަމަށް އިންތިޚާބު ކުރީމަ. އެ ވޭތުވެދިޔަ 25 އަހަރު ދުވަހުގެ ތެރޭގައި އެންމެ ފަހަރަކު ވެސް އަމިއްލަ ދަތުރެއްގައި ވީއައިޕީއަށް އަޅުގަނޑު ވަދެފައި ނޯންނާނެ. އަޅުގަނޑުގެ އާއިލާ މީހަކަށް ވެސް ނޯންނާނެ އެތަން ބޭނުންކޮށްފައެއް. މަޖިލީހުގެ ރަސްމީ ދަތުރެއްގައި މަޖިލީހުން އިންތިޒާމްކޮށްގެން އެދާ ދަތުރެއްގައި ވަންނަން ޖެހުނު ފަހަރެއްގައި ނޫނިއްޔާ.އަޅުގަނޑު އަމިއްލަ އެއްވެސް ދަތުރެއްގައި އެއްވެސް ފަހަރަކު ނޯންނާނެ 25 އަހަރު ދުވަހުގެ ތެރޭގައި އެތަން ބޭނުންކޮށްފައި. ރައްޔިތުން މަޖިލީހުގައި އޭރުގައި އެދުނީމަ ފޮރިން މިނިސްޓްރީއަށް އަންގައިގެން އެކަން އިންތިޒާމް ކޮށްދޭނެ. އަޅުގަނޑަށް ދިމާވެފައި އެބަހުރި ބޭރުން އައިސް ފްލައިޓުން ފައިބާފައި އަޅުގަނޑު އާއްމު މީހުން ވަނަ ދޮރާ ދިމާލަށް ދާއިރުގައި ބައެއް މީހުން ހައިރާންވެފައި ތިބޭ. ތިހެންދޯއޭ ދަނީ.

ކުރީގެ ރައީސް އިބްރާހިމް މުހައްމަދު ސާލިހު

20 މަޖިލީހުގެ މެންބަރުން ވެލާނާ އިންޓަނޭޝަނަލް އެއަރޕޯޓުގެ ވީއައިޕީ ލޯންޖު ބޭނުން ކުރުމަށް ފުރަތަމަ 14 މަސްދުވަހުގެ ތެރޭގައި 1.4 މިލިއަން ރުފިޔާ ވަނީ ހަރަދުކޮށްފައެވެ.

މައުލޫމާތު ހޯދައި ލިބިގަތުމުގެ ހައްގުގެ ދަށުން އާންމު މީހަކު ހޯދަން ހުށަހެޅި ސުވާލަކަށް ރައްޔިތުންގެ މަޖިލީހުން ދިން ޖަވާބުގައި ބުނީ މިދިޔަ އަހަރުގެ މެއި 28 އިން މި އަހަރުގެ ޖުލައި 31، އާ ހަމައަށް މަޖިލިސް މެންބަރުންގެ ތެރެއިން 76 ބޭފުޅަކު އެއާޕޯޓުގެ ވީއައިޕީ ޚިދުމަތްތައް ބޭނުން ކޮށްފައިވާ ކަމަށާއި އެކަމަށް އެ އިދާރާއިން ޖުމުލަ 1.4 މިލިއަން ރުފިޔާ ހަރަދުކޮށްފައިވާ ކަމަށެވެ.

އެއިން އެންމެ ބޮޑު ހަރަދެއް ހިނގާފައި ވަނީ މަޖިލީހުގެ ނައިބު ރައީސް އަހުމަދު ނާޒިމަށެވެ. ނާޒިމް ވީއައިޕީ ބޭނުންކުރެއްވުމުގެ ޚަރަދެއްގެ ގޮތުން ޖުމްލަ 116،099.18 ރުފިޔާ އަރާފައިވެ އެވެ.

ދެވަނައަށް އެންމެ ގިނަ އަދަދަކަށް ވީއައިޕީ ބޭނުންކުރައްވާފައިވަނީ ފޭދޫ ދެކުނު ދާއިރާގެ މެންބަރު އިބްރާހިމް ދީދީ އެވެ. އޭނާ 97 ފަހަރު ވީއައިޕީ ޚިދުމަތް ބޭނުންކުރައްވައިގެން ޖުމްލަ 84،673.84 ރުފިޔާ އަރާފައިވެ އެވެ.

ތިންވަނައަށް އެންމެ ގިނައިން ވީއައިޕީ ބޭނުންކުރައްވާފައިވަނީ މީދޫ ދާއިރާ މެންބަރު އަދި މަޝްހޫރު ވިޔަފާރިވެރިޔާ އަޙްމަދު ސިޔާމް މުޙައްމަދެވެ. ސިޔާމް 78 ފަހަރު ވީއައިޕީ ޚިދުމަތް ބޭނުންކުރެއްވިއިރު ޖުމްލަ 68،088.24 ރުފިޔާ އަރާފައިވެ އެވެ.

މަޖިލީހުން ހަދާފައިވާ ގަވައިދެއްގެ ދަށުން، މެންބަރުން އެއަރޕޯޓުން ދަތުރުކުރައްވާ އިރު ވީއައިޕީ ލައުންޖު ބޭނުންކުރައްވައިގެން ހިނގާ ހަރަދު ދައްކަން ޖެހެނީ ދައުލަތުންނެވެ.