ޣައްޒާ ހަނގުރާމަ ނިންމުމުގެ ޕްލޭންއާ ގުޅޭ ގޮތުން ޤަތަރުގެ އަމީރު އާއި ޓްރަމްޕް މަޝްވަރާ ކުރައްވައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަށްޓަކައި އެކުލަވާލާފައިވާ ޕްލޭންއާ ގުޅޭ ގޮތުން، ޤަތަރުގެ އަމީރު ޝެއިޚް ތަމީން ބިން ހަމަދު އަލް ޘާނީ އާއި، އެމެރިކާގެ ރައީސް ޑޮނަލްޑް ޓްރަމްޕް މަޝްވަރާ ކުރައްވައިފި އެވެ.

ޤަތަރުގެ އަމީރު އާއި ޓްރަމްޕް މަޝްވަރާ ކުރައްވާފައި ވަނީ ބުދަ ދުވަހު ފޯނުން ގުޅުއްވައިގެންނެެވެ. އެކަމާ ގުޅިގެން އަމީރުގެ އޮފީހުން ނެރެފައިވާ ބަޔާނުގައި ބުނެފައި ވަނީ، ހަނގުރާމަ ނިންމުމަށް ހުށަހަޅާފައިވާ ޕްލޭންއާ ގުޅޭ މުހިންމު ކަންތައްތަކާ ގުޅޭ ގޮތުން ދެ ލީޑަރުން މަޝްވަރާ ކުރައްވާފައިވާ ކަމަށެވެ.

އެ މަޝްވަރާ ތަކުގައި ޤަތަރުގެ އަމީރު ވަނީ، ސަލާމަތީ މަސައްކައްތަކަށް ޤަތަރުގެ ފުރިހަމަ އެއްބާރުލުން ލިބިދޭނެ ކަމުގެ ޔަގީންކަން އެމެރިކާގެ ރައީސް ޓްރަމްޕް އަށް ދެއްވައިފަ އެވެ. އަދި އެ ޕްލޭނަށް ތާއީދު ކުރާ ޤައުމު ތަކަށް، ސަރަހައްދީ ސަލާމަތާއި ރައްކާތެރިކަން ކަށަވަރު ކޮށްދޭނެ ކަމަށް ވެސް ވިދާޅުވެފައިވެ އެވެ.

އަދި ހަމަ އެހެންމެ، ފަލަސްޠީނުގެ މިނިވަންކަމާއި، ފަަލަސްޠީނުގެ ހައްގުތައް ރައްކާތެރި ކުރެވެ އަދުލުވެރި ހައްލަކާ ދިމާލަށް ވާސިލު ވެވޭވެ ކަމުގެ ޔަޤީންކަން އޮތް ކަަމަށް ވެސް ޤަތަރުގެ އަމީރު ވަނީ ވިދާޅުވެފަ އެވެ.

ޤަތަރުގެ އަމީރު އާއި ޓްރަމްޕް މަޝްވަރާ ކުރައްވާފައިވާއިރު، މި މަޝްވަރާ އަކީ ހަނގުރާމަ ހުއްޓުވުމަށް ޤަތަރުން ކުރަމުންދާ ދިގު މަސައްކަތުގެ ތެރެއިން ކުރެވުނު ވަރަށް މުހިންމު މަޝްވަރާއެއް ކަމަށް ވަނީ ފާހަގަ ކޮށްފަ އެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަސް ގެނައުމަށް ކުރަމުން އަންނަ މަސައްކަތުގައި ޤަތަރަކީ މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. އަދި ޤަތަރަކީ ސަރަހަައްދުގައި ސުލްޙަ ޤާއިމު ކުރުމަށް އިސްނަގައިގެން މަސައްކަތް ކުރަމުން އަންނަ ޤައުމެކެވެ.

މީގެ އިތުރުން އެމެރިކާ އާއި ޤަަތަރަކީ ވަރަށް ގާތް ގުޅުމެއް އޮންނަ ދެ ޤައުމު ކަމަށްވާއިރު، އެމެރިކާގެ އެންމެ ބޮޑު އަސްކަރީ އެއް ބޭސް ވެސް ހުންނަނީ ޤަތަރުގަ އެވެ. ދާދި ފަހުން ޤަތަރަށް އަމާޒުކޮށް އިސްރާއީލް އިން ދިން ހަމަލާއާ ގުޅިގެން ވެސް، އެމެރިކާ އިން ވަނީ އިސްރާއީލް އަށް ނުރުހުން އަމާޒުކޮށް، ޤަތަރުގެ ދިފާއުގައި ވާހަކަ ދައްކައިފަ އެވެ.