ކަންކަން އިސްލާޙު ކުރަން ފެނަކަ އަށް އެންގިން، އެކަން ރަނގަޅު ވެސް ކުރި: ރައީސް ޞާލިޙު
ފެނަކަ އާއި ބައެއް އެހެން ކުންފުނިތަކާ ގުޅޭ ގޮތުން މައްސަލަތައް ހުށަހަޅައިގެން އޭރު ވެސް އޭސީސީ އިން ބަލަމުން ގެންދިޔަ
ކުރީގެ ރައީސް އިބްރާހީމް މުޙައްމަދު ޞާލިޙު އަދި ފެނަކައިގެ ކުރީގެ މެނޭޖިން ޑިރެކްޓަރު އަޙުމަދު ސައީދު މުޙައްމަދު
ފެނަކަ ކޯޕަރޭޝަންއާ ދެކޮޅަށް އޭރު ކުރެވުނު ތުހުމަތުތަކާއި، ފާހަގަ ކޮށްފައިވާ މައްސަލަތައް ޙައްލު ކުރުމަށް އެ ކުންފުންޏަށް އޭރު އަންގާފައި ވާނެ ކަމަށާއި، އަދި އެ ކުންފުނިން އެކަން ރަނގަޅު ވެސް ކޮށްފައި އޮތް ކަމަށް ކުރީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ރައީސް ޞާލިޙު ވިދާޅުވެފައި ވަނީ، ފެނަކަ އާއި ބައެއް އެހެން ކުންފުނިތަކާ ގުޅޭ ގޮތުން މައްސަލަތައް ހުށަހަޅައިގެން އޭރު ވެސް އޭސީސީ އިން ބަލަމުން ގެންދިޔަ ކަމަށެވެ. އަދި ފެނަކައާ ބެހޭ ގޮތުން ހުށަހެޅުނު މައްސަލަ ތަކުގެ ތެރެއިން ވަރަށް ގިނަ މައްސަލަތައް ބަލަން ނުޖެހޭ ކަމަށް، ނުވަތަ ކުރިއަށް ގެންދަން ނުޖެހޭ މައްސަލަ ތަކެއް ކަަމަށް ނިންމައި ފައިލް ވެސް ކޮށްފައިވާ ކަަމަށް އެމަނިކުފާނު ވިދާޅުވި އެވެ.
މީގެ އިތުރުން ރައީސް ޞާލިޙު ވިދާޅުވީ 2021 ވަނަ އަހަރު ފެށުނުތަނާ، ފެނަކައާ ގުޅޭ ގޮތުން އޭސީސީ އިން ތައްޔާރު ކޮށްފައި އޮތް ރިޕޯޓެއް ލިބިވަޑައިގެންނެވި ކަމަށެވެ. އެ ލިޔުންތައް ނައްތާ ނުލާ ކަމަށް ވަނީ ނަމަ، މިހާރު ވެސް ރައީސް އޮފީހުގައި އެ ލިޔުންތައް ހުންނާނެކަން ފާހަގަ ކުރައްވައި ރައީސް ޞާލިޙު ވިދާޅުވީ، އިސްލާޙު ކުރަން ޖެހޭ ކަންކަން އެމަނިކުފާނު އަމިއްލަފުޅަށް އޭގައި ފާހަގަ ކޮށްފައި ވާނެ ކަމަށެވެ. އޭގެ ފަހުން ރައީސް އޮފީހުގެ ޕޮލިސީ އޮފީހުން ފިނޭންސް މިނިސްޓްރީ އަށް އެ ރިޕޯޓު ފޮނުވި ކަމަށް ވެސް ރައީސް ޞާލިޙު ވިދާޅުވި އެވެ.
އެގޮތުން އޭސީސީ އިން އަންގާފައި އޮތީ އޭރު ފެނަކައިގައި ކަންކަން ހިނގަމުން އަންނަ ގޮތުން ކޮރަޕްޝަނަށް މަގު ފަހިވާ ކަމަށާއި، އެކަން އެކަން އިސްލާޙު ކުރުމަށް އަންގާފައިވާ ކަމަށެވެ. އެއާއެކު، ވަކި މުއްދަތެއްގެ ތެރޭގައި އެކަންކަން އިސްލާހު ކުރުމަށް ފިނޭންސް މިނިސްޓްރީ އިން، ޕީސީބީ މެދުވެރިކޮށް ފެނަކަ އަށް އެންގި ކަމަށް ރައީސް ޞާލިޙު ވިދާޅުވި އެވެ. އަދި އެ ވާހަަކަތައް އޭރު ވެސް ނޫސް ތަކުގައި ލިޔެފައި ހުރި ކަމަށް ފާހަގަ ކުރެއްވި އެވެ.
އެކަން ފާހަގަ ކުރައްވައި ރައީސް ޞާލިޙު ވިދާޅުވީ އިސްލާހު ކުރުމަށް އެންގި ކަންކަން އޭރު ފެނަކައިން ރަނގަޅު ކޮށްފައިވާ ކަމަށާއި، އެއަށްފަހު އެކަން ހާމަ ކުރައްވާފައި އޮތް ކަމަށެވެ.
އަޅުގަނޑަށް ލިބުނު ފެނަކައާ ގުޅޭ ގޮތުން އޭސީސީ އިން ތައްޔާރު ކޮށްފައި އޮތް ރިޕޯޓެއް. އަޅުގަނޑު ހަނދާންވާ ގޮތުން އެއީ 2021 ފެށުނުހާތާ. އެއާ ގުޅިގެން ރައީސް އޮފީހުގައި އެ ރިޕޯޓު ދިރާސާ ކޮށްފައި އަޅުގަނޑާ ހިސާބަށް ގެނަސްދިން. މިހާރު ވެސް ރައީސް އޮފީހުގައި ހުންނާނެ އެ ލިޔުންތައް ނައްތާނުލާ ކަމަށް ވަންޏާ. އަޅުގަނޑު ހުންނާނެ އޭގައި އަޅުގަނޑުގެ އަތުން ވެސް ލިޔެފައި، މިވެނި ކަމެއް މިހެން އިސްލާހު ކުރުމަށް އަންގާށޭ. އެއާ އެކީގައި އަޅުގަނޑުމެންގެ ޕޮލިސީ އޮފީހުން ފިނޭންސް މިނިސްޓްރީ އަށް އެ ރިޕޯޓު ފޮނުވި، އޭގަ ހުރި ކަންތައްތައް އިސްލާހު ކުރުމަށް. އަޅުގަނޑު މި ދެންނެވިހެން އޭސީސީ އިން އަންގާފައި ހުރީ ފެނަކައިގައި މިހާރު ކަންތައްތައް ހިނގާ ގޮތުން ކޮރަޕްޝަނަށް މަގު ފަހިވާ ގޮތަށް ކަންތައް ހުރި ކަމަށާއި، އިސްލާހު ކުރަން ޖެހޭ ކިތަންމެ ކަމެއް ހުރި ކަމަށް. އެއަށް ބޭސްކޮށް އަޅުގަނޑުމެން ފިނޭންސް މިނިސްޓްރީ އަށް އެންގީ ވަކި މުއްދަތެއްގެ ތެރޭގައި މި ކަންތައްތައް އިސްލާޙު ކުރުމަށް އަންގާފައި އަދި ކުރޭތޯ ބަލަމުން ގެންދާށޭ. ފިނޭންސް މިނިސްޓްރީ އިން ޕީސީބީ އަށް އެކަން އަންގައި، އަދި އެ ތަނުން ފެނަކަ އަށް އެންގިކަން އަޅުގަނޑަށް އެނގޭ. އަންގައިގެން އެކަންކަން ހުންނާނެ ނޫސްތަކުގަ ވެސް ލިޔެފައި. އަޅުގަނޑުމެންނަށް ބައެއް ނޫސްވެރިން ސުވާލު ކުރި، އޭރު އޮންނާނެ ސުވާލު ކުރުމުގެ ފުރުސަތު. ފެނަކައިން އެ ކަންތައްތައް އިސްލާހު ކުރި ވާހަކަ ވެސް އެ ބޭފުޅުން އެބަ އޮތް ބުނެފައި.ކުރީގެ ރައީސް އިބްރާހީމް މުޙައްމަދު ޞާލިޙު
މީގެ އިތުރުން ރައީސް ޞާލިޙު ވިދާޅުވީ އެމަނިކުފާނު ސަރުކާރުގެ އޮފީސްތަކާއި، ކުންފުނިތަކާއި، ވެރިންނާ ގުޅިގެން ރައްޔިތުންނަށް ފެންނަ ކަންކަން ހިއްސާ ކުރުމަށް ވިސްލް ބްލޯ ކުރުމުގެ ފުރުސަތު އޭރު އޮންނާނެ ކަމަށެވެ. އަދި އެކަމާ ގުޅިގެން ހުށަހެޅި ހުރިހާ މައްސަލައެއް އޭސީސީ އަށް ފޮނުވާފައި ވާނެ ކަމަށް ރައީސް ޞާލިޙު ވިދާޅުވި އެވެ.
އެކަމާ ގުޅިގެން، އޭގެ ތެރެއިން އެއްވެސް މައްސަލައެއްގައި ފިޔަވަޅެއް އެޅުމަށް އެމަނިކުފާނާ ހަމައަށް އައިސްފައި އޮތް ނަމަ، ފިޔަވަޅު އަޅުއްވާފައި އޮންނާނެ ކަމަށް ރައީސް ޞާލިޙު ވިދާޅުވި އެވެ.
