ގާނޫނު އަސާސީގައިވާ ހައްގުތަކާއި މިނިވަންކަން ހިމާޔަތްކޮށް ކުރިއެރުވުމުގެ މަސައްކަތް ބަންޑާރަނައިބު ވެސް ކުރަންޖެހޭ: މުއިއްޒު
ފެހި ގާނޫނު އަސާސީގެ ކުރިން އަމަލުކުރި ގާނޫނުގައި ލިޔެފައި ހުންނަ ވާހަކަތަކަކީ މާބޮޑު މާނައެއްހުރި ވާހަކަތަކެއް ނޫން
މޯލްޑިވްސް ލޯ އިންސްޓިޓިއުޓްގެ ރައީސް އަދި ކުރީގެ ޕްރޮސެކިއުޓާ ޖެނެރަލް އަހުމަދު މުއިއްޒު ވާހަކަދައްކަވަނީ
ގާނޫނު އަސާސީއަށް އަމަލުކުރުމަކީ ދައުލަތަށް ވާޖިބެއް ކަމަށާއި، 18 ވަނަ މާއްދާގައި ބަޔާންކޮށްފައިވާ ހައްގުތަކާއި މިނިވަންކަން ހިމާޔަތްކޮށް ކުރިއެރުވުމުގެ މަސައްކަތް ބަންޑާރަނައިބު ވެސް ކުރަންޖެހޭ ކަމަށް މޯލްޑިވްސް ލޯ އިންސްޓިޓިއުޓްގެ ރައީސް އަދި ކުރީގެ ޕްރޮސެކިއުޓާ ޖެނެރަލް އަހުމަދު މުއިއްޒު ވިދާޅުވެއްޖެއެވެ.
"ރައްޔިތުންގެ އަސާސީ ހައްގުތަކާއި މިނިވަންކަން" ގެ ފޮތާއި "މުދަލު ޒަކާތް ހިސާބުކުރުން" ގެ ނަމުގައި ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ލިޔުއްވި ފޮތް ނެރުމަށް ބޭއްވި ޚާއްސަ ރަސްމިއްޔާތުގައި މުއިއްޒު ވިދާޅުވީ 2008 ވަނަ އަހަރު ތައާރަފް ކުރެވުނު ގާނޫނު އަސާސީގެ ކުރިން އަމަލުކުރި ގާނޫނު އަސާސީގައި ލިޔެފައި ހުންނަ ވާހަކަތަކަކީ މާބޮޑު މާނައެއްހުރި ވާހަކަތަކެއް ނޫން ކަމަށެވެ.
މުއިއްޒު ވިދާޅުވީ ފެހި ގާނޫނު އަސާސީ އައުމުގެކުރިން އަދުލުއިންސާފު ގާއިމްކުރުމުގެ ދާއިރާއަށް ބެލިކަމުގައި ވިޔަސް، ހައްގުތައް ފޯރުކޮށްދިނުމަށް އެ ދާއިރާގެ ބޭފުޅުން ފަސްޖެހިވަޑައިގަންނަވާ ކަމަށެވެ. ނަމަވެސް މިހާރުގެ ގާނޫނު އަސާސީއާއެކު ބާރުތަކެއް ރައްޔިތުންނަށް ލިބިފައިވާ ކަމަށާއި، އަދުލު އިންސާފު ގާއިމް ކުރުމުގެ ދާއިރާ ބާރުވެރި ކުރުވާފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މިހާރު ގާނޫނު އޮތް ގޮތުން ފަނޑިޔާރަކު ވަކިކުރުމަކީ ވެސް އެހައި ފަސޭހަ ކަމެއް ނޫން ކަމަށެވެ.
މީގެ އިތުރުން މުއިއްޒު ވިދާޅުވީ ގާނޫނު އަސާސީގައި 65 ވަނަ މާއްދާގައިވާ ގޮތުން، އަސާސީ ހައްގަކަށް އަރާގަނެފިނަމަ، އެކަމުގައި ފަރުވާ ހޯދަން ކޯޓަށް ދެވިދާނެ ކަމަށާއި، ކޯޓުގެ ދޮރުގައި ޓަކި ޖެހިދާނެކަން ބަޔާންކޮށްފައިވާ ކަމަށެވެ. އަދި މި ގާނޫނު އަސާސީގައި، އަސާސީ ހައްގުތަކާ ބެހޭ ބާބުގައިވާ ގޮތުން މަޖިލީހަކުން ފާސްކުރާ ގާނޫނަކުން ހަމަ އަސާސީ ހައްގެއް ހަނިކޮށްނުލުވޭނެ ކަމަށް މުއިއްޒު ވިދާޅުވިއެވެ.
ގާނޫނު އަސާސީގެ 18 ވަނަ މާއްދާއަށް އިޝާރާތް ކުރައްވައި މުއިއްޒު ވިދާޅުވީ ހައްގުތައް ވަރަށް ބޮޑަށް ލިބިދިނުމަށް ބާރު އަޅާފައިވާ ކަމަށާއި، އެބާބުގައި ބަޔާންކޮށްފައިވާ ހައްގުތަކާއި މިނިވަންކަން ހިމާޔަތްކޮށް ކުރިއެރުވުމަކީ ދައުލަތަށް ލާޒިމް ކަމެއް ކަމަށެވެ. އަދި އެހައްގުތައް ބަޔަކު ނިގުޅަތުމަށް މަސައްކަތް ކުރި ނަމަވެސް އެފުރުސަތު ނުލިބޭ ކަމަށާއި، އެހައްގުތައް ހިމާޔަތް ކުރުމަށް ބަންޑާރަނައިބު ވެސް މަސައްކަތް ކުރަންޖެހޭ ކަމަށެވެ.
ވަކި މިންގަނޑުތަކަކަށް އެބަ ފެތެންޖެހޭ. އެގޮތުން އެބަ ބުނޭ ދިވެހިރާއްޖޭ ބައިވެރިވެފައިވާ ބައިނަލްއަގުވާމީ މުއާހަދާތަކަށް ރިޔާއަތްކުރަންޖެހޭނޭ އަދި އޯޕަން ޑިމޮކްރެޓިކްސް ސޮސައިޓީތަކުން އެ ގަބޫލުކުރާ މިންގަނޑުތަކަށް ވެސް ރިޔާއަތް ކުރަންޖެހޭނޭ. އަދި 16 ވަނަ މާއްދާގައި އެބަހުރި ގާނޫނު ހަދާއިރު ރިޔާއަތް ކުރަންޖެހޭ ކަންތައްތަކެއް ވެސް ބަޔާންކޮށްފައި. އެހެންވީމަ ހައްގުތައް ވަރަށް ބޮޑަށް ލިބިދިނުމަށް ބާރު އަޅާފައި އޮތީ ގާނޫނު އަސާސީގެ 18 ވަނަ މާއްދާގައި އެބަބުނޭ ދައުލަތުގެ ވާޖިބެއް ކަމަށް ގާނޫނު އަސާސީއަށް އަމަލުކުރުމާއި އެބާބުގައި ބަޔާންކޮށްފައިވާ ހައްގުތަކާއި މިނިވަންކަން ހިމާޔަތްކޮށް ކުރިއެރުވުމަކީ. އެހެންވީމަ ބަޔަކު އެހައްގުތައް ލިބިނުދޭން މަސައްކަތް ކުރިއަސް ދައުލަތަށް އެބަ ލާޒިމްކުރޭ ބަންޑާރަނައިބު އޮފީހަށްށޭ ވެސް ދެންނެވި ދާނެ ތެދެއްތޯ. އެހައްގުތައް ހިމާޔަތް ކުރުމަށް ތެދެއްތޯ. އެއާ ދެކޮޅަށް ބަޔަކު މަސައްކަތް ކުރަންޏާ އެހައްގުތައް ހިމާޔަތް ކުރުމުގެ ދައުރެއް ބަންޑާރަނައިބަށް ވެސް އެބައޮވޭ އަދި ކުރިއެރުވުމަށް ވެސް މަސައްކަތް ކުރަންޖެހޭ. އެއްކަމަކީ ދިފާއު ކުރުން. އަނެއްކަމަކީ ކުރިއެރުވުން.މޯލްޑިވްސް ލޯ އިންސްޓިޓިއުޓްގެ ރައީސް އަދި ކުރީގެ ޕްރޮސެކިއުޓާ ޖެނެރަލް އަހުމަދު މުއިއްޒު
މުއިއްޒު ވިދާޅުވީ ގާނޫނު އަސާސީގައި ލިބިދީފައިވާ ހައްގުތަކާއި، މިނިވަންކަން އަދި ހިފެހެއްޓޭ މިންވަރާއި، އަމަލުކުރަންޖެހޭ ގޮތް ވަރަށް ސަރީހަކޮށް ލިޔެ ބަޔާންކޮށްފައިވާ ކަަމަށެވެ. އަދި މިނިވަން ދިމިކްރާތީ މުޖުތަމައުއެއްގައި އެހެން ބަޔަކު ބޭނުންވުމުން ހައްގުތައް ނުހިފެހެއްޓޭނެ ކަމަށް އޭނާ ވިދާޅުވިއެވެ.
