ރައްޔިތުން ފިޔަވަޅު ނާޅާ ކަންނެތް ކަމުގައި ތިބެއްޖެނަމަ ގާނޫނުގައި ހުރި ހައްގުތަކަކީ ލިޔެފައި ހުރި އަކުރުތަކަކަށްވާނެ: ސުއޫދު
ގާނޫނު އަސާސީ ހަރަކާތްތެރި ކުރުވޭނީ ރައްޔިތުން ހަރަކާތްތެރިވި ވަރަކަށް
"ރައްޔިތުންގެ އަސާސީ ހައްގުތަކާއި މިނިވަންކަން" ގެ ފޮތާއި "މުދަލު ޒަކާތް ހިސާބުކުރުން" ގެ ނަމުގައި ހުސްނުއްސުއޫދު ލިޔުއްވި ފޮތް ނެރުމަށް ބޭއްވި ޚާއްސަ ރަސްމިއްޔާތުގައި ވާހަކަދައްކަވަނީ
ރައްޔިތުން ފިޔަވަޅު ނާޅާ ކަންނެތް ކަމުގައި ތިބެއްޖެނަމަ ގާނޫނު އަސާސީގައި ހުރި ހައްގުތަކަކީ ކަރުދާހުގައި ލިޔެފައި ހުރި އަކުރުތަކަކަށްވާނެ ކަމަށް ސުޕްރީމް ކޯޓުގެ ކުރީގެ ފަނޑިޔާރު ހުސްނުއް ސުއޫދު ވިދާޅުވެއްޖެއެވެ.
"ރައްޔިތުންގެ އަސާސީ ހައްގުތަކާއި މިނިވަންކަން" ގެ ފޮތާއި "މުދަލު ޒަކާތް ހިސާބުކުރުން" ގެ ނަމުގައި ސުއޫދު ލިޔުއްވި ފޮތް ނެރުމަށް ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުން ސުއޫދު ވިދާޅުވީ ގާނޫނު އަސާސީއަކީ އޭގެޒާތުގައި އަމިއްލައަށް ބަސްބުނެ ވާހަކަ ދައްކާ ހަރަކާތްތެރިވާ އެއްޗެއް ނޫން ކަމަށާއި، ގާނޫނު އަސާސީ ހިމާޔަތް ކުރުމުގެ މަސްއޫލިއްޔަތު އޮތީ ކޮންމެ ރައްޔިތެއްގެ އަތްމަތީގައި ކަމަށެވެ.
ގާނޫނު އަސާސީ ހަރަކާތްތެރި ކުރުވޭނީ ރައްޔިތުން ހަރަކާތްތެރިވި ވަރަކަށްކަން ފާހަގަކުރައްވައި ސުއޫދު ވިދާޅުވީ ގާނޫނު އަސާސީއަށް ދިރުން ގެނެވޭނީ ރައްޔިތުންގެ މަސައްކަތުން ކަމަށާއި، ރައްޔިތުން ފިޔަވަޅު ނާޅާ، ކަންނެތްކަންމަތީގައި ތިބެއްޖެކަމަށްވާނަމަ ގާނޫނު އަސާސީގައި ހުރި ހައްގުތަކަކީ ހަމަ ކަރުދާހުގައި ލިޔެފައި ހުރި އަކުރުތަކެއް ކަމަށެވެ.
އެ އަކުރުތަކަށް ދިރުން ގެނެސްދެވޭނީ ރައްޔިތުން ކުރި މަސައްކަތުން. ރައްޔިތުން ހަށި ބުރަވެ ކަންނެއްވެއްޖެ ކަމަށްވެއްޖެއްޔާ އެ އަސާސީ ހައްގުތަކެއް ގާނޫނު އަސާސީގައި ލިޔެފައި ހުއްޓަސް އެ އެއްޗިއްސަކީ ދިރިގެން ކޮޅަށް ތެދުވެގެން ހިނގާފައި ގޮސް ކަންކަން ކޮށްދީ ހައްލުތަކެއް ގެނެސްދޭނެ ކަމެއް ނޫން.ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު
މީގެ އިތުރުން ސުއޫދު ވަނީ ސިޔާދަތީ ބާރަށް އަލިއަޅުއްވާލައްވައި ވާހަކަ ދައްކަވާފައެވެ.
ސުއޫދު ވިދާޅުވީ، ދައުލަތް ދައުލަތެއްގެ ގޮތުގައި ދެމި އޮންނަނީ މިި ސިޔާދަތީ ބާރުގެ ސަބަބުން ކަމަށާއި، އެކަތިގަނޑެއްގެ ގޮތުގައި ދައުލަތް ހިފަހައްޓަނީ މި ސިޔާދަތީ ބާރުން ކަމަށެވެ. ނަމަވެސް މި ސިޔާދަތީ ބާރަކީ ވަރަށް ނުރައްކާތެރި ބިރުވެރި އެއްޗަކަށް ބައެއް ފަހަރުވާ ކަމަށާއި، އެބާރު އޮޅުކުރަން ޖެހޭ ކަމަށެވެ.
ސުއޫދު ވިދާޅުވީ ސިޔާދަތީ ބާރު ހިފެހެއްޓުމަށް މަސައްކަތް ކުރަންޖެހޭ ކަމަށާއި، އެބާރު ހިފެހެއްޓޭ އެއްގޮތަކީ ގާނޫނު އަސާސީ ލިޔުން ކަމަށެވެ. ގާނޫނު އަސާސީއެއް ލިޔެގެން ދައުލަތުގެ ސިޔާދަތީ ބާރު އޮބެހެއްޓުމަށް ވަރަށް ގިނަ މަސައްކަތް ކުރެވިދާނެ ކަމަށް އޭނާ ވިދާޅުވިއެވެ.
އެގޮތުން ގާނޫނު އަސާސީ ލިޔުމުގެ ތެރެއިން މި ސިޔާދަތީ ބާރު ތިން ބަޔަކަށް ބަހާލިކަން ސުއޫދު ފާހަގަކުރެއްވިއެވެ. އަދި ވިދާޅުވީ އެބާރު ނުހިފެހެއްޓިއްޖެނަމަ އެބާރު ވަރަށް ފަސޭހައިން ގޮސް މީހެއްގެ އަތް މައްޗަށް ޖަމާވެ އެބާރު ވަރަށް ވިޔާނުދާ އެއްޗަކަށްވާ ކަމަށެވެ.
ދައުލަތަކީ ދުނިޔޭގެ ބިމުން އިން ކަނޑައެޅިފައިވާ ސަރަހައްދެއްގެ ތެރޭގައި ވަކި ޖަމާއަތެއްގެ ތެރޭގައި ވަކި ބާރުތަކެއް ލިބިގެން އުޅެމުންދާ ފަރުދުން އެކުވުމުން އުފެދޭ ގާނޫނީ ނިޒާމަކަށް ކިޔާނަމެއް. މިގޮތުން އުފެދޭ ދައުލަތް ނިސްބަތްވަނީ އެއް ރައްޔިތަކާ އެއް ސަރަހައްދަކާ އެއްބާރެއް. އެހެންވީމަ މިއިން ކޮންމެ ދައުލަތެއްގައި ވެސް އެ ދައުލަތެއް ނިސްބަތްވާނީ އެއް ރައްޔިތަކާ އެއްސަރަހައްދަކަށް އެއްބާރެއް. އެއަށް ޖުމްލަކޮށް މިކިޔަނީ ދައުލަތުގެ ސިޔާދަތީ ބާރު. އަދި މިގޮތުން އުފެދިފައި އޮންނަ ދައުލަތް ދައުލަތެއްގެ ގޮތުގައި ދެމި އޮންނަނީ މިިސިޔާދަތީ ބާރުގެ ސަބަބުން. އެކަތިގަނޑެއްގެ ގޮތުގައި ދައުލަތް މި ހިފަހައްޓަނީ މި ސިޔާދަތީ ބާރު. އެހެންނަމަވެސް މި ސިޔާދަތީ ބާރަކީ ވަރަށް ނުރައްކާތެރި ބިރުހުރި އެއްޗަކަށް ބައެއްފަހަރު ވެދޭ. އެހެންވީމަ އެބާރު އޮޅުކުރަން އެބަޖެހޭ. އެބާރު ބައެއް ފަހަރަށް ކަސްތަޅުއަޅުވަންޖެހޭ ބައެއް ފަހަރު ބާރު ހިފަހައްޓަން ޖެހޭ، ބާރު ބަންނަން ވެސް އެބަޖެހޭ. ބަދެގެން ނޫނިއްޔާ އެބާރު ހިފެހެއްޓޭނެ ގޮތެއް ނޯވޭ. އެބާރު ނުހިފެހެއްޓިއްޖެއްޔާ އެބާރު ނިކަން ފަސޭހައިން ގޮސް މީހެއްގެ އަތް މައްޗަށް ޖަމާވެ އެބާރު ވަރަށް ވިޔާނުދާ އެއްޗަކަށްވެދޭ. ވަރަށް ބޮޑު ވިހައަކަށްވެދޭ.ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު
ސުއޫދު ވިދާޅުވީ ކޮންމެ ހައްގެއް ވެސް ގާނޫނު އަސާސީގައި ލިޔެފައިވަނީ ތަންފީޒު ކުރުމުގެ ނިޔަތުގައި ކަމަށެވެ. އަދި ގާނޫނު އަސާސީ ނަގަހައްޓާނީ ރައްޔިތުން ކަމަށް އޭނާ ވިދާޅުވިއެވެ.
