އދ. ގެ އާންމު މަޖިލީހުގައި ވާހަކަ ދެއްކި އިރު ނަތަންޔާހޫގެ ކޯޓުގައި ހަރުކޮށްފައިވަނީ ކޮން އެއްޗެއް؟
ނަތަންޔާހޫގެ ކޯޓުގައި ހަރުކޮށްފައިވާ އެއްޗަކަށް ސަމާލުކަން ހޯދަން މަސައްކަތް ކުރި ނަމަވެސް އޭނާގެ ވާހަކަ ފެށުމާއެކު، ގިނަ އަދަދެއްގެ މަންދޫބުން މަޖިލިސް ދޫކޮށް ވަނީ ނުކުމެގެން ގޮސްފައި.
ނިއުޔޯކުގައި ބާއްވާ އދ.ގެ އާންމު މަޖިލީހުގައި އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ، ސެޕްޓެމްބަރު 26، 2025.
އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހުގައި ވާހަކަ ދެއްކި އިރު ކޯޓުގައި ހަރުކޮށްފައިވާ ވަށް ސްޓިކަރ އެއް ފަދަ އެއްޗަކަށް މީޑިއާގެ ސަމާލު ކަން ލިބިއްޖެއެވެ.
ކުރީގެ އަހަރުތަކުގައި ވެސް ނަތަންޔާހޫ ވަނީ އާންމު މަޖިލިހުގައި މީހުންގެ ސަމާލު ކަން ހޯދުމަށް މިފަދަ ކަންކަން ކޮށްފައެވެ.
މިއަހަރު އޭނާގެ ކޯޓުގައި ހަރުކޮށްފައި ވަނީ ކިއުއާރު ކޯޑެކެވެ.
މި ކިއުއާރު ކޯޑަކީ އޮކްޓޯބަރު 7 ވަނަ ދުވަހު ހަމާސް އިން އިސްރާއީލަށް ދިން ހަމަލާ އަށް ދުނިޔޭގެ ސަމާލުކަން ހޯދުމަށް، އެ ހަމަލާގެ ފަހުން ނެގި މަންޒަރުތަކާއި މަޢުލޫމާތު ހިމެނޭ ވެބްސައިޓަކަށް ލިންކުވާ ކޯޑެކެވެ. މި ހަމަލާ އަކީ އިސްރާއީލު ސިއްސުވާލި އަދި މިހާތަނަށް ދީފައި ނުވާ ފަދަ ވަރުގަދަ ހަމަލާ އެއް ކަމަށް ރިޕޯޓުތައް ބުނެފައިވެއެވެ.
"ބެލުމުގައި ނުހަނު ބޮޑަށް ސަމާލުވުން އެދެވިގެންވެއެވެ" މިހެން ލިޔެފައިވާ އޮންލައިން ޞަފްޙާގައި ހަމަލާގައި ގެއްލުންވި ފަރާތްތަކުގެ މަންޒަރުތައް ހިމަނާފައިވެއެވެ.
މީހުންގެ ސަމާލުކަން ހޯދުމަށް ނަތަންޔާހޫ މަސައްކަތް ކުރި ނަމަވެސް، ހުކުރު ދުވަހު އޭނާ އާންމު މަޖިލީހުގައި ވާހަކަދައްކަން ފެށުމާއެކު، ގިނަ އަދަދެއްގެ މަންދޫބުން ކުއްލިއަކަށް އދ. ގެ އާންމު މަޖިލީހުން ނުކުމެގެން ވަނީ ގޮސްފައެވެ. ބައެއް މަންދޫބުން ނުކުމެގެން ދަމުން ނަތަންޔާހޫ އަށް ނުރުހުން ފާޅު ކުރުމުގެ ގޮތުން އެކި އެކި އިޝާރާތްތައް ކޮށްފައިވެއެވެ. އެއާއެކު މާލަމުގެ އިންތިޒާމު ގެއްލިގެން ދިޔަކަން ފާހަގަ ކުރެވުނެވެ.
ޣައްޒާގައި އަދި ފަލަސްޠީނުންނާ ދެކޮޅަށް އޭނާގެ އަމުރަށް ހިންގަމުންދާ ހަނގުރާމައިގެ ސަބަބުން އިސްރާއީލު ބައިނަލް އަގްވާމީ ދުނިޔޭގައި ވަރަށް ބޮޑަށް ވަނީ އެކަހެރިވެފައެވެ.
