އިސްރާއީލްގެ ސަބަބުން ސަރަހައްދުގައި ހަމަނުޖެހުމާއި، ހަމަލާ ތަކުގެ ސަބަބުން ނުރައްކާތެރިކަން އޮތް ކަމަށް ސީރިއާގެ ރައީސް އަޙުމަދު އަލް ޝަރާ ވިދާޅުވެއްޖެ އެވެ.

އަލް ޝަރާ މިހެން ވިދާޅުވީ އދ ގެ ޖެނަރަލް އެސެމްބްލީގައި ވާހަކަ ދައްކަވަމުންނެވެ. އެގޮތުން އޭނާ ވިދާޅުވީ އިސްރާއީލް އިން ދެމުން ގެންދާ ހަމަލާތަކަކީ މުޅި ސަރަހައްދަށް ވެސް އޮތް ނުރައްކަލެއް ކަމަށެވެ.

އދ ގައި އަލް ޝަރާ ވާހަކަ ދައްކަވާފައިވާއިރު، މިއީ ފާއިތުވި 60 އަހަރުގެ ތެރޭގައި ސީރިއާގެ ރައީސަކު އދ ގައި ވާހަކަ ދެއްކެވި ފުރަތަމަ ފަހަރެވެ. އެ ވާހަކައިގައި އަލް ޝަރާ ވިދާޅުވެފައި ވަނީ، ސީރިއާގެ ރައީސް ކަމުން ބައްޝާރު އަލް އަސަދު ދުރު ކުރި ފަހުން، ސީރިއާ އަކީ މިހާރު ހަމަޖެހުމާއި ސުލްގައިގެ ފުރުސަތުތަެއް އޮތް ޤައުމަކަށް ބަދަލުވެފައިވާ ޤައުމެއް ކަމަށެވެ.

އެހެން ނަމަވެސް، އަލް އަސަދު ވެރިކަމުން ދުރު ކުރެވުނު ފަހުން ވެސް، އިސްރާއީލް އިން ދެމުން ގެންދާ ހަމަލާ ތަކުގެ ސީރިއާގެ ކުރިމަގަށް ނޭދެވޭ އަސަރުތަކެއް ކުރަމުން އަންނަ ކަމަށް އަލް ޝަރާ ވަނީ ފާހަގަ ކުރައްވައިފަ އެވެ. އެކަން ފާހަގަ ކުރައްވައި އަލް ޝަރާ ވިދާޅުވީ، ސީރިއާ އިން ދަނީ 1973 ވަނަ އަހަރުގެ ޔޮމް ކިޕޫރު ހަނގުރާމައިގެ ފަހުން ވެވުނު ހަމަޖެހުމުގެ އެއްބަސްވުމަށް އިޙުތިރާމް ކުރަމުން ކަމަށެވެ.

މީގެ ދެ އަހަރު ކުރިން، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް ޖަމާއަތުން އިސްރާއީލް އަށް ދިން ހަމަލާއާ ގުޅިގެމް އިސްރާއީލް އިން ވަނީ މުޅި ސަރަހައްދުގައި އަސްކަރީ އޮޕަރޭޝަންތައް ޚަރުދަނާ ކޮށްފަ އެވެ. އަދި ޣައްޒާ އަށް އެތައް ހަމަލާތަކެއް ދީ، އެތައް ބަޔަކު ޝަހީދުކޮށް، މުޅި ޣައްޒާ ވަނީ ސުންނާފަތި ކޮށްލައިފަ އެވެ.

އިސްރާއީލް އިން ހިންގަމުން އަންނަ ޖަރީމާ ތަކުގައި އެ ޤައުމަށް އެންމެ ބޮޑަށް ވާގިވެރި ވަމުން އަންނަނީ އެމެރިކާ އަދި އެ ޤައުމުގެ ރައީސް ޑޮނަލްޑް ޓްރަމްޕް އެވެ. ނަމަވެސް، ޓްރަމްޕް ވަނީ އަލް ޝަރާއާ ބައްދަލު ކުރައްވައި، ގުޅުން ބަދަހި ކުރައްވައިފަ އެވެ.

އދ ގައި ބަައިވެރިވެ ވަޑައިގެންނެވުމަށް ކުރެއްވި ދަތުރުފުޅުގައި އަލް ޝަރާ ވަނީ އެމެރިކާގެ ރައީސް ޓްރަމްޕް އަދި އެ ޤައުމުގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ވެސް ބައްދަލު ކުރައްވައިފަ އެވެ. އޭގެ އިތުރުން، ފްރާންސްގެ ރައީސް އިމަނުއެލް މެކްރޮންއާ ވެސް އަލް ޝަރާ ވަނީ ބައްދަލު ކުރައްވައިފަ އެވެ.