ޣައްޒާ އަށް އެހީ ހިފައިގެން ކަނޑުމަގުން ކުރަމުންދާ ދަތުރު އިންތިޒާމުކުރާ ފަރާތްތަކުން އަންގާރަ ދުވަހުގެ ރޭ ބުނެފައިވަނީ ގްރީސްގެ ކައިރީގައި މިހާރު އޮތް އެމީހުންގެ ބައެއް އުޅަނދުތަކަށް އަމާޒު ކޮށް ގިނަ ޑްރޯން ތަކެއް ފޮނުވާލާފައިވާ ކަމަށާއި، ގޮވުމުގެ އަޑުތައް އިވިފައިވާ ކަމަށެވެ.

"ގިނަ ޑްރޯންތަކަކާއި، ގޮތް ނޭނގޭ އެއްޗެހިތަކެއް ވެއްޓި، މުވާސަލާތްތައް ހުއްޓި އަދި ގިނަ އުޅަނދުތަކަކުން ގޮވުމުގެ އަޑު އިވުނު" ކަމަށް ގްލޯބަލް ސުމޫދު ފްލޯޓިލާއިން ނެރުނު ބަޔާނެއްގައި ބުނެފައިވެއެވެ. ނަމަވެސް އެއްވެސް މީހަކަށް ގެއްލުމެއް ލިބުނުކަން ނުވަތަ ނޫންކަން ބަޔާނުގައި ހިމަނާފައެއް ނުވެއެވެ.

"އަޅުގަނޑުމެންނަށް މި ނަފްސާނީ ހަނގުރާމަ މިހާރު ސީދާ ފެންނަމުން މިދަނީ، އެކަމަކު އަޅުގަނޑުމެން ބިރުގަންނާކަށް ނުޖެހޭނެ" ކަމަށް އެ ބަޔާނުގައި ބުނެފައިވެއެވެ.

ޖަރުމަނުގެ އިންސާނީ ޙައްޤުތަކުގެ އެކްޓިވިސްޓް އަދި ފްލޯޓިލާގެ މެންބަރު ޔާސްމިން އާކާ އިންސްޓަގްރާމްގައި ޕޯސްޓްކުރި ވީޑިއޯއެއްގައި ބުނެފައިވަނީ ފަސް އުޅަނދަށް ހަމަލާދީފައިވާ ކަމަށެވެ.

"އަޅުގަނޑުމެން އުފުލަނީ ހަމައެކަނި އިންސާނީ އެހީ" އޭނާ ބުންޏެވެ. "އަޅުގަނޑުމެންގެ އަތުގައި ހަތިޔާރެއް ނެތް. އަޅުގަނޑުމެންގެ ފަރާތުން އެއްވެސް މީހަކަށް ނުރައްކަލެއް ނެތް. އެތައް ހާސް މީހުން މަރަމުންދަނީ އިސްރާއީލުން، އަދި މުޅި އާބާދީއެއް ބަނޑަށް ޖައްސަމުންދަނީ ވެސް އެމީހުން."

ކުރިން ރެކޯޑުކުރި ވީޑިއޯއެއްގައި އާކާ ބުނެފައިވަނީ އެކްޓިވިސްޓުންނަށް "15، 16 ޑްރޯން" ފެނިފައިވާ ކަމަށާއި، އަދި އެމީހުންގެ ކޮމިއުނިކޭޝަން ހުއްޓިފައިވާ ކަމަށެވެ.

ފްލޯޓިލާގެ ރަސްމީ އިންސްޓަގްރާމް ޕޭޖުގައި ޕޯސްޓްކޮށްފައިވާ ވީޑިއޯ އެއްގައި، ބްރެޒިލްގެ އެކްޓިވިސްޓް ތިއާގޯ އަވިލާ ބުނެފައިވަނީ ހަތަރު އުޅަނދަށް "ޑްރޯންތަކުން ޑިވައިސްތަކެއް" އަމާޒުކޮށްފައިވާ ކަމަށެވެ. އެ ވަގުތު ފަހަތުން އިތުރު ގޮވުމެއްގެ އަޑު އިވުނެވެ.

ގްލޯބަލް ސުމޫދު ފްލޯޓިލާ ބާސެލޯނާ އިން ދަތުރު ފެށީ މި މަހުގެ ކުރީކޮޅުގައެވެ. އެމީހުންގެ މަޤްޞަދަކީ އިސްރާއީލުން ޣައްޒާ އަށް އަޅާފައިވާ ހިސޯރު ނިމުމަކަށް ގެނެސް، އެ ސަރަޙައްދަށް އެހީ ފޯރުކޮށްދިނުމެވެ.

މިހާރު އެ ފްލޯޓިލާގައި 51 އުޅަނދު ހިމެނެއެވެ. އޭގެ ގިނަ އުޅަނދުތައް މިހާރު އޮތީ ގްރީސްގެ ކްރީޓް ޖަޒީރާގެ ކައިރީގައެވެ.

ޣާއްޒާ އަށް ދަތުރު ފެށުމުގެ ކުރިން ޓިއުނީޝިއާ ގައި އެމީހުންގެ އުޅަނދު އަޅާފައި އޮއްވާ، ޑްރޯން ހަމަލާ ކަމަށް ބެލެވޭ ދެ ހަމަލާ އެމީހުންނަށް ދީފައިވެއެވެ.

ތިމާވެށީގެ އެކްޓިވިސްޓް ގްރެޓާ ތުންބަރގް ވެސް މި ފްލޯޓިލާގައި ބައިވެރިވެފައިވެއެވެ.

އިސްރާއީލުން ހޯމަ ދުވަހު ބުނެފައިވަނީ އެ އުޅަނދުތައް ޣައްޒާ އަށް ވަނުމަށް ހުއްދައެއް ނުދޭނެ ކަމަށެވެ.

ޖޫން އަދި ޖުލައި މަހު އެކްޓިވިސްޓުން އެހީ ފޯރުކޮށްދިނުމަށް ކުރި ދެ މަސައްކަތްވެސް އިސްރާއީލުން ހުއްޓުވާލިއެވެ.

ޣައްޒާ ގައި ހިނގަމުންދާ ހަނގުރާމައިގެ ސަބަބުން އެ ސަރަޙައްދުގައި ނުރައްކާތެރި އިންސާނީ ކާރިސާ އެއް އުފެދިފައިވާތީ، އިސްރާއީލަށް ބައިނަލްއަޤްވާމީ ފެންވަރުގައި ބޮޑެތި ފާޑުކިޔުންތައް އަމާޒުވަމުންދެއެވެ.

ފާއިތުވި މަހު، އދ. އިން ބާރުދޭ ޖަމްޢިއްޔާއަކުން ރަސްމީކޮށް އިޢުލާނު ކޮށްފައިވަނީ ޣައްޒާ ގެ ބައެއް ސަރަޙައްދުތަކުގައި ބަނޑުހައިހޫނުކަން ފެތުރިފައިވާ ކަމަށެވެ.

އަދި ސެޕްޓެމްބަރު 16 ގައި، އދ. ގެ ތަޙްޤީޤުކުރާ ފަރާތްތަކުން އިސްރާއީލަށް ތުހުމަތު ކޮށްފައިވަނީ ހިސޯރު ކޮށްފައިވާ އެ ސަރަޙައްދުގައި "ނަސްލު ނައްތާލުމުގެ" ޢަމަލުތައް ހިންގަމުންދާ ކަމަށެވެ.