އައްޑޫ ސިޓީ ހިތަދޫގައި އަންގާރަ ދުވަހުގެ ރޭ ތޫނު އެއްޗަކުން ހަމަލާދީ މީހަކު ޒަހަމްކޮށްލައިފި އެވެ.

ބުދަ ދުވަހު ފުލުހުން ބުނީ، ހިތަދޫގައި މީހަކަށް ތޫނު އެއްޗަކުން ހަމަލާދިން ކަމަށް އަންގާރަ ދުވަހުގެ ރޭ ދަންވަރު 1:17 ހާއިރު ރިޕޯޓު ކޮށްފައިވާ ކަމަށެވެ.

ފުލުހުން ބުނީ މި މާރާމާރީގައި 34 އަހަރުގެ ދިވެހި ފިރިހެނަކަށް އަނިޔާވެފައިވާ ކަމަށެވެ. އަދި އެ މީހާ ހަށިގަނޑުގެ ދެ ތަނަކަށް ތޫނު އެއްޗަކުން ހަމަލާ ދީފައިވާ ކަމަށާއި، އެ މީހާއަށް އައްޑޫ އީކުއޭޓްރަލް ހޮސްޕިޓަލް (އޭއީއެޗް)ގައި ފަރުވާދެމުންދާ ކަމަށެވެ.

މައުލޫމާތު ލިބިފައިވާ ގޮތުގައި ޒަހަމްވި މީހާގެ ސަރޖަރީއެއް ވަނީ ކޮށްފައެވެ. ފުރާނައަށް ނުރައްކަލެއް ނެތް ނަމަވެސް މިވަގުތު ފަރުވާ ދެމުންދަނީ އައިސީޔޫގައި ކަމަށް މައުލޫމާތު ލިބެއެވެ.

ހަމަލާދިން ސަރަހައްދު ފުލުހުން ބަންދުކޮށްފައިވާއިރު، މި ހާދިސާއާ ގުޅޭ އިތުރު ތަފްސީލެއް ފުލުހުން ހާމަކޮށްފައިނުވެއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.

މީގެ ކުރިން ވެސް އައްޑޫ ސިޓީގައި ހިންގި މާރާމާރީތަކުގައި މީހުންގެ ފުރާނަ ގެއްލިފައިވެއެވެ.