ކުރިއަަަށް މި އޮތް 3 އަހަރު މުއިއްޒު ރައީސަކަށް ހުރުމަކީ އިއާދަނުކުރެވޭނެ ވަރު ބޮޑު ގެއްލުން ކުރިމަތިވާނެ ކަމެއް - އަމީރު

ކުރިއަށް އޮތް 3 އަހަރު ރާއްޖޭގެ ރައީސް ކަމުގައި ޑރ. މުހައްމަދު މުއިއްޒު ހުންނެވުމަކީ ގައުމާއި ރައްޔިތުންނަށް އިއާދަނުކުރެވޭނެވަރުގެ ބޮޑު ގެއްލުމެއް ލިބޭނެ ކަމެއް ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އަމީރު މިފަދައިން ވިދާޅުވީ އަތޮޅު ކައުންސިލް ބޭއްވުމުން ރައްޔިތުންނަށްވާ ފައިދާއެއް ނެތް ކަމަށާއި، އެއިން ގެއްލުން މިވަނީ، ޒިންމާދާރުކަން ކުޑަކޮށް މިކަން ކުރާތީ ކަމަށް ވިދާޅުވެފައިވާތީ އެކަމަށް ރައްދު ދެއްވަމުންނެވެ. "ރައްޔިތުންނާއެކު ޕޮޑްކާސްޓު" ގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވެފައިވަނީ އަތޮޅު ކައުންސިލެއް އޮތުމުގެ ބޭނުމެއް ނެތް ކަމަށެވެ.

އާދެ، އެއީ، ޙަޤީޤަތުގައި ރައްޔިތުންނަށް ފައިދާހުރި، މާނަހުރި، އެއްޗަކަށްނުވޭ ޙަޤީޤަތުގައި. މިދިޔަ ދުވަސްތަކުގައި އެކަން ފެނިފައިވާނީ ރައްޔިތުންނަށް. އަދި މިހާރުވެސް އެދަނީ ތަޖުރިބާ ކުރަމުން. އޭގެ ބަދަލުގައި އަޅުގަނޑު މި ބޭނުންވަނީ، އަޅުގަނޑު ބޭނުންވާގޮތަކީ، ސީދާ ކައުންސިލްގެ ފަރާތުން ސަރުކާރާ މުޢާމަލާތް ކުރެވޭނެ ނިޒާމެއް ގާއިމުކުރުން.

ރައީސް ޑރ. މުހައްމަދު މުއިއްޒު

ރައީސް މުއިއްޒުގެ ވާހަކަފުޅަށް ރައްދު ދެއްވާ އަމީރު ވިދާޅުވީ ފާއިތުވެގެން މިދާ 2 އަހަރަށް ބަލާއިރު ކުރިއަަަށް މި އޮތް 3 އަހަރު މަނިކުފާނު މި ގައުމުގެ ރައީސަކަށް ހުރުމަކީ އެއްވެސް މާނަހުރި ކަމެއް ކަމަށް ނުވާ ކަމަށެވެ. އަދި އެއީ އިއާދަނުކުރެވޭނެ ވަރު ބޮޑު ގެއްލުން ގައުމާއި ރައްޔިތުންނަށް ކުރިމަތިވާނެ ކަމެއް ކަމަށް ފެންނަ ކަމަށް އަމީރު ވިދާޅުވިއެވެ.

ރައީސް މުއިއްޒު ވިދާޅުވީ އަތޮޅު ކައުންސިލް ބޭއްވުމުން ރައްޔިތުންނަށްވާ ފައިދާއެއް ނެތް ކަމަށެވެ. އަދި އެއިން ގެއްލުންވާ ކަމަށާއި، ޒިންމާދާރުކަން ކުޑަކޮށް ކަންކަން ކުރާ ކަމަށެވެ. އެހެންވީމާ، އަތޮޅު ކައުންސިލެއް އޮތުމުގެ ބޭނުމެއް ނެތް ކަމަށާއި، އެހެންނަމަވެސް، އަތޮޅުތައް ގޮތުގައި އަތޮޅު ހިންގާނެ ކަމަށެވެ.