ރަން އިން އައްޑޫ އަށް ބޮޑު ތަރުހީބެއް، އިވެންޓްތަކުގެ ޖާގަތައް ފުރިބާރުވެއްޖެ

ޓޯޓަލް ފިޓްނަސް ގްރޫޕް (ޓީއެފްޖީ) އިން އިންތިޒާމުކޮށްގެން އައްޑޫ ސިޓީގައި ބާއްވާ ރަން އިން އައްޑޫ އަށް ބޮޑު ތަރުހީބެއް ލިބެމުން އަންނަ ކަމަށް ޓީއެފްޖީން ބުނެފި އެވެ.

ރާއްޖެއެމްވީ އަށް މައުލޫމާތު ދެމުން ޓީއެފްޖީގެ ހުސެއިން ޒިނާން ވިދާޅުވީ، ރަން އިން އައްޑޫ އަށް ބޮޑު ތަރުހީބެއް ލިބެމުން އަންނަ ކަމަށާއި، މިހާތަނަށް މެރަތަން، ހާފް މެރަތަން، 10 ކިލޯ މީޓަރު ދުވުން އަދި ކުޑަކުދިންގެ ދުވުމުގެ ޖާގަތައް ފުރިފައިވާ ކަމަށެވެ.

އެހެންނަމަވެސް އޭނާ ވިދާޅުވީ، ފަސް ކިލޯ މީޓަރު ކެޓަގަރީގެ ހަތް ވަރަކަށް ޖާގަ އަދި ބާކީ ހުސްކޮށް އެބައޮތް ކަމަށާއި، ދުވަސްވީ މީހުންގެ ހިނގާލުމުގެ ޖާގަތައް އަދިވެސް ހުޅުވާލެވިފައިވާ ކަމަށެވެ.

ޖުމްލަ ހަތަރު ކެޓަގަރީއެއް ހިމެނޭ މި ދުވުމުގައި ފުރަތަމަ ކުރިޔަށްދާނީ މެރަތަން އެވެ. މެރަތަން ރޭސް ފެށުމަށް ހަމަޖެހިފައިވަނީ 15 ވަނަ ދުވަހުގެ ރޭ ފަތިހު 4:45 ގައެވެ. މި ރޭސް ފެށުމަށް ހަމަޖެހިފައިވަނީ ކަނބިހާ މަގުންނެވެ. މެރަތަން ރޭސް ނިމޭނެކަމަށް ލަފާކުރެވެނީ ފަސް ގަޑިއިރާ 20 މިނެޓުންނެވެ. އެގޮތުން ދުވުންތެރިންނަށް ރޭސް ނިންމާލެވޭނެ ކަމަށް ލަފާކުރެވެނީ 10:10 ގައެވެ. މި ރޭހުގައި 42.2 ކިލޯ މީޓަރުގެ ރާސްތާއެއް ކަޑައްތުކުރަން ޖެހޭނެއެވެ.

ދެވަނަ ރޭހަކަށް ފަށާނީ ހާފް މެރަތަން އެވެ. މި ރޭސް ފަށާނީ ގަން އިންޓަނޭޝަނަލް އެއާޕޯޓުން 06:45 ގައެވެ. މި ރޭހުގައި 21.1 ކިލޯ މީޓަރުގެ ރާސްތާއެއް ކަޑައްތުކުރަންޖެހޭނެ އެވެ.

ތިންވަނަ ރޭހަކަށް ފަށާނީ 10 ކިލޯމީޓަރު ރޭހެވެ. މި ރޭސް ފަށާނީ ހިތަދޫ ލިންކްރޯޑުން 07:45 ގައެވެ. މި ދުވުމުގެ ފަހު ރޭހަކީ ފަސް ކިލޯ މީޓަރު ރޭހެވެ. މި ރޭސް ހިތަދޫ އެޅެދީދީ މަގުން 08:45 ގައި ފަށާނެއެވެ. މި ހުރިހާ ރޭހެއްވެސް ނިންމާނީ ހިތަދޫގައި ހުންނަ ކޮންވެންޝަން ސެންޓަރަށެވެ.

މި ރޭސްތައް ކުރިޔަށްދާ ރޫޓުތަކުގެ ކޮންމެ ދެ ކިލޯ މީޓަރަކުން ފަސްޓްއެއިޑް ސްޓޭޝަން ވަނީ ގާއިމުކޮށްފައެވެ. ފަސްޓްއެއިޑްގެ ގޮތުން އެހީތެރިވާނީ މޯލްޑިވްސް ރެޑްކްރޮސެންޓުން ކަމަށާއި، ރޭސްތައް ކުރިޔަށްދާއިރު، އައްޑޫގެ ފުލުހުން ސަލާމަތީ ގޮތުން ހަރަކާތްތެރިވާނެ ކަމަށް މިކަންތައް އިންތިޒާމުކުރާ ފަރާތުން ބުނެއެވެ.