ޣައްޒާ ހަނގުރާމަ ހުއްޓާލައި، ރަހީނުން ދޫކުރުމަށް ޓްރަމްޕް އަށް ގޮވާލައި ތެލް އަވީވްގައި މުޒާހަރާ ކޮށްފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލައި، ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކޮށްދިނުން އެދި، އެ ޤައުމުގެ ގިނަ ރައްޔިތުންތަކެއް އެމެރިކާގެ ރައީސް ޑޮނަލްޑް ޓްރަމްޕް އަށް ގޮވާލައިފި އެވެ.

އިސްރާއީލްގެ ވެރި ރަށް، ތެލް އަވީވްގައި ކުރިއަށް ދިޔަ މުޒާހަރާގައި އެ ޤައުމުގެ އެތައް ހާސް ރައްޔިތުން ތަކެއް ވަނީ ބައިވެރިވެފަ އެވެ.

އިސްރާއީލްގެ އަސްކަރިއްޔާގެ މައި މަރުކަޒުގެ ކުރިމަތީގައި ހޮނިހިރު ދުވަހުގެ ރޭ ބޭއްވި އެ މުޒާހަރާގައި، މުޒާހަރާގެ ބައިވެރިން ވަނީ އިސްރާއީލްގެ ދިދަ ނަގައި، ރަހީނުންގެ ފޮޓޯތައް ހިމެނޭ ބޯޑުތައް ހިފައިގެން އިހުތިޖާޖު ކޮށްފަ އެވެ.

މުޒާހަރާގެ ބައިވެރިން ބުނެފައި ވަނީ، އެމެރިކާގެ ރައީސް ޓްރަމްޕްގެ ލެގަސީ ފުނޑު ފުނޑު ވަމުން ދަނީ ޣައްޒާ ހަނގުރާމަ ދެމިގެން ދާތީ ކަމަށެވެ. އަދި މުޒަހަރާގެ ބައިވެރިން ވަނީ، ހަމާސް އިން ރަހީނު ކޮށްފައިވާ އިސްރާއީލްގެ ރައްޔިތުން، "މިހާރުން މިހާރަށް" މިނިވަން ކޮށްދިނުމަށް ވެސް ޓްރަމްޕް އަށް ގޮވާލައިފަ އެވެ.

މުޒާހަރާގެ ބައިވެރިޔަކު ބުނެފައި ވަނީ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަށް މަޖުބޫރު ކުރުވޭނެ ހަމައެކަނި މީހަކީ އެމެރިކާގެ ރައީސް ޓްރަމްޕް ކަމަށް ޤަބޫލު ކުރާ ކަމަށެވެ. އިސްރާއީލްގެ ގިނަ ރައްޔިތުން ވެސް އެކަން އެގޮތުގައި ޤަބޫލު ކުރާ ކަމަށާއި، ޓްރަމްޕް އަށް އެކަން ކުރެވޭނެ ކަމަށް އޭނާ ބުންޏެވެ.

ޣަައްޒާ ހަނގުރާމަ ފުޅާ ކުރަން ނިންމައި، ޣައްޒާ ސިޓީ ހިފުމަށް، އިސްރާއީލްގެ އަސްކަރިއްޔާ އަށް ބޮޑު ވަޒީރު ނަތަންޔާހޫ އެންގުމާ ގުޅިގެން، އިސްރާއީލްގެ ގިނަ ރައްޔިތުން ވަނީ އެކަމުގެ ކަންބޮޑުވުން ފާޅު ކޮށްފަ އެވެ. ޚާއްސަކޮށް ހަމާސްގެ ބެލުމުގެ ދަށުގައި ތިބި ރަހީނުންނާއި، އެމީހުންނަށް އެހީތެރިވާ ފަރާތްތަކުން ބުނާ ގޮތުގައި، އިސްރާއީލް އިން ޣައްޒާ ހަނގުރާމަ ފުޅާކޮށް، ދޭ ހަމަލާ ތަކުގެ ސަބަބުން ރަހީނުންނަށް ބިރުވެރިކަން އޮންނާނެ ކަމަށެވެ.

ޣައްޒާ ހަނގުރާމަ ހުއްޓާލުމަށް ގޮވާލައި، އަދި ރަހީނުން މިނިވަން ކުރުމަށް ގޮވާލައި އިސްރާއީލްގައި ކުރިއަށް ގެންދަމުން އަންނަ މުޒާހަރާތައް ވަނީ ކޮންމެ ހަފުތާ އަކު ވަރުގަދަ ވަމުންނެވެ. މުޒާހަރާގެ ބައިވެރިންގެ މައިގަނޑު ގޮވާލުމަކީ، ހަނގުރާމަ ހުއްޓާލުމަށް ހަމާސް އާއެކު އެއްބަސްވުމަކަށް އައިސް، ހަމާސްގެ ބެލުމުގެ ދަށުގައި ތިބި ރަހީނުން މިނިވަން ކުރުމެވެ.

ހަމާސް އިން ވަނީ އިސްރާއީލްގެ 251 މީހުން ރަހީނު ކޮށްފަ އެވެ. އޭގެ ތެރެއިން ގިނަ އަދަދެއްގެ މީހުން މިނިވަން ކޮށްފައިވާއިރު، މިވަގުތު ހަމާސްގެ ބެލުމުގެ ދަށުގައި ތިބި ކަމަށް ބެލެވެނީ 48 މީހުންނެެވެ. އޭގެ ތެރެގައި 20 މީހުން ދިރި ތިބި ކަމަށް އިސްރާއީލްގެ އަސްކަރިއްޔާ އިން ވަނީ ލަފާ ކޮށްފަ އެވެ.

އިސްރާއީލްގެ ވެރި ރަށް ތެލް އަވީވްގައި މުޒާހަރާތައް ކުރިއަށް ގެންދަމުން އަންނައިރު، އެމެރިކާ އަދި ޓްރަމްޕް އަކީ އިސްރާއީލްގެ ބޮޑު ވަޒީރު ނަތަންޔާހޫ އަށް އެންމެ ބޮޑަށް ވާގިވެރިވާ ފަރާތްތަކެވެ. ޣައްޒާ ހަނގުރާމަ ހުއްޓާލުމަށް ޓްރަމްޕް ގޮވާލައްވަމުން ގެންދެވި ނަމަވެސް، އެކަމުގައި އެދެވޭ މަސައްކަތެއް ޓްރަމްޕް ނުކުރައްވާ ކަމަށް ބައެއް ފަރާތްތަކުން ބުނެ އެވެ.