ރައްޔިތުން މަޖިލީހުގެ މެންބަރުންގެ ތެރެއިން ގާތްގަނޑަކަށް 30 ޕަސެންޓް މެންބަރުންނަށް ބޭންކުތަކުން އާދަޔާ ހިލާފަށް ލޯނު ދީފައިވާ ކަމަށް މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއިލް ޒަރިޔަންދު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޒަރިޔަންދު ވިދާޅުވީ ރައްޔިތުން މަޖިލީހުގެ ބައެއް މެންބަރުންގެ މާލީ ބަޔާނުން ވަރަށް ގިނަ ކަންކަން ފާހަގަވި ކަމަށާއި، އެއްގޮތް ކަންތައްތަކެއް ވެސް އައިޑެންޓިފައި ކުރެވިފައިވާ ކަމަށެވެ.

އެގޮތުން މަޖިލީހުގެ 30 ޕަސެންޓް މެންބަރުންނަށް 2024 ވަނަ އަހަރުގެ މާޗު މަހުގެ ފަހުން އާދަޔާ ހިލާފަށް ބޭންކް އޮފް މޯލްޑިވްސް އަދި އިސްލާމިކް ބޭންކުން އާދަޔާ ހިލާފަށް ލޯނު ދީފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ ބައެއް މެންބަރުން ފްލެޓުތަކާއި، ރޯހައުސްތަކާއި، ބިންތައް ބައްލަވާގަނެފައިވަނީ ލޯނު ނެގުމަށްފަހު ކަމަށް އަންގައިދިނުމަށް މަސައްކަތް ކޮށްފައިވާ ކަމަށެވެ.

ޒަރިޔަންދު ވިދާޅުވީ ބައެއް މެންބަރުން މާލީ ބަޔާނުގައި އެއްވެސް ތާކުންތާކު ނުޖެހޭ ގޮތަށް މައުލޫމާތު ފުރިހަމަ ކޮށްފައިވާ ކަމަށާއި، މިގޮތަށް އަމަލު ކުރުމުން ރައްޔިތުން ސުވާލު އުފައްދާނެ ކަމަށެވެ. މާލީ ބަޔާނަކީ މާލީ ތެދުވެރިކަމުގެ ޓޫލެއް ކަމަށް އޭނާ ވިދާޅުވި އެވެ.

މާލީ ބަޔާނަކީ ހުރިހާ ރައްޔިތުން މަޖިލީހުގެ މެންބަރުން ހުށަހަޅަންޖެހޭ އެއްޗެއްކަން ފާހަގަކުރައްވައި ޒަރިޔަންދު ވިދާޅުވީ މާލީ ބަޔާނުގައި ރަނގަޅަށް ފުރިހަމައަށް މައުލޫމާތު ހިމަނަންޖެހޭ ކަމަށެވެ. ނަމަވެސް ބައެއް މެންބަރުން ހަދިޔާ ދިން ފަރާތް ހިއްސާ ކޮށްފައިނުވާ ކަމަށާއި، އެފަދަ މައުލޫމާތުތައް ހާމަ ކުރަންޖެހޭ ކަމަށް އޭނާ ވިދާޅުވި އެވެ.

އެހެންކަމުން ރައްޔިތުންގެ މަޖިލީހުގެ މެންބަރުންނަށް މާލީ ބަޔާން ހުށަހަޅަންޖެހޭ ރަނގަޅު ގޮތް މަޖިލީހުގެ އިދާރާއިން ރަނގަޅަށް ކިޔައިދޭންޖެހޭ ކަމަށް ޒަރިޔަންދު ވިދާޅުވި އެވެ.