ލަދުވެތި ކަމުގެ ވެސް އިންތިހާ، ދެން އަވަހަށް ވަޑައިގަންނަވާށެވެ!

ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ ސަމިޓުގައި ބައިވެރިވެ ވަޑައިގަތުމަށް ރާއްޖޭގެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އުޅުއްވަނީ ޗައިނާ އަށް ވަޑައިގެންނެވެ. އެ ދަތުރުފުޅުގައި އެމަނިކުފާނު ޗައިނާގެ ރައީސްއާ ވެސް ބައްދަލު ކުރައްވައިފި އެވެ.

އެހެން ނަމަވެސް، ފާހަގަ ކުރަން މި އުޅޭ ވާހަކަ އަކީ، އެ ދަތުރުގައި ބައިވެރިވުމަށް ރައީސް މުޢިއްޒު ވަޑައިގެން ޙާސިލުވީ ކޮން ކަމެއްތޯ އެވެ. ރާއްޖެ އަކީ އެ ސަމިޓުގެ މެމްބަރު ޤައުމެއް ވެސް ނޫނެވެ. ރާއްޖެ އަށް އޮތީ އެ ސަމިޓުގެ ޑައިލޮގް ޕާޓްނަރުގެ މަގާމެވެ.

ސޯޝަލް މީޑިއާގައި ބައެއް އާންމު ރައްޔިތުން ސަމިޓުގެ އެއްވެސް ފޮޓޯފުޅަކުން ރައީސް މުޢިއްޒު ފެނިވަޑައި ނުގަންނަވާތީ ސުވާލު ކޮށްފައި ހުއްޓާ ވެސް ދުށީމެވެ. ސަމިޓުގެ ރަސްމީ އެއްވެސް ފޮޓޯފުޅަކުން ރައީސް މުޢިއްޒު ނުފެންނަ ސަބަބަކީ އެއީ އެވެ. ރާއްޖެ އަކީ ސަމިޓުގެ މެމްބަރު ޤައުމަކަށް ނުވުމެވެ.

ސަމިޓުގައި ބައިވެރިވުމަށް ރަޝިޔާގެ ރައީސް ވޮލަޑިމިއަރ ޕުޓިން އާއި، އީރާންގެ ރައީސް މަސްއޫދު ޕެޒެޝްކިއާންގެ އިތުރުން، އެހެން ޤައުމު ތަކުގެ ރައީސުން ވެސް ވަޑައިގެންނެވި އެވެ. އިންޑިއާގެ ބޮޑު ނަރެންދްރަ މޯދީ އާއި ޕާކިސްތާންގެ ބޮޑު ވަޒީރު ވެސް ވަޑައިގެންނެވި އެވެ. ނަމަވެސް، އެ ބޭފުޅުންނާ އެކު ސަމިޓުގެ ރަސްމީ ފޮޓޯފުޅުގައި ރައީސް މުޢިއްޒު ނެތެވެ. ސަބަބަކީ ހަމަ ކުރިން މި ބުނި ސަބަބެވެ.

ދެން އޮތީ އެހެން ކަމެކެވެ. ރައީސް މުޢިއްޒު ފެނިވަޑައިގަންނަވަނީ ވަރަށް ހުސް ވަގުތު ގިނަ ވެގެން އުޅުއްވާ ރައީސެއްގެ ގޮތުގަ އެވެ. މިހެން މި ބުނި ސަބަބަކީ، ސަމިޓުގައި ބައިވެރިވެ ވަޑައިގަތުމަށް ފަހު، އިންޑިއާގެ ބޮޑު ވަޒީރު މޯދީ އެނބުރި ޤައުމަށް ވަޑައިގެންފި އެވެ. ރަޝިޔާގެ ރައީސް ޕުޓިން އާއި، އީރާންގެ ރައީސް މަސްއޫދު ވެސް ޤައުމަށް ވަޑައިގެންފި އެވެ. މިއީ ސަމިޓުގެ މެމްބަރު ޤައުމު ތަކުގެ ވެެރިންނެވެ.

އެކަމަކު، ސަމިޓުގެ ޑައިލޮގް ޕާޓްނަރުގެ ގޮތުގައި ހިމެނޭ، އެހެނަސް މެމްބަރު ޤައުމުތަކުގެ ތެރޭގައި ނުހިމެނޭ ރާއްޖޭގެ ރައީސް އަދި ވެސް ހުންނެވީ ޗައިނާގަ އެވެ. ކީއްކުރަން ހެއްޔެވެ؟ ކޮން ކަމެއް ޙާސިލު ކުރައްވަންތޯ އެވެ؟ ގައިމު ޤައުމު ތަކުގެ ވެރިން އުޅުއްވަނީ އެ ބޭފުޅުންގެ ބިޒީ ޝެޑިއުލް އިން ވެސް ވަގުތު ކޮޅެއް ބޭކާރު ވެދާނެތީ އެވެ. ޤައުމުގައި ކުރައްވަން ހުރި މަސައްކަތްތައް ގިނަ ކަމުންނެވެ.

އެހެނަސް، ރާއްޖޭގެ ރައީސް އުޅުއްވަނީ ވަރަށް ޓެންޝަން ފްރީ ކޮށެވެ. ޤައުމުގައި މައްސަލައެއް އޮތް ކަމަށް އެމަނިކުފާނަށް ހީފުޅު ވެސް ނުވާ ކަހަލަ އެވެ. އެކަމަކު، ހަގީގަތުގައި ޤައުމުގައި އޮތީ ހައްތަހާ ވެސް މައްސަލަ އެެވެ. ސަރުކާރުން ޙައްލު ކުރަން ޖެހޭ އަދި ރަނގަޅު ކުރަން ޖެހޭ މައްސަލަތައް އޮތީ ފުނިޖެހިފަ އެވެ.

ސަރުކާރުން ބޭނުން ވެގެން މިނިވަން ނޫސްވެރި ކަމުގއި ތަޅު އަޅުވައި، މީޑިއާތައް ނައްތާލުމަށް ރައްޔިތުންގެ މަޖިލީހަށް ބިލެއް ވައްދައިގެން، މުޅި ޤައުމު ހޫނުވެފަ އެވެ. ނޫސްވެރިންނާއި، އާންމު ރައްޔިތުންގެ އުދާސްތައް ބަންޑުން ވަނީ އެވެ. ރައީސް އުޅުއްވަނީ ހަމަ ވަރަށް ޓެންޝަން ފްރީ ކޮށެވެ.

އެކަން އެކަންޏެއް ވެސް ނޫނެވެ. ތަރައްޤީގެ މަޝްރޫއުތައް ކުރިއަށް ނުގޮސް، ރައްޔިތުންގެ ދިރިއުޅުމުގެ ޙާލަތު ދަށްވެ، ދިރިއުޅުމުގެ އަގުތައް ބޮޑުވެ، ރައްޔިތުން މިއަދު ތިބީ ދެ ލޯ މުދުނުގަ އެވެ. އެކަމަކު، ރާއްޖޭގެ ރައީސް ވަރަށް ޓެންޝަން ފްރީ އެެވެ. ހަމަ އެއްވެސް ޚިޔާލެއް ފިކުރެއް ނެތި، މުޅި ޗައިނާގައި އެހަރަ އުޅުއްވަނީ އެވެ.

ރައީސް މުޢިއްޒު އެވެ. ތިޔަ ތަނަކަށް ވަޑައިގެންނެވި ރައީސުން އަދި ބޮޑު ވަޒީރުން ވެސް އެނބުރި ޤައުމަށް ވަޑައިގެންފި އެވެ. ގައިމު އެ ބޭފުޅުން ވެސް ބޭނުންވާ ނަމަ، ތިޔަ ތަނުގައި ބުރު ޖައްސަވައި، އުފާ ކުރައްވަން ތިއްބެވޭނެ އެވެ. އެކަމަކު ޤައުމުގައި ކުރަން ކަންކަން ހުރީތީ ވަޑައިގެންނެވީ އެވެ.

ރައީސް އެވެ. ކުރިން ވެސް ޗައިނާ ބޮޑު ފާރު ދުށީމު ނޫން ހެއްޔެވެ؟ ޗައިނާގައި ރައީސް އަަށް އައު ތަނެއް ނޯންނާނެ ނޫންތޯ އެވެ؟ ދެން ވަޑައިގަންނަވާށެވެ.