ފުލުހުންގެ ޔުނިފޯމުގެ ކަރާމާތް ހިފެހެއްޓުމަށް ކޮންމެ އޮފިސަރަކު ވެސް ނަޒާހަތްތެރިކަމާއެކު މަސައްކަތް ކުރަންޖެހޭ: މިނިސްޓަރު އިހުސާން
ރާއްޖޭގެ ސަލާމަތާއި ރައްކާތެރިކަން ކަށަވަރުކޮށް ބެލެހެއްޓުމަކީ ފުލުހުންގެ އެންމެ މަތީ އަމާޒުކަމުގައި ވާންޖެހޭ
ފުލުހުންގެ 40 ވަނަ އަސާސީ ތަމްރީނު ކޯސް ނިންމުމުގެ ރަސްމިއްޔާތުގެ ތެރެއިން
ފުލުހުންގެ ޔުނިފޯމުގެ ކަރާމާތް ހިފެހެއްޓުމަށް ކޮންމެ އޮފިސަރަކު ވެސް ނަޒާހަތްތެރިކަމާއެކު މަސައްކަތް ކުރަންޖެހޭ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
ފުލުހުންގެ 40 ވަނަ އަސާސީ ތަމްރީނު ކޯސް ނިންމުމުގެ ރަސްމިއްޔާތުގައި މިނިސްޓަރު އިހުސާން ވިދާޅުވީ ފުލުހުންގެ ޔުނިފޯމާއި އަދި މުއައްސަސާގެ ކަރާމާތް ހިފެހެއްޓަންޖެހޭ ކަމަށާއި، އެއަޒުމުގައި މަސައްކަތް ކުރަންޖެހޭ ކަމަށެވެ. އަދި ކޮންމެ ފުލުހަކީ އެ މީހެއްގެ ވާޖިބުގަ ފުރިހަމައަށް ހުރި ފުލުހެއްކަން ރަމްޒުކޮށްދިނުމުގަ ގޮންޖެހުންތަކެއް ހުންނާނެ ފުލުހެއްކަން މިނިސްޓަރު އިހުސާން ފާހަގަކުރެއްވި އެވެ.
ރާއްޖޭގެ ސަލާމަތާއި ރައްކާތެރިކަން ކަށަވަރުކޮށް އަބަދުގެ އަބަދަށް ބެލެހެއްޓުމަކީ ފުލުހުންގެ އެންމެ މަތީ އަމާޒުކަމުގައި އަބަދުވެސް ވާންޖެހޭކަން ފާހަގަކުރައްވައި މިނިސްޓަރު އިހުސާން ވިދާޅުވީ ޔުނީފޯމުގައި ގައުމަށް ޚިދުމަތް ކުރުމަކީ އާދައިގެ ކަމެއްނޫން ކަމަށެވެ. އަދި ފުލުހުންގެ ޚިދުމަތަށް ޚިދުމަތް ކުރެވޭނީ ގައުމަށް އޮންނަ ލޯތްބާއި އާންމު ރައްޔިތުންނަށް ޚިދުމަތް ކުރުމުގެ ވިސްނުން ހުރެގެން ކަމަށެވެ.
ފުލުހުންގެ ޚިދުމަތަކީ ގައުމެއް ކުރިއަށްދިޔުމަށް އެ ޤައުމެއްގަ އޮންނަން ޖެހޭ މުހިންމު އަސާސްތަކެއް ހިފަހައްޓާ ޚިދުމަތެއް. އެގޮތުން ގައުމެއްގެ ސަލާމަތާއި ރައްކާތެރިކަމާއި ގައުމެއްގައި އޮންނަން ޖެހޭ ހަމަޖެހުން ހިފެހެއްޓުމުގެ ފުރިހަމަ ޒިންމާ މި އޮންނަނީ ފުލުހުންގެ ކޮނޑުގައި އެޅިފަ. ރާއްޖޭގެ ފުލުހުންނަކީވެސް ރާއްޖޭގެ ހަމަޖެހުމާއި ސަލާމަތާއި ރައްކާތެރިކަން އަދި ރައްޔިތުންގެ މުދަލާއި، ރައްޔިތުން އުޅޭ އުޅުމުގެ ރައްކާތެރިކަން ކަށަވަރުކުރާ ފަރާތް. ވަޒީރުހޯމް މިނިސްޓަރު އަލީ އިހުސާން
ކުށަށް އަރައިގަންނަ ހާލަތްތަކުގަ ނުވަތަ ގާނޫނާ ޚިލާފުވާ ހާލަތްތަކުގަވެސް ފުލުހުންގެ ގާނޫނީ ދައުރު އަދާކުރަންވާނީ އިންސާނީ ކަރާމާތް ނުގެއްލޭ ގޮތަށް ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވަނީ ކޮންމެ ފުލުހަކީވެސް އިތުުރު ތަމްރީނާއި ރައްޔިތުންނަށް ފޯރުކޮށްދޭ ޚިދުމަތްތައް ދުވަހަކަށް ވުރެ ދުވަހެއް ރަނގަޅު ކުރުމުގެ ވިސްނުމާއި އަމިއްލަ ނަފްސް ބިނާ ކުރާނެ ބަޔަކަށް ވުމަށް އެދިވަޑައިގެންފައެވެ.
މިނިސްޓަރު އިހުސާން މިމޭރުމުން ވާހަކަދެއްކެވިއިރު، އެ މުއައްސަސާ ވަރަށް ބޮޑަށް ސިޔާސީ ވެފައިވާ ކަމަށް ގިނަ ބަޔަކު ދަނީ ބުނަމުންނެވެ. މިފަހުން ރާއްޖޭގައި ހިނގާދިޔަ ހާދިސާތަކުގައި އިންސާފު ނުލިބޭ ކަމަށާއި، ފުލުހުން ދޮގު ހަދައި އޮޅުވާލުމަށް ވަރަށް ބޮޑަށް މަސައްކަތް ކުރާ ކަމަށް ގިނަ އާއްމު ރައްޔިތުން ދަނީ ބުނަމުންނެވެ. އެގޮތުން ފުރާޅެއްގެ މައްޗަށް ވެއްޓިފައި އޮއްވާ ފެނުނު ޔުމްނު ރަޝީދުގެ މައްސަލައާއި، ނ.ހޮޅުދޫ ޒަކިއްޔާ މަރުގެ މައްސަލާގައި ވެސް ފުލުހުން ވަރަށް ބޮޑަށް ކަންތައްތަކެއް ސިއްރުކޮށް ތަހުގީގު އޮޅުވާލުމަށް މަސައްކަތް ކޮށްފައިވާ ކަމަށް ތުހުމަތުކޮށްފައިވެއެވެ.
