ރައީސުލްޖުމްހުރިއްޔާ ޑރ.މުހައްމަދު މުއިއްޒުގެ ވެރިކަމުގައި އަތޮޅުތެރޭގެ ތަރައްގީގެ މަޝްރޫއުތައް ކުރިއަށް ނުދާ ކަމުގެ ޝަކުވާއަކީ މިއަދު އާއްމު ރައްޔިތުންގެ އެންމެ ބޮޑު އެއް ޝަކުވާ އެވެ. ނަމަވެސް މިޝަކުވާތަކަށް މާ ބޮޑު ފަރުވާލެއް އެމަނިކުފާނުގެ އިތުރުން މި ސަރުކާރުގެ ބޭފުޅުން ނުބަހައްޓަވަ އެވެ. ބައެއް ބޭފުޅުން އެކަމަށް ރައްދު ދެއްވައި ވިދާޅުވަނީ ނުފެންނަ ތަރައްގީ ގެނެސް ދެއްވަމުން ގެންދަވާ ވާހަކަ އެވެ. އައު ޚިދުމަތްތައް ތައާރަފްކޮށް ރައްޔިތުންނަށް ކަންކަން ލުއި ކޮށްދޭ ވާހަކަ ތަކެވެ.

މި ގޮތަށް ރައްޔިތުންނަށް މި ސަރުކާރުން ލުއި ކޮށްދިން ކަމަށް ބުނާ އެއް ޚިދުމަތަކީ ޕާސްޕޯޓު ހަދަން މާލެއަށް އަންނަން ނުޖެހި ރަށުގައި ހުރެގެން ޕާސްޕޯޓު ހެދޭނެ ހުރިހާ އިންތިޒާމެއް ހަމަ ޖެހިގެން ދިއުމެވެ. އަދި ރައީސް އަތޮޅުތެރޭގެ ރަށްތަކަށް ކުރައްވާ ދަތުރުފުޅުގައި ވެސް އެންމެ މުހިންމު އެއް އެޖެންޑާ އަކީ ވެސް ބައެއް ރަށްތަކުގައި ޕާސްޕޯޓު ޚިދުމަތް ފެށިގެން ދިއުމާއި، އެކަން އިފްތިތާހު ކުރުމެވެ.

ޕާސްޕޯޓު ހެއްދުމުގެ ޚިދުމަތް ހުރިހާ އަތޮޅެއްގައި ފެށި ކަމަށް ސަރުކާރުން ބުނި ނަމަވެސް، އެއީ ހަގީގަތެއް ނޫނެވެ. މާލެ ފިޔަވައި އެއްވެސް ރަށެއްގައި ޕާސްޕޯޓު ޕްރިންޓެއް ނުކުރެވެ އެވެ.

އެއީ ކުރުން ވެސް އެހައި ރަނގަޅު ކަމެއް ނޫނެވެ. ކޮންމެ ކޮންމެ ބަޔަކަށް އެ ޚިދުމަތް ދިނުމަށް ހަވާލު ކުރުމަކީ ވެސް ގައުމަށް އޮތް ނުރައްކާތެރި ކަމެކެވެ. މިހާރު ވެސް ގައުމުތަކުގައި ފޯޖު ކޮށްގެން ޕާސްޕޯޓު ހައްދާއިރު، ރާއްޖެ ފަދަ ގައުމެއްގައި މިގޮތަށް މިކަން ކޮށްފިނަމަ ގައުމު ހުށަހެޅިގެން އެ ދަނީ ވަރަށް ބޮޑު ނުރައްކަލަކަށެވެ. ޕާސްޕޯޓު ހެއްދުމަކީ އާދައިގެ މަސައްކަތެއް ނޫން ކަމަށްވާއިރު، ޕާސްޕޯޓު ޕްރިންޓުކުރާ މަރުކަޒަކީ ބައިނަލްއަގުވާމީ މިންގަނޑުތަކަށް ވަކި ގޮތަކަށް ހުންނަންޖެހޭ ތަނަކަށް ވާން ޖެހެ އެވެ.

ނަމަވެސް ރައީސް މުއިއްޒުގެ ވައުދުފުޅަކަށް ވާތީ، ބައެއް ރަށްރަށުގައި ކައުންސިލްތަކުން ވަނީ ސަރުކާރުން އަންގައިގެން ގާތްގަނޑަކަށް ފަސް ލައްކަ ރުފިޔާ ހަރަދު ކޮށްގެން ޚާއްސަ ތަނެއް އިމާރާތްކޮށް، ބައެއް ސާމާނު ހޯދާފަ އެވެ. އަދި މިއީ މި ސަރުކާރުން ކުރި ވަރަށް ބޭކާރު ހަރަދެއް ކަމަށް އެ ރަށްރަށުގެ ރައްޔިތުން ދަނީ ބުނަމުންނެވެ.

މި ސަރުކާރުން މިފަދަ ބޭކާރު އެތައް ހަރަދެއް ކުރަމުންދާއިރު، ޕާސްޕޯޓު ހެއްދުން މުޅި ރާއްޖެއަށް ފުޅާކުރުމުގެ މަޝްރޫއު 16 ނޮވެމްބަރު 2024 ގައި ފަށައި، 7 އޮކްޓޫބަރު 2025 ގައި ހުރިހާ އަތޮޅެއްގައި ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމުގެ ޚިދުމަތް ފޯރުކޮށް ދިނުމާއި، ޕާސްޕޯޓުގެ ޚިދުމަތް ފޯރުކޮށްދިނުމުގެ މަޝްރޫއު ކާމިޔާބުކަމާއެކު ތަންފީޒުކޮށް ނިމުން ފާހަގަ ކޮށްފައިވެ އެވެ. އަދި އދ. މަހިބަދޫ ރައްޔިތުންނާއެކު ބޭއްވެވި ބައްދަލު ކުރެއްވުމުގައި ރައީސް މުއިއްޒަށް ހަނދާނީ ފިލައެއް ވެސް ވަނީ އަރުއްވާފަ އެވެ. މި ހަނދާނީ ފިލާ ހަވާލު ކޮށްދެއްވީ ހޯމް މިނިސްޓަރު އަލީ އިހުސާނެވެ.

ވަރަށް ބޮޑު މަޝްރޫއެއްގެ ގޮތުގައި މި ސަރުކާރުން މިކަން ފާހަގަ ކުރަމުން ދިޔަ ނަމަވެސް މީގެ ކުރިން ވެސް ރަށްރަށުގައި ތިބެގެން ޕާސްޕޯޓަށް ހުށަހެޅެ އެވެ. އަދި ރަށްރަށުގެ އޮފީސް މެދުވެރިކޮށް ޕާސްޕޯޓު ލިބޭ ގޮތަށް އިންތިޒާމްތައް ވަނީ ހަމަ ޖައްސާފަ އެވެ. މިއީ އަލަށް ރައްޔިތުންނަށް ލިބިގެން އުޅޭ ޚިދުމަތެއް ނޫނެ އެވެ. މީގެ ކުރިން ވެސް ރައްޔިތުން އެ ޚިދުމަތް ހޯދުމަށް މަސައްކަތް ކުރި ގޮތަށް މިއަދު ވެސް މަސައްކަތް ކުރަން ޖެހެ އެވެ.

ތަފާތަކީ ކުރީ ސަރުކާރުތަކުގައި މި ޚިދުމަތް ދިން ނަމަވެސް ބޮޑު މަޝްރޫއެއްގެ ގޮތުގައި ފާހަގަ ނުކުރާތީ އެވެ.