މީޑިއާ ކޮންޓްރޯލު ބިލާއި ގުޅޭގޮތުން މަޖިލިހުން މީޑިއާތަކަށް ދިނީ ކޮންޓްރޯލްކޮށްގެން ހަނި ފުރުސަތެއް!
ބިލު ޑްރާފްޓް ކޮށް މަޖިލީހަށް ހުށަހެޅީ މީޑިއާ ތަކަށް ޚިޔާލު ހުށަހެޅުމަށް އެއްވެސް ފުރުސަތެއް ދިނުމެއް ނެތި
ނޫސްވެރިން މުލިއާގެ ކައިރިއަށް އެއްވުން
މީޑީއާ ކޮންޓްރޯލް ކުރާ ގޮތަށް ފަރުމާކޮށްފައިވާ، މޯލްޑިވްސް މީޑިއާ އެންޑް ބްރޯޑް ކާސްޓިންގ ރެގިއުލޭޝަންގެ ބިލާއި ގުޅޭގޮތުން މީޑިއާތަކާއި ބައްދަލުކުރުމަށް މަޖިލީހުން ކޮންޓްރޯލު ކޮށްގެން ހަނި ފުރުސަތެއް ދީފިއެވެ.
މަޖިލީހުން ބުނީ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ދިރާސާ ކުރަމުން ގެންދާ " މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލް" އާއި ގުޅޭ ގޮތުން ދިވެހިރާއްޖޭގައި ރަޖިސްޓަރކޮށްފައިވާ މީޑިއާތަކާއި އެކު މަޝްވަރާ ކުރެއްވުމަށްޓަކާ 1 ސެޕްޓެމްބަރ ވާ ހޯމަ ދުމަހުގެ 11:00ގައި ރައްޔިތުންގެ މަޖިލީހުގެ އިދާރާގައި މަޝްވަރާ ބައްދަލުވުމެއް ބާއްވަން ނިންމާފައިވާ ކަމަށެވެ.
އެ މަޝްވަރާ ބައްދަލުވުމުގައި ދިވެހިރާއްޖޭގައި ރަޖިސްޓަރކޮށްފައިވާ މީޑިއާތަކުން ބައިވެރިވުމަށް މިނިވަން މުއައްސަސާތަކާއި ބެހޭ ކޮމިޓީން ވަނީ އިއުލާނެއް ކޮށްފައެވެ. އާއްމުކޮށް މިފަދަ ބިލްތަކާއި ގުޅޭ ގޮތުން މީޑިއާތަކާއި ވަކިވަކިން ބައްދަލުކުރި ނަމަވެސް މި ބިލާއި މެދު ބައްދަލުވުމެއް ބާއްވަން ނިންމާފައި މި ވަނީ ހުރިހާ މީޑިއާ އެއް ހިމެނޭ ގޮތަށެވެ. އަދި ކޮންމެ މީޑިއާއަކުން ފުރުސަތު ދީފައި ވަނީ ވެސް އެންމެ މީހަކަށެވެ. ހަމައެހެންމެ ފުރުސަތު ލިބޭ މީހާ އަށް ވެސް އެ ފުރުސަތު ދެނީ ރަޖިސްޓްރީ ވެގެން ވަރަށް ބޮޑަށް ކޮންޓްރޯލް ކޮށްގެން ކުރިއަށް ގެންދާ ގޮތަކަށް ކަން ފާހަގަ ކުރެވެއެވެ.
ބައްދަލުވުމަށް ދާން ބޭނުންވާ މީޑިއާތަކުން ރަޖިސްޓްރޭޝަން ފޯރމް ފުރިހަމަ ކުރުމަށް ފަހު 31 އޮގަސްޓް 2025ގެ 10:00ގެ ކުރިން ނަން ފޮނުވުމަށް މަޖިލީހުގެ އިދާރާ އިން ވަނީ އެދިފައެވެ.
ނޫސްވެރިންނާއި މީޑިއާ ތަކުގެ ބޮޑެތި ކަންބޮޑުވުންތަކެއް ހުރި މި ބިލާ މެދު ޚިޔާލު ހުށަހަޅަން މިފަދަ ހަނި ފުރުސަތެއް ދީގެން ބައްދަލުކުރާ ސަބަބާއި މެދު ސުވާލު އުފެދެއެވެ. އަދި ފުޅާ ދާއިރާ އެއްގައި ބަހުސް އަށް ހުޅުވާލުމުގެ ބަދަލުގައި އަވަސް އަރުވާލައިގެން ބިލު ފާސްކުރުމަށް ސަރުކާރުން މަސައްކަޔް ކުރާ މަންޒަރު ދަނީ ފެންނަމުންނެވެ.
ކަމާ ބެހޭ ބައިނަލްއަގްވާމީ ޖަމާއަތްތަކުން ގޮވާލާފައިވަނީ މި ބިލު މަޖިލިހުން ބޭރު ކުރުމަށެވެ.
ބިލު ޑްރާފްޓް ކޮށް މަޖިލީހަށް ހުށަހެޅީ މީޑިއާ ތަކަށް ޚިޔާލު ހުށަހެޅުމަށް އެއްވެސް ފުރުސަތެއް ދިނުމެއް ނެތިއެވެ.
