ކުޑަކުދިންނަށް ޖިންސީ ގޯނާކުރުމުގެ ބޮޑު ރިންގެއް ހިންގި އެޕްސްޓީން އާ، ރާއްޖޭގެ ކުރީގެ ރައީސަކު ބައްދަލުކުރަން ހަމަޖެއްސި!
އިހުދު ބަރާކަށް ފޮނުވި އީމެއިލެއްގައި އެޕްސްޓީން ވަނީ ނިއުޔޯކްގައި މެއި 19 ގައި ބާއްވާ ބައްދަލުވުމެއްގައި ޕީޓަރ ތިއެލްގެ އިތުރުން "ދިވެހިރާއްޖޭގެ ކުރީގެ ރައީސަކު" ބައިވެރިވާނެ ކަމަށް
ކުޑަކުދިންނަށް ޖިންސީ ގޯނާ ކުރުމުގެ ބޮޑު ރިންގެއް ހިންގި ޖެފްރީ އެޕްސްޓީން
ކުޑަކުދިންނަށް ޖިންސީ ގޯނާކުރުމުގެ ބޮޑު ރިންގެއް ހިންގި އެމެރިކާގެ މިލިއަނަރު ޖެފްރީ އެޕްސްޓީން އާއި ރާއްޖޭގެ ކުރީގެ ރައީސަކާ އެކު ބައްދަލުވުމެއް ތާވަލުކުރިކަން އިންޓަނެޓުގައި ލީކުކޮށްލި އީމެއިލްތަކަކުން ހާމަވެއްޖެ އެވެ.
އިޒްރޭލުގެ ކުރީގެ ބޮޑުވަޒީރު އިހުދު ބަރާކްގެ އީމެއިލްތަކެއް ޓެލެގްރާމްގައި ލީކުކޮށްލުމާ ގުޅިގެން މި މަޢުލޫމާތު ވަނީ ހާމަވެފަ އެވެ. މި އީމެއިލްތައް ލީކުކުރި ކަމަށް ބެލެވެނީ އީރާންގެ އިންޓެލިޖެންސް ހިދުމަތްތަކާ ގުޅުން އޮތް ހެކަރުންގެ ގްރޫޕަކުންނެވެ. ލީކުކޮށްލި އީމެއިލްތަކުގެ ތެރޭގައި 2007 އިން 2016 އަށް އިހުދު ބަރާކް ކޮށްފައިވާ އެއްލައްކައަށްވުރެ ގިނަ އީމެއިލް ހިމެނެ އެވެ.
އެޕްރީލް 28، 2014 ގައި އިހުދު ބަރާކަށް ފޮނުވި އީމެއިލެއްގައި އެޕްސްޓީން ވަނީ ނިއުޔޯކްގައި މެއި 19 ގައި ބާއްވާ ބައްދަލުވުމެއްގައި ޕީޓަރ ތިއެލްގެ އިތުރުން "ދިވެހިރާއްޖޭގެ ކުރީގެ ރައީސަކު" ބައިވެރިވާނެ ކަމަށް ބުނެފައެވެ. ނަމަވެސް މި ބައްދަލުވުން އޮތްކަން ނުވަތަ ނޫންކަން މިހާތަނަށް ކަށަވަރުކުރެވިފައެއް ނުވެއެވެ. އަދި އޭނާ އެ ބުނި ރައީސަކީ ކާކުކަން އީމެއިލްގައި ހާމަކޮށްފައެއް ނުވެ އެވެ.
އެ ދުވަސްވަރު ދިވެހިރާއްޖޭގައި ތިއްބަވާނީ ރައީސްކަން ކުރައްވާފައިވަނީ ތިން ބޭފުޅެކެވެ. އެއީ ކުރީގެ ރައީސް މައުމޫން އަބްދުލްގައްޔޫމް، ކުރީގެ ރައީސް މުހައްމަދު ނަޝީދު އަދި ކުރީގެ ރައީސް މުހައްމަދު ވަހީދެވެ. ނަމަވެސް އީމެއިލްގައި ވަކި ރައީސެއްގެ ނަމެއް ހާމަކޮށްފައެއް ނުވެއެވެ.
2006 ގައި އެޕްސްޓީންގެ މައްޗަށް ކުޑަކުދިންނަށް ޖިންސީ ގޯނާކުރުމުގެ ދަޢުވާ އުފުލުނީއްސުރެ، އޭނާގެ މައްސަލައާ ގުޅޭ ގޮތުން އެކި ވާހަކަތައް ދެކެވެމުން އައެވެ. 2019 ގައި އިތުރު ދަޢުވާތަކެއް އުފުލުމާ ގުޅިގެން އޭނާ ވަނީ ޖަލުގައި އަމިއްލައަށް މަރުވެފައެެވެ. ދާދި ފަހުން، އެމެރިކާގެ އެޓަރނީ ޖެނެރަލް އެޕްސްޓީންގެ "ކްލައެންޓް ލިސްޓެއް" އޮތް ކަމަށް ބުނުމާ ގުޅިގެން މި މައްސަލައިގެ އިތުރު ހަގީގަތްތައް ހާމަވާން ވަނީ ފަށާފަ އެވެ.
އެޕްސްޓީންގެ ނިއުޔޯކްގެ ގެއަށާއި އެހެނިހެން ތަންތަނަށް ގޮސްއުޅުނު ކަމަށް ބުނާ ގިނަ އަދަދެއްގެ މީހުންގެ ނަންތައް މިހާރު ވަނީ އާންމުވެފައެވެ. މިއަހަރުގެ ޖުލައި މަހު، ވޯލް ސްޓްރީޓް ޖާނަލްއިން އެމެރިކާގެ ރައީސް ޓްރަމްޕް އާއި އެޕްސްޓީންއާ ގާތް ގުޅުމެއް އޮތްކަން ހާމަވާ ސިޓީއެއް ހާމަކުރުމާ ގުޅިގެން، ޓްރަމްޕް ވަނީ އެ ނޫހުގެ މައްޗަށް ދަޢުވާ އުފުލާފަ އެވެ.
އެޕްސްޓީންގެ ކުރީގެ ލޯބިވެރިޔާ ގިސްލޭން މެކްސްވެލްވެސް އަށްވެސްވަނީ ކުޑަކުދިންނަށް ޖިންސީ ގޯނާކުރުމުގައި އެހީތެރިވުމުގެ ކުށުގައި 20 އަހަރުގެ ޖަލު ޙުކުމެއް އިއްވާފައެވެ. މި މައްސަލައިގައި ގިނަ މަޝްހޫރު އަދި ނުފޫޒުގަދަ މީހުންގެ ނަންތައް ގުޅިފައިވާ ކަމަށް ތުހުމަތުކުރެ އެވެ.
