ޚަލީލުގެ ބޮޑު ތުހުމަތެއް ނޫސްވެރިންނަށް: ނޫސްވެރިކަމުގެ ޓެގް އަޅުވައިގެން ތިޔަ ގެންދަނީ މީހުންގެ އަބުރު ކަތިލާ ނަފުސާނީ ކުރަމުން

ދައުލަތުގެ މުޅި ނިޒާމް ރެގިއުލޭޓް ކުރަންޖެހޭ ކަމަށް ވަކާލާތު ކުރާއިރު، ނޫސްވެރި ކަމުގެ ޓެގް އަޅުވައިގެން މީސްމީހުންނާ އާއިލާތަކުގެ އަބުރު ކަތިލާ، ނަފްސާނީ އަނިޔާ ދެމުންދާ ކަމުގެ ތުހުމަތު މި ސަރުކާރުގެ ފޮރިން މިނިސްޓަރ އަބްދުﷲ ޚަލީލް ނޫސްވެރިންނަށް ކޮށްފި އެވެ.

ރާއްޖޭގެ ނޫސްވެރިންނަށް އަމާޒުކުރައްވައި މިފަދައިން ޚަލީލް ވިދާޅުވެފައިވަނީ އެކްސް ގައި ކުރެއްވި ޕޯސްޓެއްގައި އެވެ.

މިނިވަން މީޑިއާ ނެތިކޮށްލުމަށް ސަރުކާރުން ފަހަތުގައި އޮވެގެން ރައްޔިތުންގެ މަޖިލީހަށް ހުށަހަޅާފައިވާ ބިލާ ދެކޮޅަށް ނޫސްވެރިން ގެންދަނީ އިހުތިޖާޖު ކުރަމުންނެވެ. އެގޮތުން ބުދަ ދުވަހާއި ބުރާސްފަތި ދުވަހު ނޫސްވެރިން ދިޔައީ ބިލް ބޭރުކުރުމަށް ގޮވާލައި އަޑު އުފުލައި، ރައީސް ޑރ. މުހައްމަދު މުއިއްޒާއި ވެސް ބައްދަލުކުރުމަށްޑިމާންޑް ކުރަމުންނެވެ.

އެގޮތުން ބުރާސްފަތި ދުވަހު ރައީސް މުއިއްޒު ވަނީ ނޫސްވެރިންނާއި ބައްދަލުކުރައްވާފަ އެވެ. އެހެން ނަމަވެސް ނޫސްވެރިން ރައީސްގެ ކިބައިން އެންމެ ބޭނުންވި ޖަވާބު ލިބިފައެއް ނުވެއެވެ. ނޫސްވެރިން ޑިމާންޑް ކުރީ މިހާރު މަޖިލީހަށް ހުށަހަޅާގފައި އޮތް މީޑިއާ ކޮންޓްރޯލް ކުރާ ބިލު ބޭރުކުރުމަށެވެ. އެކަމަށް ނޫސްވެރިން ރައީސް މުއިއްޒުގެ އަރިހުގައި ތަކުރާރުކޮށް އެދުނު ނަމަވެސް ރައީސް ދެއްވީ ނޫސްވެރިން އެންމެ ބޭނުންވި ޖަވާބެއް ނޫނެވެ. ރައީސް ވިދާޅުވެފައި ވަނީ ބިލް ބޭރުކުރުމާއި މެދު ވިސްނާނެ ކަމުގައެވެ.

ރައީސް މުއިއްޒުގެ ކިބައިން އެންމެ އެދެވޭ ޖަވާބެއް ނުލިބުމުން ނޫސްވެރިންގެ އެމީހުންގެ ޑިމާންޑް ދެމެހެއްޓި އެވެ.

މިކަމާއި ގުޅުވައި ފޮރިންގ މިނިސްޓަރ އަބްދުﷲ ޚަލީލް އެކްސް ގައި ކުރެއްވި ޕޯސްޓުގައި ވަނީ ނޫސްވެރިންގެ ބޮލުގައި ބޮޑެތި ތުހުމަތު ތަކެއް އަޅުއްވާ ވާހަކަދައްކަވާފަ އެވެ.

ޙައްގުތައް ހޯދުމަށް ނުކުތް ބައެއް ނޫސްވެރިން ދައުލަތުގެ އެންމެ މަތީ ވެރިޔާއަށް މިގޮތަށް ފުރައްސާރަކުރުން ހަމަ އެންމެ ރަނގަޅުތޯ؟ މިއީ ޙައްޤުތަކަށް ވަކާލާތުކުރާ ބައެއްގެ އުޅުން ހުންނަންވީ ގޮތްތޯ؟

ފޮރިންގ މިނިސްޓަރ އަބްދުﷲ ޚަލީލް

މިނިސްޓަރެއްގެ މަގާމުގައި ހުންނެވި ބޭފުޅަކު ނޫސްވެރިންނަށް ބޮޑެތި ތުހުމަތުތަކެއް ކޮށް މިފަދަ ދަށުދަރަޖައިގެ ބަސްތައް ރައްދުކޮށް ޕޯސްޓު ކުރުމަކީ ބަލައިގަނެވޭނޭ ކަމެއް ނޫން ކަމަށް ގިނަ ބަޔަކު ދަނީ ބުނަމުންނެވެ.

ޚަލީލް އެންމެ ފުރަތަމަ ވެސް ނޫސްވެރިންގެ ބޮޅުގައި އެޅުވި ތުހުމަތަކީ ރައީސް މުއިއްޒު ފަހަތުން ގޮސް ފުރައްސާރަ ކުރެއްވި ކަމުގެ ތުހުމަތެވެ. ނޫސްވެރިން ރައީސް ފަހަތުން ދުވެ ފުރައްސާރަ ނުކުރާކަމަށް ނޫސްވެރިން ދަނީ ބުނަމުންނެވެ. އަދި ނޫސްވެރިން ކުރީ ޑިމާންޑް ތަކެއް ކަމަށާއި އެއީ ބިލު މަޖިލީހުން ބޭރުކުރުމަށް ކުރި ޑިމާންޑްތަކެއް ކަމަށް ނޫސްވެރިން ބުނެއެވެ.

މީގެ އިތުރުން ޚަލީލް ނޫސްވެރިންނަށް ކުރެއްވި ދެވަނަ ތުހުމަތަކީ ނޫސްވެރިކަމުގެ ޓެގް އަޅުވައިގެން ބައެއް ފަރާތްތަކުން އެކިއެކި މީސްމީހުންނާ އާއިލާތަކުގެ އަބުރު ކަތިލާ، ނަފްސާނީ އަނިޔާ ކުދި ދަރިންނަށް ދޭ ކަމުގެ ތުހުމަތެވެ. މިއީ ނޫސްވެރިން ނުހަނު ކަންބޮޑުވާ ތުހުމަތެއް ކަމަށް އެ ފަރާތްތަކުން އަންނަނީ ބުނަމުންނެވެ.

ޚަލީލް މިފަދައިން ޕޯސްޓުކޮށް ނޫސްވެރިންގެ ބޮލުގައި މިވަރުގެ ތުހުމަތުތަކެއް އެޅުވިއިރު، ނޫސްވެރިކަމުގެ ޓެގް އަޅުވައިގެން އަބުރުކަތިލާ، ނަފުސާނީ އަނިޔާދިނީ ކޮން ބަޔަކަށް ކަން ބުނެދޭން ޖެހޭކަމަށް ނޫސްވެރިން ދަނީ ބުނަމުންނެވެ.

އެހެން ނޫން ނަމަ މިފަދަ ވާހަތަކެއް މިނިސްޓަރެއްގެ މަގާމުގައި ހުރި ބޭފުޅަކު ލިޔުއްވުމަކީ ވަރަށް ދެރަވަރު، އަދި ހިތާމަ ކުރަން ޖެހޭ ކަމެއްކަމަށް ވެސް ނޫސްވެރިން ބުނެފައި ވެއެވެ.