އިސްރާއީލް އިން ޣައްޒާގައި ކުރިއަށް ގެންދާ ހަނގުރާމައިގެ ސަބަބުން، ޣައްޒާގެ ކުޑަ ކުދިން ބަނޑަށް ޖެހިފައިވާއިރު، އެ ކުދިންގެ ގައިގައި ރޯނެ ބާރު ނުވަތަ ހިތްވަރު ނެތް ކަމަށް، އިންސާނީ އެހީގެ ޖަމިއްޔާތަކުން ބުނެފި އެވެ.

ބުދަ ދުވަހު ސޭވް ދަ ޗިލްޑްރަންގެ އިސްވެރިން ދެއްކެވި ވާހަކައިގައި ވަނީ، ޣައްޒާގައި ކުޑަ ކުދިން ބަނޑަށް ޖެހި، އެތައް ކުދިންނެއް ޝަހީދުވަމުން އަންނަ މަންޒަރު ތަފްސީލުކޮށް ބަޔާން ކޮށްދީފަ އެވެ. އެ ޖަމިއްޔާގެ ރައީސް އިންގާ އަޝިން ވިދާޅުވެފައިވާ ގޮތުގައި، ޣައްޒާގެ ކުޑަ ކުދިން ވަނީ އެހާ ވެސް ބޮޑަަށް ބަލިކަށިވެފަ އެވެ. އެކަމުގެ ސަބަބުން އެ ކުދިންގެ ގައިގައި ރޯނެ ބާރު، ނުވަތަ ހިތްވަރު ނެތް ޙާލަތަށް ގޮސްފައިވާ ކަމަށް އޭނާ ވިދާޅުވި އެވެ.

އދ ގެ ސަލާމަތީ މަޖިލީހުގެ ބައްދަލުވުމެއްގައި ވާހަކަ ދައްކަވަމުން އަޝިން ވިދާޅުވީ، ޣައްޒާގައި ބަނޑުހައި ހޫނުކަން އިންތިހާ އަށް ބޮޑުވެފައިވާ ކަމަށާއި، އދ އިން ފާއިތުވި ހަފުތާގައި ކޮށްފައިވާ އިއުލާނަކީ ހަމައެކަނި ޓެކްނިކަލް ބަހެއް ނޫން ކަމަށެވެ. އެއީ އެއަށް ވުރެ ބޮޑު، ނުރައްކާތެރި އަދި ވޭން ހުރި ޙާލަތެއް ކަމަށް އޭނާ ވިދާޅުވެފައިވެ އެވެ.

ބަނޑުހައި ހޫނު ކަމުގެ ހަގީގަތް ސިފަ ކޮށްދެއްވަމުން އޭނާ ވިދާޅުވީ، ކާބޯ ތަކެތި ނުލިބުމުގެ ސަބަބުން އެތައް ހާސް ކުޑަ ކުދިންނެއް ވަރަަށް ބޮޑަށް ނިކަމެތިވެފައިވާ ކަަމަށެވެ. އެކަމުގެ ވޭނުގައި ތަހަންމަލު ކުރުމަށް ފަހު އެ ކުދިން ޝަހީދުވަމުން އަންނައިރު، އެއީ ވެސް ވޭން ހުރި ކަމެއް ކަމަށް އޭނާ ވިދާޅުވި އެވެ. އަދި އެ ވަގުތު ތަކުގައި ވެސް އެ ކުދިންގެ ޙާލަތު ފެންނަނީ އިންތިހާ އަސަރުވެރި ގޮތަކަަށް ކަމަށް އޭނާ ފާހަގަ ކުރެއްވި އެވެ.

އިތުރަށް ވާހަކަ ދައްކަވަމުން އޭނާ ވިދާޅުވީ، ބަނޑުހައި ހޫނު ކަމުގެ ސަބަބުން ކުޑަ ކުދިން ޝަހީދުވަމުން އަންނައިރު، އެ ކުދިންގެ މަސްތަކާއި މުހިންމު އެތައް ގުނަވަންތަކެއް ހަލާކު ވަމުން ވެސް ދާ ކަމަށެވެ. މީގެ އިތުރުން ކްލިނިކް ތަކުން ވެސް ފެންނަނީ މުޅިން ހަމަހިމޭން ކަމުގެ މަންޒަރު ކަމަށާއި، ކުޑަ ކުދިންގެ ކިބައިގައި ވާހަކަ ދެއްކުމުގެ ބާރު ވެސް ނެތް ކަމަަށް އޭނާ ވިދާޅުވި އެވެ.

އިސްރާއީލް އިން ޣައްޒާގައި ކުރިއަށް ގެންދަމުން އަންނަ ހަނގުރާމައިގައި އެތައް ހާސް ހަމަލާތަކެއް ދީފައިވާއިރު، ޣައްޒާގެ ރައްޔިތުންނަށް ބޭނުންވާ އިންސާނީ އެހީ އާއި ކާބޯ ތަކެތި ފޯރުކޮށްދިނުމަށް ވެސް އިސްރާއީލް އިން ވަނީ ހުރަސް އަޅައިފަ އެވެ. މީގެ އިތުރުން މި ހަނގުރާމައިގައި ޝަހީދު ވަމުން އަންނަ މީހުންގެ ތެރޭގައި ގިނަ އަދަދެއްގެ ކުޑަ ކުދިން ވެސް ހިމެނެ އެވެ.

އދ އިން ވަނީ ޣައްޒާގައި ބަނޑުހައި ހޫނުކަން ފެތުރިފައިވާ ކަމަށް ރަސްމީކޮށް އިއުލާން ކޮށްފަ އެވެ. އެގޮތުން ޣައްޒާގެ ފަސް ލައްކަ އަށް ވުރެ ގިނަ ރައްޔިތުންނަަށް ބަނޑުހައި ހޫނުކަން ކުރިމަތިވެފައިވާއިރު، ކުރިއަށް އޮތް ސެޕްޓެމްބަރު މަހުގެ ތެރޭގައި އެ އަދަދު އިތުރު ވާނެ ކަމަށް ވެސް ވަނީ ލަފާ ކޮށްފަ އެވެ.