މިނިވަން މީޑިޔާ ނެތިކޮށްލުމުގެ މަކަރުވެރި މަގުސަދުގައި މަޖިލީހަށް ހުށަހަޅާފައިވާ ބިލާ ދެކޮޅަށް، ދިވެހި ނޫސްވެރިން މުލިއާގެ ކައިރީގައި މުޒާހާރާ ކޮށްފިއެވެ.

ބުދަ ދުވަހު ހެނދުނު އެންމެ ފުރަތަމަ ނޫސްވެރިން މުޒާހަރާ އަށް އެއްވެފައި ވަނީ ރައްޔިތުންގެ މަޖިލިސް ކައިރިއަށެވެ. ނޫސްވެރިންގެ ކަންބޮޑުވުންތަކަށް ބެލުމެއް ނެތި އެ އެ ބިލް ބަލައިގަތުމަށް މަޖިލީހުން ފާސްކުރުމުން ނުރުހުން ފާޅުކުރުމަށް ރައީސް އޮފީސް ކައިރިއަށް ނޫސްވެރިން ވަނީ އެއްވެފައެވެ. އިދިކޮޅު މެންބަރުން އިހުތިޖާޖު ކުރަމުން ދަނިކޮށް ނެގި ވޯޓުގައި މި ބިލު ބަލައިގަތީ ސަރުކާރު ހިންގާ ޕީއެންސީގެ މެޖޯރިޓީ އާއެކު އެވެ. ބިލާ އެއްކޮޅަށް 49 މެންބަރުން ވޯޓު ދެއްވިއިރު ބިލު ބަލައިނުގަންނަން 12 މެންބަރުން ވޯޓު ދެއްވި އެވެ.

ބުދަ ދުވަހު އެ ސަރަހައްދުން ފުލުހުން ހަތަރު ނޫސްވެރިން ހައްޔަރުކުރި ނަމަވެސް ފުލުހުންގެ ވެހިކަލްގައި އެ މީހުން ބޭތިއްބުމަށް ފަހު، އެ ނޫސްވެރިން ވަނީ ދޫކޮށްލާފައެވެ.

އެ ތަނުން ދެން ނޫސްވެރިން އެއްވީ މުލިއާގެ ދޮރު މައްޗަށެވެ. އެ ސަރަހައްދަށް އެއްވެ ނޫސްވެރިން ގޮވާލީ އެ ބިލް ފާސްނުކުރުމަށެވެ. ނޫސްވެރިންގެ ޑިމާންޑަކީ ރައީސް ޑރ. މުހައްމަދު މުއިއްޒު، ނޫސްވެރިންނާ ބައްދަލު ކުރެއްވުމަށެވެ. އެތަނުގައި ގަޑި އެއް ހާއިރު ވީ އިރު ވެސް ރައީސް މުއިއްޒު ނޫސްވެރިންނަށް އިޖާބަ އެއް ނުދެއްވައެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގެ ނަމުގައި މަޖިލީހަށް ބިލު ހުށަހެޅުއްވީ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރެވެ.