ޔާމީން ފަތުރައްވުމުން ގެންދަވަނީ ހަގީގަތާ ހިލާފު ވާހަކަތަކެއް ކަމަށް ވިދާޅުވެ، ގާސިމް ޔާމީނަށް ހޫނު ރައްދެއް ދެއްވައިފި
24 އޯގަސްޓު 2025 | އާދީއްތަ 14:42އެއަރޕޯޓު އަތުލުމަށް ފަހު ގާސިމަށް ބަދަލެއް ދޭން އުޅޭ ވާހަކަ ޔާމީން ހާމަކުރެއްވީ ބުރާސްފަތި ދުވަހުގެ ރޭ އާޓިފިޝަލް ބީޗުގައި "ވޭކް އަޕް"ގެ ނަމުގައި ބޭއްވި ޖަލްސާގަ
ގާސިމް އިބްރާހިމް އާއި ކުރީގެ ރައީސް ޔާމީން
ވިލާ އެއަރ ޕްރައިވެޓް ލިމިޓެޑަށް ދޫކޮށްފައި އޮތް ގދ. ކާޑެއްދޫ އެއަރޕޯޓު ސަރުކާރުން ބޭނުން ވެގެން ދޫކޮށްލަން ނިންމި ނިންމުމާއި، އޭގެ ބަދަލާ ގުޅޭ ގޮތުން ކުރީގެ ރައީސް އަބްދުﷲ ޔާމީން ފަތުރައްވަމުން ގެންދަވަނީ ހަގީގަތާ ހިލާފު ވާހަކައެއް ކަމަށް ވިދާޅުވެ ޔާމީނަށް ހޫނު ރައްދެއް ދެއްވައިފި އެވެ.
އެއަރޕޯޓު އަތުލުމަށް ފަހު ގާސިމަށް ބަދަލެއް ދޭން އުޅޭ ވާހަކަ ޔާމީން ހާމަކުރެއްވީ ބުރާސްފަތި ދުވަހުގެ ރޭ އަރޓިފިޝަލް ބީޗުގައި "ވޭކް އަޕް"ގެ ނަމުގައި ބޭއްވި ޖަލްސާގަ އެވެ. ޔާމީންގެ ވާހަކަ އަށް ރައްދު ދެއްވުމުގެ ގޮތުން ގާސިމް ވަނީ ރައީސް އޮފީހުގެ ސިޓީ އެކްސްގައި ޕޯސްޓުކުރަށްވާފަ އެވެ. އަދި އެއަށް ފަހު ހަތަރު ސަފުހާގެ ބަޔާނެއް ރޭ ވަނީ ނެރުއްވައިފަ އެވެ.
ގާސިމް އިބްރާހިމް ނެރުއްވި ބަޔާނުގައި ވިދާޅުވީ، ސަރުކާރާއެކު އެއާރޕޯޓު ކުއްޔައްދޭ މުއްދަތު 99 އަހަރަށް ބަދަލުކުރުމަށް އެދިފައިވަނިކޮށް ރައީސް ޔާމީން ވަނީ އެކިއެކި ބަހަނާތައް ދައްކަވާ ސިވިލް އޭވިއޭޝަން ގެ މިންގަނޑުތަކަށް ނުފެތޭކަމަށް ބަޔާންކޮށް މައްސަލަތަކެއް ފެންމަތިކޮށް، ވިލާ ގްރޫޕްގެ ޕާރމިޓްތައް ކެންސަލްކޮށް، އިމްޕޯޓް ލައިސަންސް ބާތިލުކޮށް، އަދި އެކައުންޓްތައް ފްރީޒްކުރުމުގެ ސަބަބުން އެތަކެއް ހާސް މުވައްޒަފުންނަށް މުސާރަ ނުދެވޭފަދަ ދަތި ދުވަސްތަކެއް ކުރިމަތިވި ކަމަށެވެ. އަދި 2018 ގެ ރިޔާސީ އިންތިޚާބު ނިމެންދެން މި އަނިޔާވެރިކަމުގެ ވޭން ތަހައްމަލު ކުރަން ޖެހުނު ކަމަށް ވެސް ފާހަގަކުރައްވާފައިވެއެވެ.
ގާސިމް ވިދާޅުވީ، ކޫއްޑޫ އެއަރޕޯޓް ސަރުކާރަށް ނަގަނީ ނުހައްގު ބަދަލެއް ދީފައި ކަމަށް ޔާމީން ވިދާޅުވަމުން ގެންދަވަނީ އޭނާގެ ޢާންމު އުސޫލުން، ރައްޔިތުންނަށް މައްސަލައިގެ ހަގީގަތް އޮޅުވާލާފައި ކަމަށް ގާސިމް ވިދާޅުވި އެވެ. އަދި ޔާމީން އަކީ ޒާތީ ހަސަދަވެރިއެއް ކަމަށާއި އެއްފަހަރަށްވުރެ ގިނަފަހަރު "ޤާސިމް ލުބޯ ކިބައެއްހެން ފެލާލާނެ" ކަމަށް ޔާމީން ވިދާޅުވެފައިވާ ކަމަށް ގާސިމް ގެ ބަޔާނުގައި ވިދާޅުވެފައި ވެއެވެ.
އަޅުގަނޑު އޭނާ އަށް ތާއީދު ކުރީ އެއީ ކާކުކަން އަޅުގަނޑަށް ނޭންގިހުރެގެންނެއް ނޫން، ނަމަވެސް ކުރީގެ ރައީސް މައުމޫންގެ އެދިލެއްވުމާއި އަދި ހަރުކުލައިގެ ކިތަންމެ ބަޔަކު ކުރި އާދޭހުގެ ސަބަބުން އޭރު އޮތް ހާލަތުން ގައުމަށް ހެޔޮގޮތް އެދިގެންގާސިމް އިބްރާހިމް
ގާސިމް ވިދާޅުވީ މިއީ ވިލާ ކުންފުންޏާއި އޭނާގެ އަގު ވައްޓާލަން ޔާމީން މަސައްކަތް ކުރެއްވި ފުރަތަމަ ފަހަރެއް ނޫން ކަމަށެވެ. އަދި ރޭގަނޑެއްގެ ފުރަ ދަންވަރު ރާއްޖޭގެ ކްރިމިނަލް ކޯޓު ހުޅުވައި ގާސިމް އައިސީޔޫގެ އެނދުގައި އެނދުމަތިކޮށްފައިވަނިކޮށް ގާނޫނުއަސާސީއާއި ހިލާފު ހުކުމެއްް ކުރުވި ބޭފުޅަކު ގާސިމް އާއި އޭނާގެ އާއިލާއާއި މެދު ކޮށްފައި ނުކުރާނޭ އެއްކަމެއްވެސް މި އުޑުދަށުގައި ނުވާނެ ކަމަށްވެސް ގާސިމް ވިދާޅުވި އެވެ.
ޔާމީނަކީ މީހެއްގެ މައްޗަށް ނުރުހިއްޖެނަމަ އެމީހަކާ މެދު ކޮންމެ ފަދަކަމެއްވެސް ހިންގަފާނެ މީހެއްކަން އޭނާގެ ވެރިކަމުގެ މުއްދަތުގައި ދިވެހި މުޅި ގައުމަށް ސާފުވެގެން ގޮސްފައިވާ ކަމަށް ވެސް ގާސިމް ވިދާޅުވި އެވެ.
ގާސިމްގެ ބަޔާނުގައި ވާގޮތުން، ޔާމީންގެ ވެރިކަމުގައި އެއަރޕޯޓު އަތުލީ ރާއްޖޭން ބޭރުގެ ޕާޓްނަރައަކާ އެކު ކާޑެއްދޫ އެއަރޕޯޓް ބައިނަލްއަގުވާމީ އެއަރޕޯޓަކަށް ބަދަލުކުރުމަށް 150 މިލިއަން ޑޮލަރުގެ ޕްލޭނެއް ކޮށް، އެއަރޕޯޓުގެ ކުލީގެ މުއްދަތު 99 އަހަރަށް ބަދަލުކުރުމަށް އެދިފައި ވަނިކޮށެވެ.
އަދި އެކި ބަހަނާތައް ދައްކާ ސިވިލް އޭވިއޭޝަން ގެ މިންގަނޑުތަކަށް ނުފެތޭކަމަށް ބަޔާންކޮށް މައްސަލަތަކެއް ފެންމަތިކޮށް، ކާޑެއްދޫ އެއަރޕޯޓް އަދުލުވެރި ބަދަލެއް ދިނުމެއް ނެތި، 2017 ވަނަ އަހަރު ދިވެހި ފުލުހުން މެދުވެރިކޮށް ވިލާ އެއަރ އަތުން އެއަރޕޯޓް ސަރުކާރުން އަތުލި ކަމަށް ގާސިމް ވިދާޅުވި އެވެ.
އެކަން އެގޮތަށް ކުރީ އޭރުގައި ސަރުކާރުން ރާއްޖޭގެ ސިޔާސީ ލީޑަރުން ޖަލަށް ލަމުން ދިއުމުން އެކަމުގައި ބަސްބުނި ހިސާބުން ކަމަށް ވެސް ގާސިމް ވިދާޅުވި އެވެ.
