އެމެރިކާގެ މުދަލުން ނަގަމުން ދިޔަ ގިނަ ޓެރިފްތައް ނެގުމަށް ހުއްޓާލަން ކެނެޑާ އިން ނިންމައިފި

އެމެރިކާގެ މުދާ ތަކުން ނަގަމުން ދިޔަ ޓެރިފްތަކުގެ ތެރެއިން، ގިނަ ޓެރިފްތަކެއް ނެގުމަށް ހުއްޓާލަން ނިންމާފައިވާ ކަމަށް، ކެނެޑާގެ ބޮޑު ވަޒީރު މާކް ކާނީ ވިދާޅުވެއްޖެ އެވެ.

އެމެރިކާ އާއެކު އައު ވިޔަފާރި އަދި ސަލާމަތީ ގުޅުން ޚަރުދަނާ ކުރުމަށްޓަކައި، އެމެރިކާގެ މުދަލުން ނަގަމުން ދިޔަ ގިނަ ޓެރިފްތައް ނެގުން ހުއްޓާލާނެ ކަމަށް ބޮޑު ވަޒީރު ކާނީ ވިދާޅުވި އެވެ. މިއީ ކެނެޑާ އާއި އެމެރިކާގެ ވިޔަފާރީގެ ގުޅުން އިތުރަށް ވަރުގަދަ ކުރުމަށް އެޅޭ މުހިންމު ފިޔަވަޅެއްގެ ގޮތުގައި ގިނަ ބަޔަކު ވަނީ ފާހަގަ ކޮށްފަ އެވެ.

އޮޓާވާގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ބޮޑު ވަޒީރު ކާނީ ވިދާޅުވީ، އެމެރިކަގެ އޮޓޯމޮބައިލް، ދަގަނޑު، އެލުމިނިއަމްގެ މައްޗަށް ނަގަމުންދާ ޓެރިފްތައް މިވަގުތަށް ދެމެހެއްޓޭނެ ކަމަށެވެ.

ނަމަވެސް، ޔޫއެސްއެމްސީއޭ (ޔުނައިޓެޑު ސްޓޭޓްސް-މެކްސިކޯ-ކެނެޑާ) އެއްބަސްވުމުގެ ދަށުން ހިމެނޭ އެހެނިހެން މުދަލުގެ ޓެރިފްތައް ނެގުން ހުއްޓާލާނެ ކަމަަށް ވިދާޅުވެފައިވެ އެވެ.

ކާނީ ވިދާޅުވީ ޔޫއެސްއެމްސީއޭ އެއްބަސްވުމާ އެއްގޮތަށް އަމަލު ކުރާ ކެނެޑާގެ މުދަލުގެ މައްޗަށް އިތުރު ޓެރިފްތަކެއް ނުނަގާނެ ކަމަށް، އެމެރިކާ އިން މި ފަހަކަށް އައިސް ވަރަށް ސާފުކޮށް އަންގާފައިވާ ކަމަށެވެ. އަދި އެއީ ވަރަށް ބޮޑު އެދެވޭ ކުރިއެރުމެއް ކަމަށް ވެސް އޭނާ ވިދާޅުވި އެވެ.

ބޮޑު ވަޒީރު ކާނީ އިތުރަށް ފާހަގަ ކުރެއްވި ގޮތުގައި، އެ ނިންމުމާާ ގުޅިގެން ކެނެޑާ އައި އެމެރިކާގެ ދެމެދުގައި ގިނަ މުދަލުގެ މިނިވަން ވިޔަފާރި އަލުން ޤާއިމު ކުރެވިގެން ދާނެ ކަމަށެވެ. އަދި އެހެން ވިޔަފާރި ބައިވެރިންނާ އަޅާ ބަލާއިރު، ކެނެޑާގެ އެކްސްޕޯޓު ތަކުގެ މައްޗަށް އެމެރިކާ އިން ނަގާ ޓެރިފްތައް ވަރަށް ދަށް މިންވަރެއްގައި ހުރިކަން ވެސް ކާނީ ފާހަގަ ކުރެއްވި އެވެ.

މި ނިންމުމަކީ ދެ ގައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ހަރުދަނާކޮށް، އިގްތިސާދީ ގުޅުން ވަރުގަދަ ކުރުމަށް އެޅޭ މުހިންމު ފިޔަވަޅެއްގެ ގޮތުގައި އިގްތިސާދީ މާހިރުން ދެކެ އެވެ.