އެކުއަކަލްޗަރ މަސައްކަތް ކުރަން ފަޅުރަށްތަކާއި، އެ ރަށްތަކުގެ ފަރުގެ ސަރަޙައްދާއި، ވަކިން އޮންނަ ފަޅުތައް ކުއްޔަށް ދޫކުރުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ހުޅުވާލައިފިއެވެ.

މިނިސްޓްރީން ކޮށްފައިވާ އިއުލާނެއްގައި ބުނެފައިވަނީ ރާއްޖެއިންނާއި ރާއްޖެއިން ބޭރުގެ ޝަރުޠު ހަމަވާ އަދި ޤާބިލު ބީލަންވެރިންނަށް ފަޅުރަށްތަކާއި ވަކިން އޮންނަ ފަޅުތައް ކުއްޔަށް ހިފުމުގެ ބީލަން ހުށަހެޅުމަށް ދައުވަތު ދޭކަމަށެވެ.

ފަޅުރަށްތައް ކުއްޔަށް ދޫކުރަނީ ފުރަތަމަ 21 (އެކާވީސް) އަހަރުގެ މުއްދަތަށެވެ. އަދި އެންމެ ގިނަވެގެން 50 (ފަންސާސް) އަހަރަށް އިތުރުކުރުމުގެ ފުރުޞަތު އޮންނާނެ ކަމަށް ބުނެފައިވެއެވެ.

ވަކިން އޮންނަ ފަޅުތައް ކުއްޔަށް ދޫކުރަނީ 50 (ފަންސާސް) އަހަރަށްވުރެ ދިގުނޫން މުއްދަތަކަށެވެ.

ދެ (2) ނުވަތަ އެއަށްވުރެ ގިނަ ފަރާތްތަކަށް ގުޅިގެން ޖޮއިންޓް ވެންޗަރއެއްގެ ގޮތުގައި ބީލަން ހުށަހެޅިދާނެ ކަމަށާއި މިފަދަ ޙާލަތްތަކުގައި، ސޮއި ކޮށްފައިވާ ޖޮއިންޓް ވެންޗަރ އެއްބަސްވުމެއް، ނުވަތަ ޖޮއިންޓް ވެންޗަރގައި ކޮންމެ ފަރާތެއްގެ ދައުރާއި، ޒިންމާތަކާއި، ބައިވެރިވުން ސާފުކޮށް ބަޔާންކޮށްފައިވާ ލެޓަރ އޮފް އިންޓެންޓް/އެމްއޯޔޫއެއް ބީލަމާއެކު މިނިސްޓްރީއަށް ހުށަހަޅަންވާނެ ކަމަށް ވަނީ ބުނެފައެވެ.

ކޮންމެ ބީލަންވެރިޔަކަށް ވެސް ހުއްދަ ކުރަނީ ކޮންމެ ޒޯނަކަށް 1 (އެކެއް) ބީލަން ހުށަހެޅުމަށް ކަމަށް ވެސް ބުނެފައިވެއެވެ.

ރަށްތައް ކުއްޔަށް ދޫކުރެވޭނީ އަހަރަކު އަކަފޫޓަކަށް 0.10 ރުފިޔާ (ދިހަ ލާރި) ގެ ރޭޓުންނެވެ. މިއީ ރަށުގެ މުޅި ބިމުގެ ސަރަޙައްދަށް ދައްކަންޖެހޭ ކުލީގެ ގޮތުގައެވެ.

ވަކިން އޮންނަ ފަޅުތައް ކުއްޔަށް ދޫކުރެވޭނީ އަހަރަކު އަކަފޫޓަކަށް 0.05 ރުފިޔާ (ފަސް ލާރި) ގެ ރޭޓުންނެވެ. މިއީ ކުއްޔަށް ދޫކުރެވޭ ފަޅުގެ މުޅި ސަރަޙައްދަށް ދައްކަންޖެހޭ ކުލީގެ ގޮތުގައެވެ.

ބީލަން ހުށަހަޅަންޖެހޭނީ ބިޑް ސެކިއުރިޓީގެ ގޮތުގައި ބޭންކު ގެރެންޓީއަކާ އެކުގައެވެ. މި ބިޑް ސެކިއުރިޓީގެ އަދަދަކީ ބީލަން ހުށަހަޅާ ޕްރޮޕޯސަލްގެ ފުރަތަމަ 5 (ފަހެއް) އަހަރުގެ ޖުމްލަ އިންވެސްޓްމަންޓުގެ 1% (އެއް އިންސައްތަ) އެވެ.

ބީލަންވެރިޔާ ބީލަން ހުށަހަޅާ ރަށް ނުވަތަ ވަކިން އޮންނަ ފަޅު މިނިސްޓްރީގެ ހުއްދަ ނަގައިގެން އެސެސްކުރުމަށް ހިތްވަރުދޭ ކަމަށާއި އެހެން ނަމަވެސް ރަށް ނުވަތަ ފަޅުގެ އެސެސްމަންޓެއް ހަދާފައި ނުވުމަކީ އެކަނި ބީލަން ބާޠިލުވާނެ ސަބަބެއް ނޫން ކަމަށް ވަނީ ބުނެފައެވެ.

ބީލަންވެރިން ޝަރުޠު ހަމަވާ ކަމަށް ބަލަނީ ފުރަތަމަ ފަސް (5) އަހަރަށް އަންނަނިވި އެންމެ ދަށް އިންވެސްޓްމަންޓް ތްރެޝްހޯލްޑްތައް ހަމަވާ ނަމަ ކަމަށް ބުނެފައިވެއެވެ.

ހ) 20 ހެކްޓަރަށްވުރެ ކުޑަ ސަރަޙައްދުތަކަށް، މަދުވެގެން ފަނަރަ މިލިއަން ދިވެހި ރުފިޔާ.

ށ) 20 ހެކްޓަރާއި 50 ހެކްޓަރާ ދެމެދުގެ ސަރަޙައްދުތަކަށް، މަދުވެގެން ފަންސާސް މިލިއަން ދިވެހި ރުފިޔާ.

ނ) 50 ހެކްޓަރާއި 100 ހެކްޓަރާ ދެމެދުގެ ސަރަޙައްދުތަކަށް، މަދުވެގެން އަށްޑިހަ މިލިއަން ދިވެހި ރުފިޔާ.

ރ) 100 ހެކްޓަރާއި 300 ހެކްޓަރާ ދެމެދުގެ ސަރަޙައްދުތަކަށް، މަދުވެގެން އެއް ސަތޭކަ ފަންސާސް މިލިއަން ދިވެހި ރުފިޔާ.

ބ) 300 ހެކްޓަރާއި 500 ހެކްޓަރާ ދެމެދުގެ ސަރަޙައްދުތަކަށް، މަދުވެގެން ތިން ސަތޭކަ މިލިއަން ދިވެހި ރުފިޔާ.

ޅ) 500 ހެކްޓަރަށްވުރެ ބޮޑު ސަރަޙައްދުތަކަށް، ފަސް ސަތޭކަ މިލިއަން ދިވެހި ރުފިޔާ.

ހުށަހަޅާ މަޝްރޫޢުއަށް ފައިސާ ލިބެން ހުރިކަން ނުވަތަ ޔަޤީންކަން އޮތްކަން ވަޒަން ކުރެވޭނީ ބީލަންވެރިޔާ ހުށަހަޅާ ފައިނޭންސިންގ ހޯދާފައިވާކަމުގެ ހެއްކަށް ބަލައިގެން ކަމަށް ވަނީ ބުނެފައެވެ.

މިނިސްޓްރީން ވަޒަންކޮށް އަޅާކިޔާނީ އެކަށީގެންވާ ގޮތެއްގައި ރެސްޕޮންސިވް ބީލަންތައް ކަމަށާއި އެވޯޑަށް ޝަރުތު ހަމަވުމަށް، ބީލަންވެރިޔާ ވަޒަންކުރުމުގައި މަދުވެގެން 70 މާކްސް ހޯދަންވާނެ ކަމަށް ވަނީ ބުނެފައެވެ.

ބިޑިންގ ޑޮކިއުމަންޓްސް މިނިސްޓްރީން ގަންނަން ހުންނާނެ ކަމަށާއި ޑޮކިއުމަންޓްސްގެ އަގަކީ ވިހި ހާސް ރުފިޔާ ނުވަތަ އެއާ އެއްވަރުގެ އަދަދެއްގެ އެމެރިކާ ޑޮލަރު ކަމަށް ބުނެފައިވެއެވެ.

ޝައުޤުވެރިވާ ފަރާތްތަކަށް އިތުރު މަޢުލޫމާތު ހޯދުމަށާއި ބިޑިންގ ޑޮކިއުމަންޓްސް ގަތުމަށް ފުރުސަތު ހުޅުވާލާފައިވަނީ 26 އޮގަސްޓު 2025 އިން ފެށިގެން 30 އޮކްޓޯބަރު 2025 އާ ހަމައަށް، ހެނދުނު 09:00 އިން މެންދުރުފަހު 14:00 އާ ދެމެދު ކަމަށް ފިޝަރީޒް މިނިސްޓްރީން ބުނެފައިވެއެވެ.