ބޮޑު ކަންނެލި މަސްވެރިކަމުގައި ހުރި ކަންބޮޑުވުންތަކަށް ސަރުކާރުން އެދެވޭ ހައްލެއް ހޯދައިދީފައި ނުވާ ކަމަށް ބުނެ، ޑިސެމްބަރު މަހުގެ 10 ވަނަ ދުވަހު ފާހަގަކުރާ މަސްވެރިންގެ ދުވަހު، ބޮޑު ކަންނެލި މަސްވެރިން ގެ ޔޫނިއަންއިން އިހުތިޖާޖުކުރުމަށް ނިންމައިފި އެވެ.

އެ ޔޫނިއަންގެ ފަރާތުން ނެރުނު ބަޔާނެއްގައި ވަނީ މި ސަރުކާރުގެ މެނިފެސްޓޯގައި ކަންނެލި މަސްވެރިންނަށް ކޮށްދެއްވާނެ ކަމަށް ހިމަނާފައިވާ ކަންކަން ހިއްސާކޮށްފަ އެވެ. އޭގެ ތެރޭގައި ސަރުކާރު ގެ މަސްކުންފުނި މިފްކޯއަށް ބޮޑު ކަންނެލި ގަންނަން ފެށުން، ކަންނެލި ގަނެވޭނެ އެންމެ ދަށް އަގަކީ 80 ރުފިޔާ އަދި 100 ރުފިޔާ ކަމަށް ހެދުން އަދި މަސްވެރިންނަށް ބޭސް ރޭޓުގައި ތެޔޮ ފޯރުކޮށްދިނުމަށާއި، ފަސޭހައިން އައިސް ލިބޭނޭ އިންތިޒާމު ހަމަޖެއްސުން ހިމެނެ އެވެ.

ސަރުކާރު ގެ އެ ވައުދުތައް ފާހަގަކޮށް އެ ޔޫނިއަންއިން ބުނީ އެ ވައުދުތައް ފުއްދުމަށް އެދި މި ސަރުކާރުގެ ދައުރު ފެށުނީއްސުރެ އެކި ސިފަސިފައިގައި އެ ޔޫނިއަންއިން ގޮވާލަމުން އައި ކަމަށެވެ. އަދި ތަފާތު މަޝްވަރާ ބައްދަލުވުންތަކާއި، މީޓިންތައް، ސަރުކާރާއި މަސް ގަންނަ ފަރާތްތަކާ އެކު ބޭއްވުމުގެ އިތުރުން ބަޔާންތައް ވެސް ނެރެފައިވާނެ ކަމަށް ބުންޏެވެ. އަދި ފިޝަރީޒް މިނިސްޓްރީއަށް ސިޓީ ފޮނުވައިގެން ވެސް އެދިފައިވާނެ ކަމަށް އެ ޔޫނިއަން އިން ފާހަގަކޮށްފައިވެ އެވެ.

މިއަދާ ހަމައަށް އެ ޔޫނިއަންއިން ކުރި އެއްވެސް މަސައްކަތަކުން ކަންނެލި މަސްވެރިންނަށް އެދެވޭ އަލި މަގެއް ނުފެނި، މިހާރު ވަނީ މާޔޫސްވެފައިވާ ކަމަށް އެ ޔޫނިއަން އިން ފާހަގަކުރި އެވެ. އެހެންކަމުން ބުދަ ދުވަހު ބާއްވާ އެ ޔޫނިއަންގެ އަހަރީ ބައްދަލުވުމަށްފަހު އިހުތިޖާޖު ކުރުމަށް ނިންމާފައިވާކަމަށް އެ ބަޔާނުގައި ބުނެފައިވެ އެވެ.

އެ ޔޫނިއަންގެ ބަޔާނުގައި ބުނީ ކަންނެލި މަސްވެރިންގެ ކަންބޮޑުވުންތަކަށް ސަރުކާރުން އަޅާނުލުމާއެކު ހައްލެއް ހޯދައިދީފައި ނުވާތީ، މިއަހަރުގެ ޑިސެމްބަރު 10 ވަނަ ދުވަހު މި ޔޫނިއަންގެ އަހަރީ ބައްދަލުވުމަށްފަހު ކަންނެލި މަސްވެރިންގެ ހައްގުގައި އަޑުއުފުލައި، އިހުތިޖާޖުކުރާނެ ވާހަކަ ކަމާ ބެހޭ ފަރާތްތަކުގެ މައުލޫމާތަށްޓަކައި ދަންނަވާ ކަމަށެވެ.

އެ ޔޫނިއަންގެ ފަރާތުން ވަނީ އެ ސުލްހަވެރި އިހުތިޖާޖުގައި އެންމެހާ މަސްވެރިން ބައިވެރިވެ، އެކަން ކޮޅެއްގައި ޖެހެންދެން އަޑު އުފުލުމަށް ގޮވާލާފަ އެވެ.

މަސްވެރިންނަށް ދިމާވެފައިވާ ދަތިތައް ފާހަގަކޮށް، އެކަންކަމަށް ހައްލު ހޯދުމަށް މަސްވެރިން ވަނީ ވަރަށް ގިނަ ފަހަރު މަތިން ސަރުކާރަށް ގޮވާލާފަ އެވެ. މީގެކުރިން ވެސް މަސްވެރިންގެ އަތުން މަސް ގަތުމަށްފަހު، ފައިސާ ނުދީ ގިނަ ދުވަސްވީ މައްސަލައިގައި މަސް ދޯނިތަކެއް މާލެ ފަޅު ކައިރީގައި މުޒާހަރާކޮށްފައިވެ އެވެ.