ރައްޔިތުންގެ މަޖިލީހުގެ ދައުރުން ބޭރު 2 ޖަލްސާ ބާއްވަނީ

ރައްޔިތުންގެ މަޖިލީހުގެ ދައުރުން ބޭރު 2 ޖަލްސާއެއް ބާއްވަން ނިންމައިފި އެވެ. މި މަހުގެ 27 ވަނަ ދުވަހާއި 28 ވަނަ ދުވަހު، ހިއުމަން ރައިޓްސް ކޮމިޝަން (އެޗްއާރްސީއެމް) އަށް އާ މެންބަރަކު އައްޔަންކުރުމުގެ މަސައްކަތް ކުރުމަށްޓަކައި މަޖިލީހުގެ ޖަލްސާއެއް އޮންނާނެ ކަމަށް މައުލޫމާތު ލިބިފައިވެ އެވެ.

އަންގާރާ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ހިއުމަން ރައިޓްސް ކޮމިޝަނަށް އައްޔަނު ކުރަން ރައީސް މުއިއްޒު ފޮނުވި 3 ނަމެއް ވަނީ ދިރާސާ ކުރަން ކޮމިޓީއަށް ފޮނުވާފަ އެވެ. އެ ނަންތަކަކީ އަހްމަދު މަޤްސޫމް / ސީބްރީޒް، އައްޑޫ ހުޅުދޫ، އަމީރާ ނައީމް / ހ. ގުރުސް އަދި ފާތިމަތު ނަފްއަތު އަބްދުލްވައްހާބު / ދަފްތަރު ނަންބަރު ދރ 712 އެވެ.

ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީން މިއަދު ބޭއްވި ބައްދަލުވުމުގައި ވަނީ، ރައީސް ފޮނުވި ނަންތައް އޮގަސްޓް މަހުގެ 26 ގެ ކުރިން ދިރާސާ ކުރުމަށްފަހު އިންޓަވިއު ކުރުމަށް ނިންމާފަ އެވެ. އަދި މިއަދުން ފެށިގެން ޝަކުވާ ހުށަހަޅަން 5 ދުވަހުގެ މުއްދަތެއް ދީފައި ވެއެވެ.

ރައްޔިތުންގެ މަޖިލީހުގެ މި ދައުރުގެ ގަވާއިދުގައި ވާގޮތުން، މި ނިމުނު ދައުރުގެ ފަހު ދުވަހެއް ކަމަށް ކަނޑައަޅާފައި އޮތީ މި ހިނގާ އޮގަސްޓް މަހުގެ 15 ވަނަ ދުވަހެވެ. ނަމަވެސް މުހިންމު މަސައްކަތްތަކެއް އޮތް ކަމަށް ބުނު މަޖިލީހުގެ ރިޔާސަތުން ވަނީ އަންނަ ބުރާސްފަތި ދުވަހާ ހަމަޔަށް ދައުރު ދިގުދަންމާފަ އެވެ. އެކަމަކު މިއަދު ވަނީ މަޖިލީހުގެ ދެވަނަ ދައުރުގެ ޖަލްސާތައް ނިންމާލާފައެވެ.

މި ނިމުނު ދައުރު ދަންމާލި މުއްދަތުގައި މާ ބޮޑު މަސައްކަތެއް ނުކުރި ކަމުގައި ވިޔަސް، އިއްޔެ ވަނީ އިންޝުއަރެންސް ބިލާއި, އެމްއެމްއޭގެ ކުންފުނި "ޕޭމަންޓް މޯލްޑިވްސް" އުފެއްދުމަށް ގައުމީ ޕޭމަންޓް ސިސްޓަމަށް ގެނައި އިސްލާހުގެ އިތުރުން، ހިއުމަން ރައިޓްސް ކޮމިޝަނަށް މެންބަރަކު އައްޔަންކުރަން ރުހުން ދީފައެވެ.