ފ.މަގޫދޫ ބަނދަރު މަތީގައި އެ ރަށު ކައުންސިލް އިން ތަރައްޤީ ކޮށްފައިވާ ދަތުރުވެރިންގެ ހިޔާ، ރަސްމީ ފާލަން އަދި ލައިސަންސް ޓްރެކް، ކުރީގެ ރައީސް އިބްރާހީމް މުޙައްމަދު ޞާލިޙު ރަސްމީކޮށް ހުޅުވައި ދެއްވައިފި އެވެ.

މަގޫދޫ ކައުންސިލް އިން ތަރައްޤީ ކޮށްފައިވާ މި ތަންތަން ރައީސް ޞާލިޙު ހުޅުވައި ދެއްވީ އާދީއްތަ ދުވަހުގެ ރޭ އެކަމަށްޓަކައި އޮތް ޚާއްސަ ރަސްމިއްޔާތެއް ގައެވެ. މި ރަސްމިއްޔާތުގައި ރައީސް ޞާލިޙުގެ އިތުރުން، ބިލެތްދޫ ދާއިރާގެ ކުރީގެ މެމްބަރު އަޙުމަދު ޙަލީމް (ދޮންބިލެތް)، ކުރީގެ އެންވަޔަރަމަންޓް މިނިސްޓަރު އާމިނަތު ޝައުނާ އަދި އަލިފުށީ ދާއިރާގެ ކުރީގެ މެމްބަރު މުޙައްމަދު ރަޝީދު ޙުސެއިން (ބިގޭ) ވެސް ބައިވެރިވެ ވަޑައިގެންނެވި އެވެ.

ރަސްމިއްޔާތުގައި މަގޫދޫ ކައުންސިލް އިން ވަނީ "ވާރު ހަނދާނީ ފިލާ"، މަގޫދޫ ކައުންސިލް އަށް ޚިދުމަތް ކޮށްދީފައިވާ އެކި އެކި ފަރާތްތަކަށް އަރުވައިފަ އެވެ. މީގެ އިތުރުން ހިނގަމުން މިދާ ކައުންސިިލް ދައުރުގެ ފާއިތުވި ހަތަރު އަހަރުގެ އުސް އަލިތައް ހިމެނޭ ވީޑިއޯ ރިޕޯޓު ވެސް ވަނީ ދައްކައިފަ އެވެ.

މަގޫދޫ ކައުންސިލް އިން ތަރައްޤީ ކޮށްފައިވާ މި ތަންތަނަކީ އެ ކައުންސިލްގެ ބަޖެޓުން ޚަރަދު ކޮށްގެން ތަރައްޤީ ކޮށްފައިވާ ތަންތަނެވެ. އެގޮތުން މަގޫދޫ ކައުންސިލް އިން ވަނީ ދަތުރުވެރިންގެ ހިޔާ ތަރައްޤީ ކުރުމަށް ހަ ލައްކާ ފަންސާސް ހާހަށް ވުރެ ގިނަ ރުފިޔާ ޚަރަދު ކޮށްފަ އެވެ.

މީގެ އިތުރުން ރަސްމީ ފާލަން އަދި ވޯކް ވޭ ތަރައްޤީ ކުރުމަށް ވަނީ އެއް ލައްކާ ފަންސާސް ހާސް ރުފިޔާ އަށް ވުރެ ގިނައިން ޚަރަދު ކޮށްފަ އެވެ. އަދި ލައިސަންސް ޓްރެކް ތަރައްޤީ ކުރުމަށް ވަނީ އެއް ލައްކަ ނުވަދިހަ ހާހަށް ވުރެ ގިނަ ރުފިޔާ ޚަރަދު ކޮށްފަ އެވެ.

މީގެ އިތުރުން ވެސް މިވަގުތު ވެސް މަގޫދޫ ކައުންސިލް އިން އަންނަނީ އެ ރަށުގެ ތަރައްޤީ އަށް ބޭނުންވާ ގިނަ މަސައްކަތްތަކެއް ކުރިއަށް ގެންދަމުންނެވެ. އެގޮތުން މަގޫދޫ ސްކޫލުގައި ލައިބްރަރީއެއް ޤާއިމު ކުރުމުގެ މަސައްކަތުގެ އިތުރުން، ކޮމްޕިއުޓަރު ލެބެއް ޤާއިމު ކުރުމާއި، ސްކޫލަށް ބޭނުންވާ ބައެއް އެހެން ކަންކަން ވެސް އެ ކައުންސިލް އިން އަންނަނީ ކުރިއަށް ގެންދަމުންނެވެ.

މަގޫދޫ ކައުންސިލް އިން ތަރައްޤީ ކޮށްފައިވާ ބައެއް މުހިންމު ތަންތަން ރައީސް ޞާލިޙު ރަސްމީކޮށް ހުޅުވައި ދެއްވާފައިވާއިރު، އެމަނިކުފާނުގެ ވެރި ކަމުގައި ވެސް ވަނީ މަގޫދޫގައި ތަރައްޤީގެ ގިނަ މަޝްރޫއުތަކެއް ކުރިއަށް ގެންދަވައިފަ އެވެ.

އެގޮތުން މަގޫދޫގެ ފެނާއި ނަރުދަމާގެ މަސައްކަތް ނިންމާފަައިވާއިރު، އެ ރަށުގައި ވަނީ އައުޓްޑޯ ވޮލީ ކޯޓަކާއި، ކުޑަ ކުދިންގެ ޕާކެެއް ވެސް ތަރައްޤީ ކޮށްފަ އެވެ. ރައީސް ޞާލިޙުގެ ވެރި ކަމުގައި މަގޫދޫގައި ކުރިއަށް ގެންދިޔަ އެންމެ ބޮޑު މަޝްރޫއަކީ މަގޫދޫގައި ތަރައްޤީ ކުރަން ފަށާފައިވާ އެއާޕޯޓުގެ މަސައްކަތެވެ.

މަގޫދޫ އެއާޕޯޓުގެ މަސައްކަތުގެ ބޮޑު އިންސައްތައެއް ރައީސް ޞާލިޙުގެ ވެރި ކަމުގެ ދައުރުގެ ތެރޭގައި ވަނީ ނިންމައިފަ އެވެ. ނަމަވެސް 2023 ވަނަ އަހަރު ރައީސް ޞާލިޙުގެ ވެރިކަން ބަދަލުވެ، ރައީސް ޑޮކްޓަރު މުޙައްމަދު މުޢިއްޒުގެ ވެރިކަން ފެށުމާ އެކު އެއާޕޯޓުގެ މަސައްކަތް ވަނީ މަޑު ޖެހިފަ އެވެ.