މެލޭޝިޔާގެ ކުންފުންޔަކާ ހަވާލުކުރި 55 ކައުންސިލް އިމާރާތް އެޅުމުގެ މަޝްރޫއުގެ އެއްބަސްވުން ބާތިލު ކޮށް ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ)އާ ހަވާލުކޮށްފި އެވެ.

މި މަޝްރޫއު އެންމެ ފުރަތަމަ މިދިޔަ ޖެނުއަރީ މަހު ހަވާލުކުރީ މެލޭޝިޔާގެ ހެކްޓަރ ގްލޯބަލް ކުންފުންޔާއެވެ. ނަމަވެސް އޭގެ ގާތް ގަނޑަކަށް 5 މަސް ދުވަސް ފަހުން ލޯކަލް ކައުންސިލް މިނިސްޓަރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ވަނީ މި އެއްބަސްވުން ބާތިލްކުރި ވާހަކައެވެ.

އެޔަށްފަހު އާއްމުކޮށް އިއުލާނު ކުރުމެެއްނެތި، މެލޭޝިޔާގެ ކުންފުންޔާ ހަވާލުކުރި އަގަށްވުރެ ބޮޑުކޮށް، މި މަޝްރޫއުގެ މަސައްކަތް މިހާރު މިވަނީ ސަރުކާރާ ގާތް ގުޅުމެއް ބާއްވަމުން ގެންދަވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު މުހައްމަދު ނާޒިމްގެ އާރުސީސީއާ ހަވާލުކޮށްފައެވެ. އާރުސީސީއާ މި މަޝްރޫއުގެ މަސައްކަތް ހަވާލުކުރީ 631 މިލިއަން ރުފިޔާއަށެވެ. މިއީ މެލޭޝިޔާގެ ހެކްޓަރ ގްލޯބް ކުންފުންޔާ މި މަސައްކަތް ހަވާލުކުރި އަގުކަމަށްވާ 36 މިލިއަން ޑޮލަރަށްވުރެ 76 މިލިއަން ރުފިޔާ ބޮޑު އަގެކެވެ.

މިނިސްޓްރީ އިން މައުލޫމާތު ދެއްވަމުން ބުނީ މި މަސައްކަތް ހަވާލު ކުރީ، 55 ރަށު ކައުންސިލްގެ މަސައްކަތް އެއް އަހަރު ތެރޭގައި ނިންމާ ގޮތަށެވެ. އެއް މަސް ދުވަހުގެ ތެރޭގައި މި މަޝްރޫއުގެ އަމަލީ މަސައްކަތް ފެށޭނެ ކަމަށްވެސް މިނިސްޓްރީ އިން މައުލޫމާތު ދީފައިވެއެވެ. އަދި ކައުންސިލްތަކަށް ބޭނުންވާ ފަރުނީޗަރު ހޯދުމާއި ވަށާފާރު ރޭނުމަކީ ވެސް މި މަޝްރޫއުގެ އެއްބަސްވުމުގެ ދަށުން ކުރާނެ މަސައްކަތެއް ކަމަށް މިނިސްޓްރީން ބުންޏެވެ.

55 ރަށެއްގެ ކައުންސިލް އިމާރާތް އަޅަން އާރުސީސީއާ ހަވާލުކުރިއިރު، 50 ރަށެއްގެ ކައުންސިލް އިދާރާގެ މަސައްކަތް ޗައިނާ ސަރުކާރުގެ ހިލޭ އެހީގައި ކުރިއަށްގެންދިއުމަށް ވަނީ ހަމަޖެހިފައެވެ. އެގޮތުން މި މަހުގެ ތެރޭގައި ވަނީ ކައުންސިލް އިމާރާތްތަކުގެ ފީޒިބިލިޓީ ހެދުމަށްވާންޖެހޭ ތައްޔާރީތައް ވުމަށްޓަކައި ޗައިނާގެ ފަންނީ ޓީމާއެކު މަޝްވަރާތައް ކުރިއަށް ގެންގޮސްފައެވެ.