2023 ގެ ފަހުން އެންސްޕާގެ ދަރަނި 1.5 ބިލިއަނަށް އަރައިފި
16 އޯގަސްޓު 2025 | ހޮނިހިރު 17:34އެންސްޕާއިން ޖުލައި މަހުގެ ނިޔަލަށް އެއް ބިލިއަނަށްވުރެ ގިނަ ރުފިޔާ ދައްކާފައިވާއިރު އަދިވެސް 1.5 ބިލިއަން ރުފިޔާ ދައްކަން އެބައޮތް
އެންސްޕާގެ ސީއީއޯ ހީނާ ވަލީދު
އެންސްޕާއިން އިޖްތިމާއީ ސިއްހީ އިންޝުއަރެންސް ސްކީމުގެ ދަށުން ރާއްޖެ އާއި ރާއްޖޭން ބޭރުގެ ހިދުމަތްދޭ ތަންތަނަށް ދައްކަންޖެހޭ ބިލްތަކަށް ޖުލައި މަހުގެ ނިޔަލަށް އެއް ބިލިއަނަށްވުރެ ގިނަ ރުފިޔާ ދައްކާފައިވާ ކަމަށް މާލިއްޔަތު ކޮމިޓީން ހާމަކޮށްފައިވާއިރު އަދިވެސް 1.5 ބިލިއަން ރުފިޔާ ދައްކަން އޮތްކަން ފާހަގަކޮށްފައިވެއެވެ.އެންސްޕާ އާއި އާސަންދައިން ނުދައްކާ ހުރި ބިލްތަކާ ގުޅޭ ގޮތުން މާލިއްޔަތު ކޮމިޓީން އެކުލަވާލި ރިޕޯޓުގައި ދައްކާގޮތުން، ނޮވެމްބަރު 2023 އިން ޖުލައި 2024 ގެ ނިޔަލަށް އެންމެ ބޮޑު އަދަދެއް ދައްކަން އޮތީ ސަރުކާރުގެ ސިއްހީ ހިދުމަތްދޭ އިދާރާތަކަށެވެ. އެއީ 367 މިލިއަން ރުފިޔާއެވެ. ދެވަނައަށް އެންމެ ބޮޑު އަދަދެއް ދައްކަން އޮތީ ބޭރުގެ ހޮސްޕިޓަލްތަކަށް ކަމަށްވާއިރު، އެ އަދަދަކީ 349 މިލިއަން ރުފިޔާއެވެ.މި މުއްދަތުގެ ތެރޭގައި އެންސްޕާއިން 872 މިލިއަން ރުފިޔާ ބިލްތަކަށް ދެއްކި ނަމަވެސް، އެ ތާރީހުގެ ތެރޭގައި ދީފައިވާ ހިދުމަތްތަކަށް ނުދައްކާ ހުރި އަދަދު 663 މިލިއަން ރުފިޔާއަށް އިތުރުވެފައިވެއެވެ. ކްލިނިކްތަކަށް 330 މިލިއަން ރުފިޔާ އަދި ފާމަސީތަކަށް 325 މިލިއަން ރުފިޔާ ދައްކަން އޮތްއިރު، ރާއްޖޭގެ ހޮސްޕިޓަލްތަކަށް 164 މިލިއަން ރުފިޔާ ދައްކަން އެބައޮތެވެ.ނޮވެމްބަރު 2023 ގެ ނިޔަލަށް 491 މިލިއަން ރުފިޔާގެ ޕެންޑިން ބިލްތައް ހުރިއިރު، މީގެ ތެރޭގައި ދައުލަތުގެ އިދާރާތަކަށް ދައްކަންޖެހޭ 125 މިލިއަން ރުފިޔާ ހިމެނެއެވެ. އަދި ބޭރުގެ ހޮސްޕިޓަލްތަކަށް 101 މިލިއަން ރުފިޔާ އާއި ރާއްޖޭގެ ހޮސްޕިޓަލްތަކަށް 81 މިލިއަން ރުފިޔާ ދައްކަން އެބައޮތެވެ.
އާސަންދައިގެ ކަންތައްތަކަށް ބަލާއިރު، ނޮވެމްބަރު 2023 އާ ހަމައަށް ނުދައްކާ ހުރި ބިލްތަކުގެ އަދަދު 1.1 ބިލިއަން ރުފިޔާއަށް އަރާއިރު، އޭގެ ތެރެއިން އެންމެ ބޮޑު އަދަދެއް ދައްކަން އޮތީ ފާމަސީތަކަށެވެ. އެއީ 516 މިލިއަން ރުފިޔާއެވެ.މި މައްސަލަ މާލިއްޔަތު ކޮމިޓީން ބަލަން ފެށީ އޭޑީކޭ ހޮސްޕިޓަލުން ހުށަހެޅި މައްސަލައެއް ދިރާސާކުރުމަށްފަހުގައެވެ. އޭޑީކޭއިން ވަނީ އާސަންދައިން އެ ހޮސްޕިޓަލަށް 251 މިލިއަން ރުފިޔާ ނުދައްކާ އޮތުމުގެ ސަބަބުން ސަޕްލަޔަރުންނާއި އެހެނިހެން ހަރަދުތައް ހަމަޖެއްސުމަށް ދަތިތަކާ ކުރިމަތިވާކަން ފާހަގަކޮށްފައެވެ.
މިއަދު ބޭއްވުނު ކޮމިޓީގައި އާސަންދަ އާއި އެންސްޕާއާ ގުޅޭ މި ރިޕޯޓު އިތުރަށް ދިރާސާކުރުމަށް ވަނީ ނިންމާފައެވެ.
