ހޯކްސް އިން ބޮޑު ތެޔޮ ޓޭންކަރު އެމްޓީ ހޯކްސް ލިބަރޓީ ގަނެފި
ރާއްޖޭގެ އަމިއްލަ ފަރާތަކުން ގެންގުޅޭ އެންމެ ބޮޑު ތެޔޮ ޓޭންކަރު، ހޯކްސް ލިބަރޓީ ގަތުމާއެކު ދަ ހޯކްސް އިން އައު ހަރުފަތަކަށް އަރައިފި. މި 24,415 މެޓްރިކް ޓަނުގެ ޖާގައިގެ އުޅަނދު ގަތުމާއެކު، ރާއްޖޭގެ ތެލުގެ ބޭނުންތައް ފުއްދުމަށް ހޯކްސްއިން ކުރާ މަސައްކަތް އިތުރަށް ހަރުދަނާވެގެންދާނެ.
ދަ ހޯކްސް ގެ ތެޔޮ ޓޭންކަރު އެމްޓީ ހޯކްސް ލިބަރޓީ
ދަ ހޯކްސް އިން ރާއްޖޭގެ އަމިއްލަ ފަރާތަކުން ގެންގުޅޭ އެންމެ ބޮޑު ތެޔޮ ޓޭންކަރު އެމްޓީ ހޯކްސް ލިބަރޓީ ގަނެފި އެވެ.
ރާއްޖޭ ގައި ތެލާއި ލޮޖިސްޓިކްސްގެ ޚިދުމަތް ފޯރުކޮށް ދިނުމުގައި ކުރީ ސަފުގައި ހިމެނޭ ދަ ހޯކްސް ޕްރައިވެޓް ލިމިޓެޑުން ހޮނިހިރު ދުވަހު ތެޔޮ ޓޭންކަރު ހޯކްސް ލިބަރޓީ ގަތުމާއެކު ކުންފުނީގެ އުޅަނދުފަހަރުގެ އަދަދު ވަނީ އިތުރުވެފައެވެ.
25,415 މެޓްރިކް ޓަނުގެ ޖާގައިގެ ހޯކްސް ލިބަރޓީ އަކީ ހޯކްސްގެ އުޅަނދުފަހަރުގެ ތެރެއިން އެންމެ ބޮޑު ތެޔޮ ޓޭންކަރަށް ވުމުގެ އިތުރުން ރާއްޖޭގެ އަމިއްލަ ކުންފުންޏަކުން ގެންގުޅޭ އެންމެ ބޮޑު ތެޔޮ ޓޭންކަރެވެ.
ހޯކްސް ލިބަރޓީ އިތުރުވުމަކީ ކުންފުންޏަށް ލިބުނު މުހިންމު ކުރިއެރުމެއް ކަމަށާއި ރާއްޖޭގެ ތެލުގެ ބޭނުންތައް ފުއްދުމަށް ހޯކްސްއިން ކުރާ މަސައްކަތައް ލިބުނު ބޮޑު ކުރިއެރުމެއް ކަމަށް ކުންފުނިން ބުނެއެވެ. މި އުޅަނދު ގަތުމާއެކު ކުންފުނީގެ ޚިދުމަތް ލިބިގަންނަ ފަރާތްތަކަށް އެކަށީގެންވާ އަދި އިތުބާރުހުރި ގޮތެއްގައި ތެޔޮ ފޯރުކޮށްދިނުމުގެ ޤާބިލުކަން ވަރަށް ބޮޑަށް އިތުރުވެގެންދާނެ ކަމަށް ވެސް ހޯކްސް އިން ބުނެއެވެ.
2007ވަނަ އަހަރު އުފެދުނު ހޯކްސް ޕްރައިވެޓް ލިމިޓެޑަކީ ރަނގަޅު ފެންވަރުގެ ތެލުގެ ޚިދުމަތް ފޯރުކޮށްދިނުމުގައި ކާމިޔާބު ރެކޯޑެއް އޮތް ކުންފުންޏެކެވެ. 11 ތެޔޮ ޓޭންކަރުގެ އިތުރުން، ކުންފުނީގައި 15 ބާޖު، 20 ބައުޒަރު އޮވެއެވެ. އަދި ރާއްޖޭގެ އެކި ހިސާބުތަކުގައި 15 ފިއުލް ޝެޑް ވަނީ ގާއިމު ކޮށްފައެވެ.
އެމްޓީ ހޯކްސް ލިބަރޓީ އަކީ ކުންފުނީގެ އިތުބާރާއި ކަސްޓަމަރުންގެ ހިތްހަމަޖެހުން ދެމެހެއްޓުމަށާއި، ދިވެހި އިޤްތިޞާދުގެ އިތުރުވަމުންދާ ބޭނުންތަކަށް އިތުރަށް ޚިދުމަތް ކުރުމަށާއި، ޚިދުމަތް ދެމުންދާ ބައިނަލްއަޤްވާމީ މާރކެޓްތަކުގައި ކުންފުނީގެ ޕްރެސެންސް ވަރުގަދަކުރުމަށް އެހީތެރިވެދޭނެ އަގުހުރި ވަސީލަތެއް ކަމަށް ހޯކްސް އިން ބުނެފައި ވެއެވެ.
