ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އިން ގެސްޓް ހައުސް ވިޔަފާރިއަށް ވަނުމަށް ނިންމައި، ކައުންސިލްތަކާއެކު މަޝްވަރާ ފަށައިފިއެވެ.

ރާއްޖެއެމްވީއަށް ތުލުސްދޫ ކައުންސިލްގެ ނައިބު ރައީސް މުހައްމަދު ޝަހީމް ވިދާޅުވީ ވެމްކޯ އިން ގެސްޓްހައުސް ހިންގަން ބޭނުންވެ، ބިން ހޯދުމަށް ކައުންސިލްއާއެކު މަޝްވަރާ ބައްދަލުވުންތަކެއް ކުރިއަށް ގެންގޮސްފައިވާ ކަމަށެވެ.

މައުލޫމާތު ލިބޭ ގޮތުގައި، ވެމްކޯއިން ގެސްޓްހައުސް ވިޔަފާރިއަށް ވަނުމަށް ނިންމާފައި ވަނީ ކުނި މެނޭޖްކުރުމުގެ މަސައްކަތް ދެމެހެއްޓެނިވި ގޮތެއްގައި ކުރިއަށް ގެންދިއުމަށެވެ. ސަރުކާރުގެ ކުންފުންޏަކަށް ވާތީ، ބިމުން ކުލި ނެގުމަކާ ނުލައި، ބިން ދޫކުރުމަށް އެދެމުންދާ ކަމަށް ވެސް މައުލޫމާތު ލިބެއެވެ. ކުރިއަށް އޮތްތަނުގައި ގެސްޓްހައުސް މިހާރު އެންމެ ގިނައިން ހިންގާ ރަށްތަކުގެ ކައުންސިލްތަކާ ބައްދަލުވުންތައް ބާއްވައި، މިކަމުގެ މަޝްވަރާތައް ކުރިއަށް ގެންދިއުމަށް ވެމްކޯ އިން ރާވާފައިވާ ކަމަށް ވެސް މައުލޫމާތު ލިބިފައިވެއެވެ.

މީގެ އިތުރުން، ތުލުސްދޫގައި މިވިޔަފާރި ކުރިއަށް ގެންދިއުމަށް ނިންމައި، ވެމްކޯ އިން މިހާރު ވަނީ ތުލުސްދޫ ކައުންސިލަށް އެއްބަސްވުން ފޮނުވާފައެވެ.

ވެމްކޯއިން ގެސްޓްހައުސް ވިޔަފާރި އަށް ވަނުމަށް މަސައްކަތް ކުރާތީ، އެކަމުގެ އިތުރު ތަފްސީލު ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.

ވެމްކޯ އިން ރަށްރަށުގައި ކުނި މެނޭޖްކުރުމުގެ މަސައްކަތްތައް ކުރަމުންދާއިރު، ކުނި ނަގާ ކޮންމެ ގޭބިސީއަކުން ފީ އެއް ނަގައެވެ. ޕްރައިވެޓް ސެކްޓަރ އިން ކުރަމުން ގެންދާ ގެސްޓްހައުސް ވިޔަފާރި އަށް ސަރުކާރުގެ ހިއްސާ އޮންނަ ކުންފުނިތައް ވަނުމަށް މަސައްކަތް ކުރާތީ ގިނަ ވިޔަފާރިވެރިންނާއި އާންމުން ކަންބޮޑުވުން ފާޅުކޮށްފައިވެއެވެ. މިފަހުން ހައްޖު ކޯޕަރޭޝަނުން ކ. މާފުށީގައި ހަލާލު ޓޫރިޒަމްގެ ކުރިއަށް ގެންދަން ނިންމައި، ހޮޓެލްއެއް އެޅުމަށް ވަނީ ނިންމާފައެވެ. ސަރުކާރުން މިފަދަ ވިޔަފާރިތަކުގެ ތެރެއަށް ވަންނާތީ ގިނަބަޔަކު އަންނަނީ ނުރުހުން ފާޅު ކުރަމުންނެވެ.