އަހަރެއްގެ ތެރޭގައި އދ. ދިގުރަށުން އެންމެ މަދުވެގެން ވެސް ސަރުކާރަށް މިލިއަނެއްހާ ޑޮލަރު ވަންނާނެ: ކައުންސިލްގެ ނައިބު ރައީސް
ފެނާއި ނަރުދަމާގެ ޚިދުމަތް އަވަހަށް ރައްޔިތުންނަށް ލިބޭ
ފަށާއިރު ޕްރޮގްރާމްގައި އދ.ދިގުރަށުގެ ކައުންސިލްގެ ނައިބު ރައީސް އިބްރާހިމް އަބްދުއްރަހީމް ވާހަކަދައްކަވަނީ
އަހަރެއްގެ ތެރޭގައި އދ. ދިގުރަށުން އެންމެ މަދުވެގެން ވެސް ސަރުކާރަށް މިލިއަނެއްހާ ޑޮލަރު ވަންނާނެ ކަމަށް އެރަށުގެ ކައުންސިލްގެ ނައިބު ރައީސް އިބްރާހިމް އަބްދުއްރަހީމް ވިދާޅުވެއްޖެއެވެ.
ހޮނިހިރު ދުވަހު ފަށާއިރު ޕްރޮގްރާމްގައި ކައުންސިލްގެ ނައިބު ރައީސް އަބްދުއްރަހީމް ވިދާޅުވީ ލޯކަލް ޓޫރިޒަމް ރަނގަޅު ފެންވަރުގައި ހިންގާ މަދު ރަށްތަކުގެ ތެރޭގައި ދިގުރަށް ހިމެނޭނެ ކަމަށާއި، މީހުން ދިރިއުޅޭ ރަށްތަކުން ސަރުކާރަށް އެންމެ ބޮޑު އާމްދަނީއެއް ލިބޭ ރަށްތަކުގެ ތެރޭގައި ވެސް އެރަށް ހިިމެނޭނެ ކަމަށެވެ.
އެގޮތުން އަހަރެއްގެ ތެރޭގައި އެރަށުން އެކަނި ވެސް ސަރުކާރަށް އެންމެ މަދުވެގެން މިލިއަނެއްހާ ޑޮލަރު ލިބޭނެ ކަމަށް އޭނާ ވިދާޅުވިއެވެ. އަދި ވިދާޅުވީ އެރަށުގައި ޓޫރިޒަމް ހަރުދަނާކޮށް ސަސްޓެއިންކޮށް ކުރިއަށް ގެންދިއުމަށް ރަށުގެ އާއްމު ޚިދުމަތްތައް ރަނގަޅުވާންޖެހޭ ކަމަށެވެ.
އެގޮތުން ފެނާއި ނަރުދަމާގެ ޚިދުމަތް ލިބެންޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ ފެނާއި ނަރުދަމާގެ މަޝްރޫއު ގާތްގަނޑަކަށް ނިމިފައިވާ ކަމަށާއި، ޚިދުމަތް ނުދެވޭ ކަމަށެވެ. މި ޚިދުމަތް އަވަހަށް ރައްޔިތުންނަށް ލިބެންޖެހޭ ކަމަށް އަބްދުއްރަހީމް ވިދާޅުވިއެވެ.
މީގެ އިތުރުން އަބްދުއްރަހީމް ވިދާޅުވީ އެރަށުގެ ސިއްހީ ނިޒާމުގެ ޚިދުމަތް ވެސް ވަރަށް ބޮޑަށް ރަނގަޅު ކުރަންޖެހޭ ކަމަށާއި، ސިއްހީ މަރުކަޒުން 24 ގަޑިއިރު ޚިދުމަތް ލިބޭ ގޮތަށް ބަދަލު ކުރަންޖެހޭ ކަމަށެވެ. އަދި ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އިމާރާތް ކުރި ސިއްހީ މަރުކަޒުގެ އެކްސްޓެންޝަން ޢިމާރާތު ގާތްގަނޑަކަށް އެއްކޮށް ނިމިފައިވާއިރު، އެ އިމާރާތުން ރައްޔިތުންނަށް ޚިދުމަތް ލިބޭ ގޮތް ހަދަންޖެހޭ ކަމަށެވެ.
މުޅި ރާއްޖެއެކޭ އެއްގޮތަށް ދިގުރަށުގައި ވެސް ސިއްހީ ނިޒާމު ހަރުދަނާ ކުރަންޖެހިފައި އެބައޮތް. ސިއްހީ ނިޒާމުގެ ތެރެއިން އަޅުގަނޑު ފާހަގަކޮށްލަން ސިއްހީ މަރުކަޒު 24 ގަޑިއިރު ބަދަލުކުރަން. މިއީ ކޮންމެހެން ކުރަންޖެހޭ ކަމެއް. ސަބަބަކީ ދިގުރަށުގައި 800 ނުވަތަ 700 ޓޫރިސްޓުން ސީޒަންތެރޭގައި އުޅެމުންދާއިރު ކޮންމެ ވަގުތެއްގައި ވެސް ކަމެއް ދިމާވެދާނެ އަދި ދިވެހިންނަށް ކަމެއް ދިމާވެދާނެ. މިފަދަ ހާލަތްތަކަށް ބަލައި އިންޑަސްޓްރީއެއް ހިމާޔަތް ކުރަން ސިއްހީ ނިޒާމު ހަރުދަނާ ކުރަންޖެހޭ. މިވަގުތު 24 ގަޑިއިރު ޚިދުމަތްދޭންޖެހޭ. 16 ގަޑިއިރު މިހާރު ޚިދުމަތް ދެމުންދަނީ.ކައުންސިލްގެ ނައިބު ރައީސް އިބްރާހިމް އަބްދުއްރަހީމް
އަބްދުއްރަހީމް ވިދާޅުވީ މިސަރުކާރުގައި ވެސް ދިގުރަށުގެ ސިއްހީ މަރުކަޒުގެ ހާލަތު ރަނގަޅުކޮށް، ޚިދުމަތްތައް ފުޅާކުރާނެ ކަމަށް ރައީސް ޑރ.މުހައްމަދު މުއިއްޒު ވައުދު ވެވަޑައިގެންފައިވާ ކަމަށެވެ. ނަމަވެސް މިއަދާ ހަމައަށް އެކަމުގެ އަމަލީ އެއްވެސް މަސައްކަތެއް ކޮށްފައިނުވާ ކަމަށް އޭނާ ވިދާޅުވިއެވެ.
