ކުރިއަށް އޮތީ ކައުންސިލް އިންތިޚާބެވެ. އެއިންތިޚާބު ކާމިޔާބު ކުރުމަށް ސަރުކާރުން އެދަނީ ހެދުނު އެއްޗެއް ހެދުމަށް ތައްޔާރުވަމުންނެވެ. އޭގެ މަސައްކަތް އެވަނީ ފަށާފައެވެ. ވަޒީރުންނާއި މަޖިލިސް މެންބަރުން އަދި ސަރުކާރުގެ އެހެނިހެން ބޮޑުންތައް ގޮވައިގެން މުިއްޒު އެވަނީ ރަށްރަށަށް ދަތުރުތައް ފަށަފައެވެ.

މާބޮޑު ކެންޕޭނެއް ކުރާންވެސް ނުޖެހޭ ސަރުކާރު ހިންގާ ޕީއެންސީން އެހާއަވަހަށް ދަތުރުތައް ފެށިއިރު ކެމްޕޭނުގައި އެމީހުން ވިއްކަފާނެ އެއްޗަކާއި ގައުމުގެ ހާލަތާއި ރައްޔިތުން ތިބިގޮތް ބަލާލަން ޖެހެއެވެ.

ޕީއެންސީން ރިޔާސީ އިންތިޚާބުގެ ކެންޕޭނުގައި އެޕާޓީންނާއި ޑރ މުއިއްޒު ވިދާޅުވަމުން ގެންދެވީ ހުރިހާކަމެއްވެސް ކޮށްދެވޭނެ ބަޔަކީ އެބޭފުޅުން ކަމަށާއި ކަންކުރާނެގޮތް އެނގެނީވެސް އެބޭފުޅުންނަށް ކަމަށެވެ. އަދި ގައުމުގެ ހާލަތު، ޚާއްޞަކޮށް އިގްތިސޯދީ ހާލަތު އޮތްގޮތްވެސް އެނގޭ ކަމަށާއި އެކަމުގެ ފަރުވާލެއް ނެތްކަމަށެވެ. ފައިސާ ލިބޭނެ ކޮޅުތަކާއި ގޮތްތައް ހޯދާފައިވާ ކަމަށެވެ. އަދި ހާލަތު ކޮންމެ ގޮތަކަށް އޮތަސް މެނޭޖްކޮށްގެން ހުރިހާ ކަމެއްވެސް ކޮށްނިންމަވާނެ ކަމަށް ވިދާޅުވިއެވެ. މީގެއިތުރުން އެއްވެސް ރަށެއްގައި ހިންގާ ތަރައްގީގެ އެއްވެސް މަސައްކަތެއް ހުއްޓުނަ ނުދޭނެ ކަމަށާއި އެމަސައްކަތްތައް ގެންދާނީ ކުރިއަށްވުރެ ބާރަށް ކުރިއަށް ކަމަށްވެސް ވިދާޅުވިއެވެ. ރައްޔިތުން އެބަހުގައި ހިފައިގެން ވެރިކަން ދިނެވެ.

ދެންއައި ރައްޔިތުންގެ މަޖިލީހުގެ އިންތިޚާބާ ދިމާކޮށް ތާއީދު ހޯދުމަށް ކިޔަމުންދިޔަ މައިގަނޑު ލަވައަކީ ސަރުކާރަށް މެޖޯރިޓީ ނުދީފިނަމަ ކަންކަން ނުވާނެ ކަމަށެވެ. ވެރިކަން ކުރަން އިދިކޮޅުން ހުރަސްއަޅާނެ ކަމަށެވެ. ސަރުކާރުން ކުރާނެ ކަމަށް ބުނި ކަންކަން ކުރެވޭނީ ރައްޔިތުންގެ މަޖިލީހުގެ މެޖޯރިޓީ ސަރުކާރަށް ދީގެން ކަމަށެވެ.

ރައްޔިތުން މަޖިލީހުގެ މެޖޯރިޓީ ބޮޑުތަނުން ދިނީއެވެ. ހަދާނެ އެއްޗެއް ހަދާވަރުގެ ސުޕަރ މެޖޯރިޓީއެކެވެ. ސަރުކާރާ މަޖިލީހުގެ އިންތިޚާބާ ދައުލަތުގެ ޚަޒާނާއާ ހުރިހާ ބާރެއް ދީގެން ވެރިކަން ކުރާތާ މިހާރު ދެއަހަރާ ގާތް ކުރަނީއެވެ. ވީ ކަމެއް ލިބުނު ކުރިއެރުމެއް ނެތެވެ. މީން ދުވަހަކު ނުދާހާ މައްޗަށް ޑޮލަރުގެ އަގު އުފުލި ތަކެތީގެ އަގު އިންތިހާއަށް އެވަނީ ބޮޑުވެފައެވެ. ރައްޔިތުންގެ ހާސްކަން އިތުރުވެ މި ސަރުކާރާމެދު ރައްޔިތުންގެ ހިތްހަމަނުޖެހުން އެވަނީ ބޮޑުތަނުން ބޮޑުވެފައެވެ.

ކުރިއަށް އޮތް ލޯކަލް ކައުންސިލް އިންތިޚާބުގެ ކެންޕެއިން ސަރުކާރުން އެފެށީ ރަށްރަށުގައި ހައްދަވައިގެން ކަމެއް ފެށިފައި ނެތި އަދި ކުރިން ކުރަމުން އައި ކަންކަން ހުއްޓި ރައްޔިތުންގެ ކެތްެރިކަން ކޮޅުން ލައިފާ ވަނިކޮށްށެވެ. ރައްޔިތުންގެ ހާލު ގާތުން ބެލުމުގެ ރީތި ނަމުގައި މުިއްޒާއި އޭނާގެ ބައިވެރިން ކުރަމުން އެދާ ދަތުރުތަކުގެ މައިގަނޑަކީ ލޯކަލް ކައުންސިލް އިންތިޚާބަށް ރަށްރަށުގެ ރައްޔިތުން ބޯކެއުމެވެ. އެކަމަށްޓަކައި އަނެއްކާވެސް އެދަނީ ބޮޑެތި ވައުދުތައް ވަމުންނެވެ. ނިމިދިޔަ ދެ އިންތިޚާބާ ދިމާކޮށް ވެފައިވާ ވައުދުތައް އަނެއްކާވެސް އިތުރު ތާރީޚް ތަކާއެކު އާ ކުރަމުންނެވެ. އޭގެ ތެރެއިން ބައެއް ކަންކަން ކުރަން އިއުލާން ކުރަމުން އެދަނީ އެފަހަރަކު އަރަން ބޭނުންވާ ރަށެއްގެ ނުވަތަ އަތޮޅަކާ ގުޅުވާއެތަނަށް ދިއުމުގެ ކުޑަ ދުވަސްކޮޅެއްގެ ކުރިންނެވެ. އެއިން ކަމެއް ދުވަހަކުވެސް ކޮށްފައި ނުވާ އަދި އޭގެ ކަމެއް ކުރުމުގެ ތަކެއްޗާ މީހުންވެސް ނެތް ސަރުކާރުގެ ކުންފުނިތަކަށް އެފަދަ ބޮޑެތި ޕްރޮޖެކްޓްތައް ހަވާލުކޮށް އެދަނީ ސޮއި ކުރަމުންނެވެ. ބައެއް ރަށްރަށުގައި ބައެއް މަސައްކަތް އެދަނީ ރޭވުމެއް ޕްލޭނެއް ނެތި ކުރަން ފަށަމުންނެވެ. ބައެއް ރަށްރަށުގެ ކަންކަން ހަވާލު ކުރާއިރު ކުރިން އެރަށުގައި އެކަން ކޮށްފައި އޮތްކަންވެސް ނޭނގި ކަންކަން އިއުލާން ކުރަނީއެވެ.

މުއިއްޒުގެ މިހާރުގެ އަމަލްތައް ހުރި ގޮތުން ވައްތަރީ މައުމޫންގެ ދުވަސްވަރު ރަށްރަށުގައި އިންތިޚާބާ ދިމާކޮށް ކަޑަ ޖަހަމުންދިޔަ ބީދައަށެވެ.

ކޮންމެއަކަސް ރައްޔިތުންގެ ލޮލުގައި އަދުން އަޅުވައިގެން ކުރިއަށް އޮތް އިންތިޚާބު ކާމިޔާބު ކުރުމުގެ މަސައްކަތް މުިއްޒު ފަށާފައިވާއިރު އަދި އެހެން މައްނަޒަރެއް ފެންނާނެ ކަމަށް ބެލެވެއެވެ. ރަށްރަށުގައި ފަށަން އުޅޭކަމަށް ދައްކާ ތަރއްގީގެ މަޝްރޫއުތައް ހަވާލުކުރާ ސަރުކާރުގެ ކުންފުނިތަކަށް އެރަށްރަށުން މީހުން ނެގުމެވެ. ވަގުތީ މުވައްޒަފުން ނެގުމެވެ. ރަށުގެ ބޮޑެތި އާއިލާތަކަށް ނިސްބަތްވާ އެކިއެކި މީހުންނަށް ވަގުތީ ވަޒީފާތައް ދީގެން އެ އާއިލާތަކުގެ ބޯ ކާލުމެވެ. ކޮއްކޮ ނުވަތަ ބޭބެ ނޫންނަމަ އާއިލާގެ މީހާގެ ވަޒީފާގެ ދަޅަދައްކުވައިގެން އެއާއިލާތަކުގެ ވޯޓުކޮޅު ޕީއެންސީއަށް ކަހާލުމެވެ. އެވަޒީފާތައް ދަމަހައްޓަން ސަރުކާރު ކެންޑިޑޭޓުން ހޮވަން ޖެހޭނޭ ކަމުގެ މަޖްބޫރީ ހާލަތު އެމީހުންނަށް މެދުވެރި ކުރުވުމެވެ. މުއިއްޒު އެކުޅެނީ ކުރިންވެސް ކުޅުނު ކުޅިއެވެ. ބޭނުން އެކުރަނީ އޭރުވެސް ބޭނުންކުރި އުކުޅެވެ. ހައްދަމުން އެދަނީ ރައްޔިތުން ގުނބޯލެވެ. ދަނޑުމަތީގައިވެސް ދަނޑު އަޅާ ވަރަށެވެ. އެދަނޑު އަޅަން ކަމެއް ނުކޮށް ބައިތިއްބަންވެސް ދުވަސްކޮޅަކަށް ބަޔަކަށް ވަޒީފާ ދީގެންނެވެ. މިއީ މީގެ ކުރީގެ ދެ އިންތިޚާބުގެ ތަޖްރިބާއަށް ބަލައި ރައްޔިތުން ހޭއަރައި ވިސްނަން ޖެހޭ ކަމެކެވެ.