އެމެރިކަން ޗެމްބަރ އޮފް ކޮމާސް ރާއްޖޭގައި ގާއިމުކުރުމުގެ މަސައްކަތް ކުރާ ކަން ހާމަ ކޮށްފި
15 އޯގަސްޓު 2025 | ހުކުރު 02:41ރާއްޖޭގައި އެމެރިކަން ޗެމްބަރ އޮފް ކޮމާސްގެ ޗެޕްޓަރެއް ގާއިމުކުރުމުގެ ޚަބަރު އެމެރިކާ އެމްބަސީގެ މިނިވަން ދުވަހުގެ ރިސެޕްޝަންގައި ވަނީ ހާމަކޮށްފަ. މި ޗެޕްޓަރަކީ ދެ ގައުމުގެ ވިޔަފާރިތަކުގެ ދެމެދު ފާލަމެއްގެ ގޮތުގައި މަސައްކަތްކޮށް، ސަރުކާރުގެ އިޤްތިޞާދީ ލަނޑުދަނޑިތަކަށް އެހީތެރިވެދޭނެ ތަނެއް.
އެމެރިކާގެ މިނިވަން ދުވަސް ފާހަގަ ކުރުމަށް މާލޭ ގައި ބޭއްވި ރިސެޕްޝަން
އެމެރިކަން ޗެމްބަރ އޮފް ކޮމާސް ގެ ޗެޕްޓަރ އެއް ރާއްޖޭގައި ގާއިމުކުރުމުގެ މަސައްކަތް ކުރަމުން ގެންދާ ކަމަށް ރާއްޖެ އަށް އެމެރިކާ އިން ކަނޑައަޅާފައި ހުންނަވާ ސަފީރު ހާމަ ކުރައްވައިފިއެވެ.
އޯގަސްޓް 13 ވަނަ ދުވަހު އެމެރިކާ އެމްބަސީ އިން މާލޭގައި ބޭއްވުނު އެ ގައުމުގެ މިނިވަން ދުވަސް ފާހަގަ ކުރުމުގެ ރިސެޕްޝަން ގައި ދިވެހިރާއްޖޭ ގައި އެމެރިކަން ޗެމްބަރ އޮފް ކޮމާސް (އެމްޗެމް) ގެ ޗެޕްޓަރ އެއް ގާއިމުކުރުމުގެ ޕްލޭން ވަނީ ހާމަ ކޮށްފައެވެ. މީގެ މަޤްޞަދަކީ ދިވެހިރާއްޖެ އާއި އެމެރިކާ އާ ދެމެދު ވިޔަފާރީގެ ގުޅުން ބަދަހިކުރުން ކަމަށް ސަފީރު ވިދާޅުވިއެވެ.
އެމެރިކާގެ މިނިވަން ދުވަހުގެ ރިސެޕްޝަން ގައި ރާއްޖޭގެ ޚާރިޖީ ވަޒީރު އާއި، ޑިޕްލޮމެޓުންނާއި، ސަރުކާރުގެ އިސް ވެރިންނާއި، އުއްތަމަ ފަނޑިޔާރާއި، ވިޔަފާރީގެ އިސް ފަރާތްތަކާއި، ބައިނަލްއަޤްވާމީ މުޖުތަމަޢުގެ މަންދޫބުން ބައިވެރިވިއެވެ.
ދިވެހިރާއްޖެ އަށް ކަނޑައަޅުއްވާފައި ހުންނަވާ އެމެރިކާރިކާގެ ސަފީރު ހިއުގޯ ޔޮން ވިދާޅުވީ އައު ޗެމްބަރަކީ އެމެރިކާ އާއި ދިވެހި ވިޔަފާރިތަކުގެ ދެމެދު ފާލަމެއްގެ ގޮތުގައި މަސައްކަތް ކުރާނެ އަދި ސަރުކާރުގެ އިޤްތިޞާދީ ލަނޑުދަނޑިތަކަށް އެހީތެރިވެދޭނެ ތަނެއް ކަމަށެވެ.
"އެމްޗެމް މޯލްޑިވްސް އިން އެމެރިކާގެ އަދި ރާއްޖޭގެ ވިޔަފާރިތަކަށް ބްރިޖެއްގެ ގޮތުގައި ޚިދުމަތް ކުރާނެ، އަދި ފަތުރުވެރިކަމާއި، އިއާދަކުރަނިވި ހަކަތަ އާއި، ދެމެހެއްޓެނިވި ތަރައްޤީގެ ދާއިރާގައި ސަރުކާރުން އިސްކަންދޭ ކަންތައްތަކާ އެއްގޮތަށް ވަސީލަތްތަކާއި، ނެޓްވޯކިންގ ފުރުޞަތުތަކާއި، ސްޓްރެޓެޖިކް މަގުދެއްކުން ފޯރުކޮށްދޭނެ،" އެމަނިކުފާނު ވިދާޅުވިއެވެ.
ހުށަހެޅިފައިވާ މި ޗެޕްޓަރުން އެޑްވޮކަސީ އާއި، މާކެޓް އިންސައިޓްސް އާއި، ޕްރޮފެޝަނަލް ތަރައްޤީގެ ޕްރޮގްރާމްތައް މެދުވެރިކޮށް ދިވެހިރާއްޖޭގައި ހިންގާ ވިޔަފާރިތަކަށް އެހީތެރިވުމަށް މަސައްކަތް ކުރާނެ އެވެ.
މިހާތަނަށް 100 އަށްވުރެ ގިނަ ޤައުމުތަކުގައި އެމްޗެމް ނެޓްވޯކް ތައް ވަނީ ގާއިމު ކުރެވިފައެވެ.
ޗެމްބަރުގެ އޮނިގަނޑާއި، މެންބަރޝިޕާއި، ފެށުމުގެ ތާވަލާ ބެހޭ ތަފްޞީލުތައް ކުރިއަށް އޮތް މަސްތަކުގައި ހިއްސާކުރެވޭނެ ކަމަށް ބެލެވެއެވެ. އަދި މި މަސައްކަތުގައި ހަރަކާތްތެރިވާ ވާރކިން ގްރޫޕެއް ވަނީ އުފައްދާފައެވެ. މި ގްރޫޕުން ގަވާއިދުން އަޕްޑޭޓްތައް ދޭނެކަމަށް ބުނެފައިވެއެވެ. މި ކަމުގައި ބައިވެރިވުމަށް ޝައުޤުވެރިވާ ވިޔަފާރިތަކަށް ވާރކިންގ ގްރޫޕާ ނުވަތަ ޔޫއެސް އެމްބަސީ އާ ގުޅުމަށް ވެސް ވަނީ އެދިފައެވެ.
