ފުލުހުންގެ ތަހުގީގަށް ގެނައި ގިނަ އަދަދެއްގެ ޑޮލަރު "ގެއްލުނު" މައްސަލައެއް ބަލަނީ
15 އޯގަސްޓު 2025 | ހުކުރު 01:20ފުލުހުންގެ އޮޕަރޭޝަނެއްގައި ހިފެހެއްޓި ފައިސާގެ ތެރެއިން 30،000 ޑޮލަރު މަދުވެފައިވާކަން ފާހަގަކުރެވިފައިވޭ
ބ. ދަރަވަންދޫ ފުލުހުންގެ މަރުކަޒުގެ މަސައްކަތް ރަސްމީކޮށް ފެށުމުގެ ރަސްމިއްޔާތުގެ ތެރެއިން
މީގެ އަަހަރުތަކެއް ކުރިން ފުލުހުން ހިންގި އޮޕަރޭޝަނެއްގައި ހިފެހެއްޓި ފައިސާތަކެއްގެ ތެރެއިން، ގިނަ އަދަދެއްގެ ޑޮލަރު ގެއްލުނު މައްސަލައެއް ބަލަން ފަށައިފިއެވެ.
ފުލުހުން ބުނި ގޮތުގައި މި ފައިސާ އަކީ މީގެ ހަ އަހަރު ކުރިން ހިންގި އޮޕަރޭޝަނެއްގައި ހޯދާފައިވާ ފައިސާއެވެ.
ބުރާސްފަތި ދުވަހުގެ ރޭ ފުލުހުން މީޑިއާތަކަށް ފޮނުވި މެސެޖެއްގައި ބުނީ، 2019 ވަނަ އަހަރުގެ ސެޕްޓެމްބަރު މަހުގެ 15 ވަނަ ދުވަހު ހުށަހެޅި މައްސަލަ އެއްގައި ހިފަހައްޓާފައިވާ ފައިސާގެ ޖުމްލައިގެ 30،000 ޑޮލަރުގެ ފަރަގެއް ހުރިކަން ފާހަގަކުރެވިފައިވާ ކަމަށެވެ.
އެހެންކަމުން ފުލުހުންގެ ކްރިމިނަލް އިންވެސްޓިގޭޝަން ކޮމާންޑުން މި މައްސަލަ ބަލަމުންދާ ކަމަށް ފުލުހުން ހާމަކޮށްފައިވެއެވެ.
ފުލުހުން ބުނިގޮތުގައި، އެ ފައިސާ ބަހައްޓާފައިވާ ތަނުން ހަލާކުވެފައިވާ ނޫޓުތަކެއް ހުރި ކޮތަޅެއް ވަނީ ފެނިފައެވެ. އެ މައްސަލަ ވެސް ފޮރެންސިކް ފުލުހުން މެދުވެރިކޮށް ބަލަމުންދާ ކަމަށް ފުލުހުން ވަނީ ބުނެފައެވެ.
މި ފައިސާ އަކީ ކޮން މައްސަލަ އަކާއި ގުޅޭ ފައިސާކަން ސާފެއް ނުވެއެވެ.
