އިިންތިޚާބުގެ ބައްޔާ އެކު ޑިމޮކްރަޓްސްގެ އޮފިޝަލުންގެ ގެޔަށް ހަމަލާދިން ރިޕަބްލިކަންގެ ކެންޑިޑޭޓެއް 80 އަހަރަށް ޖަލަށް

އެމެރިކާގެ ސްޓޭޓް ހައުސްގެ ގޮނޑި ކާމިޔާބު ކުރުމަށް ވާދަ ކުރި އިންތިޚާބުގައި ނާކާމިޔާބާ ކުރިމަތިލާން ޖެހުނު ރިޕަބްލިކަން ޕާޓީގެ ކެންޑިޑޭޓަކު، ޑެމޮކްރަޓްސް ޕާޓީގެ އޮފިޝަލުންތަކެއްގެ ގެޔަށް ހަމަލާ ދިން މައްސަލައިގައި 80 އަހަރަށް ޖަލަށް ލުމަށް ޙުކުމް ކޮށްފި އެވެ.

ނިއު މެކްސިކޯގެ އެލްބަކާކީގައި 2022 ވަަނަ އަހަރު ބޭއްވުނު އިންތިޚާބުގައި ރިޕަބްލިކަން ޕާޓީގެ ފަރާތުން ވާދަކޮށްފައިވާ ސޮލޮމަން ޕެނާ ވަނީ އެ އިންތިޚާބުން ނާކާމިޔާބުވެފަ އެވެ. އެ ނާކާމިޔާބަށް ފަހު ރިޕަބްލިކަން ޕާޓީގެ އޮފިޝަލުން ތަކެއްގެ ގެޔަށް އޭނާ ހަަމަލާ ދީފައިވާ މައްސަލައިގައި، 80 އަހަރަށް ޖަލަށްލުމަށް ޙުކުމް ކޮށްފައި ވަނީ ބުދަ ދުވަހު އެވެ. 

އިންތިޚާބީ ވައްކަމުގެ މައްސަލަ އާއި އެކަމުގެ ތުހުމަތު ވެސް ޕެނާގެ މައްޗަށް އޮތީ ކޮށްފަ އެވެ. ސްޓޭޓް ހައުސްގެ ގޮނޑި އަށް އޭނާ ކުރިމަތިލައި އިންތިޚާބުން ބަލިވުމަށް ފަހު، ޕެނާ ވަނީ އެ ހަަމަލާތައް ރާއްވައިފަ އެވެ. އެގޮތުން 2022 ވަނަ އަހަރުގެ ޑިސެމްބަރު މަހު އަދި 2023 ވަނަ އަހަރުގެ ޖަނަވަތީ މަހު ޑިމޮކްރަޓްސް ޕާޓީގެ ހަތަރު އޮފިޝަލެއްގެ ގެޔަށް ދިން ހަމަލާތަކާ ގުޅިގެން އޭނާ ވަނީ ބޮޑެތި ކުށްތަކުގެ ތެރޭގައި ހިމެނޭ 13 ކުށެއްގައި ކުށްވެރިވެފަ އެވެ. 

މި ހަމަލާގައި އެއްވެސް މީހަކަށް އަނިޔާވެފައި ނުވި ނަމަވެސް، މިއީ އެމެރިކާގެ ރެޕްރެޒެންޓެޓިވް ނެންސީ ޕެލޯސީގެ ފިރިކަލުުންނަށް ހަތިޔާރަކުން ދެވުނު ހަމަލާއާ އެއް ފަދަ ހަމަލާއެއްގެ ގޮތުގައި ވަނީ ސިފަ ކޮށްފަ އެވެ. 

ޕެނާގެ މައްޗަށް 80 އަހަރުގެ ޖަލު ޙުކުމެއް އިއްވާފައިވާއިރު، އޭނާގެ ޤާނޫނީ ވަކީލު ނިކޮލަސް ހާޓް ވިދާޅުވެފައި ވަނީ ޕެނާގެ ފަރާތުން އެ ޙުކުމް އިސްތިއުނާފު ކުރާނެ ކަމަށެވެ. މި ހަމަލާ ދިނުމުގައި ބައިވެރި ކަމަށް ބުނާ ދެ މީހަކު މިއަހަރުގެ ތެރޭގައި ވަނީ ކުށަށް އިއުތިރާފު ވެސް ވެފަ އެވެ.

އިންތިޚާބުން ބަލިވި ނަމަވެސް، ޕެނާ ވަނީ އިންތިޚާބުގެ ނަތީޖާ ޤަބޫލު ނުކުރާ ކަމަށް އޭރު ވެސް ބުނެފަ އެވެ. އަދި ޕެނާ ވަނީ އިންތިޚާބުގެ ނަތީޖާ ކަށަވަރު ކުރުމަށް ދެކޮޅު ހަދައި އިންތިޚާބީ ބޯޑު މެމްބަރުންނަށް ވެސް އެކަމަށް އަންގައިފަ އެވެ. ނަމަވެސް އެކަން ކުރުމަށް ދެކޮޅު ހެދުމުން، ޕެނާ މި ހަމަލާތައް ރާވާފައިވާ ކަމަށް ޕްރޮސެކިއުޓަރުން ވަނީ ބުނެފަ އެވެ.