ހައްޖުކޯޕަރޭޝަންގެ އެމްޑީ ޝަކީލްގެ އާއިލާ ހައްޖަށް ދިއައީ އުސޫލާއި އެއްގޮތަށްކަމަށް ސިފަކުރައްވާ ޑރ.ޝަހީމް އެކަން ދިފާއުކުރައްވައިފި
2025 ވަނަ އަހަރު ހައްޖަށް ދިއުމަށް ފައިސާ ދައްކާފައިވާ މީހުންގެ ތެރެއިން 850 މީހުން ހައްޖަށް ގޮސްފައިވޭ
އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު، މަޖިލީހަށް ހާޒިރުވެވަޑައިގެން މެމްބަރުންގެ ސުވާލުތަކަށް ޖަވާބުދެއްވަނީ - 12.08.2025
ހައްޖު ކޯޕަރޭޝަން ގެ މެނޭޖިންގ ޑިރެކްޓަރ (އެމްޑީ) މުހައްމަދު ޝަކީލުގެ މައިންބަފައިންނާއި ކޮއްކޮ އަކު މި އަހަރު ހައްޖަށް ގެންދިޔައީ ރަނގަޅަށް ކަމަށް ދޭހަވާ ގޮތަށް ވާހަކަދައްކަވާ، އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު އެކަން ދިފާއުކޮށް ވާހަކަދައްކަވައިފިއެވެ.
އެ މަނިކުފާނު އެފަދައިން ވިދާޅުވީ، 2025 ވަނަ އަރު ހައްޖަށް ދިއުމަށް ފައިސާ ދައްކާފައިވާ މީހުންގެ ލިސްޓުގެ ތަރުތީބުން ހައްޖަށް ގެންދިޔައީ ކިތައް މީހުންތޯ ސާފުކުރުމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ކުރައްވާފައިވާ ސުވާލާއި ގުޅިގެން ޖަވާބުދެއްވަމުންނެވެ.
ހައްޖު ކޯޓާ ފޯރުކޮށްދިނުމުގައި ވަކި މީހަކަށް ނުވަތަ ވަކި އާއިލާ އަކަށް ބަލާފައި ނުވާނެ ކަަމަށް ޑރ.ޝަހީމް ވަނީ ވިދާޅުވެފައެވެ. ވަކި މީހެއްގެ އާއިލާ މީހަކަށްވީތީ އެފަދަ ފުރުސަތެއް ނުދޭނެ ކަމަށް އެ މަނިކުފާނު ވިދާޅުވިއެވެ.
1000 ކޯޓާ އާއި އެކުގައި އެކަށީގެންވާ ވަރަށް އެހީތެރިން ގެންދާ ކަމަށް ޑރ.ޝަހީމް ފާހަގަކުރެއްވިއެވެ.
" އާއިލާ އަށް ބަލައިގެން ޖާގަ ދޭކަށް އުސޫލްތައް ތަނެއް ނުދޭ. ވަކި ބޭފޫޅެއްގެ އާއިލާ މީހަކަށްވީތީ ހައްޖު ކޯޕަރޭޝަނުން ވެސް އިސްލާމިކް މިނިސްޓްރީން ވެސް އެ ފުރުސަތެއް ނުދޭނެ. އެއްވެސް ހާލެއްގައި ވަކި ބަޔަކަށް ފުރުސަތު ދިނުމުގެ ގޮތުން އެހީތެރިންނަށް އެގޮތަކަށް ޖާގަދެވިފަ އެއް ނުވޭ." ޝަހީމް ވިދާޅުވިއެވެ.
2025 ވަނަ އަރު ހައްޖަށް ދިއުމަށް ފައިސާ ދައްކާފައިވާ މީހުންގެ ތެރެއިން 850 މީހުން ހައްޖަށް ގޮސްފައިވާ ކަމަށް އޭނާ ވިދާޅުވިއެވެ.
ހައްޖަށްދާ މީހުންގެ ތެރެއިން އުމުރުން 75 އަހަރުން މަތީގެ ފަރާތްތަކަށް އެކަނި ނޫޅޭވޭނެތީ އެހީތެރިންނަށް ފުރުސަު 44 ފަރާތަށް ދީފައިވާ ކަމަށް ޝަހީމް ވިދާޅުވިއެވެ. އަދި 50 ޖާގާ ޚާއްސަކުރީ ފަގީރުންގެ ތެރެއިން ހައްޖަށް ފޮނުވާދޭ މީހުންނަށް ކަމަށާއި ބާކީ 100 މީހުންނަކީ ބަލި މީހުންގެ އެހީތެރިންނާއި ބަލިތައް ތަހައްމަލްކުރާ މީހުންގެ ތެރެއިން ކައިރު ފުރުސަތެއްގައި ޖާގަ ނުލިބޭ ނަމަ ހައްޖުގެ އަޅުކަން ނުކުރެވިދާނެ ކަމަށް ޤަބޫލުކުރެވޭ މީހުންނަށް ފުރުސަތުދީފައިވާނެ ކަމަށް ވެސް ޝަހީމް ވިދާޅުވިއެވެ.
އިންސާފުވެރިކަމާއި އެކު ކޯޓާގެ ކަންކަން ތަރުތީބުކުރުމަށް އުސޫލުތަކެއް ކަނޑައަޅާފައިވާ ކަމަށް ވެސް ޝަހީމް ވިދާޅުވިއެވެ. އޭގެ ތެރެއިން އެއް ކަމަކީ އަލަށް ހައްޖަށް ދާ މީހުންނަށް އިސްކަން ދިނުން ކަމަށް ޝަހީމް ވިދާޅުވިއެވެ. އޭގެ އިތުރުން ކޮންމެ 5 އަހަރަކުން 1 ފަހަރު ނޫނީ ހައްޖަށް ތަކުރާރުކޮށް ނުދެވޭ ގޮތަށް ހަމަޖެއްސުމާއި، އުމުރުން ދުވަސްވީ މީހުންނަށް ފުރުސަތު ދިނުން ހިމެނޭ ކަމަށް ޝަހީމް ވަނީ ވިދާޅުވެފައެވެ.
ރާާއްޖެއިން މީހުން ހައްޖަށް ދިއުމަށް ދޭ ރަސްމީ ކޯޓާގެ އަދަދަކީ 1000 ކަމަށް ވާއިރު ހައްޖަށް ދިއުމަށް ފައިސާ ދައްކާ އެ ކުންފުނީގެ ހައްޖު ކިއުގައި ވެއިޓްލިސްޓްކުރާ މީހުންގެ އަދަދު އަހަރުން އަހަރަށް އިތުރުވަމުންދާ ކަމަށް ޝަހީމް ވިދާޅުވިއެވެ.
