507 ފުޅި ބަނގުރަލާއި، ކައްކަން ބޭނުންކުރާ ސަމާނާއެކު 3 ބިދޭސިއަކު ހައްޔަރުކޮށްފި - ބަނގުރާ ކަންމަތީ ފިހާރައިގައިވެސް ވިއްކަން ހުރި

507 ފުޅި ބަނގުރަލާއި، ކައްކަން ބޭނުންކުރާ ސަމާނާއެކު 3 ބިދޭސިއަކު ހައްޔަރުކޮށްފިއެވެ.

ފުލުހުން ކުރިއަށްގެންދިޔަ އޮޕަރޭޝަނެއްގައި މ. ރަންފިޔަ ގޭގެ 4 ވަނަ ބުރި ބަލާ ފާސްކޮށް މި މައްސަލައާއި ގުޅިގެން ހައްޔަރުކޮށްފައިވަނީ ބަންގުލަދޭޝް އަށް ނިސްބަތްވާ މީހަކައި އިންޑިއާ 2 މީހުންނެވެ. ފުލުހުން އެތަނަށް ރެއިޑްކުރި އިރު އެތަނުގައި ބަނގުރާ ކަންކަން ހުރީ ތައްޔާރުކޮށްފައެވެ. އަދި ބަނގުރާ ތައްޔާރުކޮށް ވިއްކުމަށް ކޭސް ކޭހަށް އަޅާފައި ހުރީ ބަންދުކޮށްފައެވެ.

Advertisement

ފުލުހުންގެ މި އޮޕަރޭޝަނުުގައި ރާއްޖެއެމްވީގެ ނޫސްވެރިއަކާއި ކެމެރާމަނެއް ވަނީ ބައިވެރިވެ އޮޕަރޭޝަން ކުރިއަށް ގެންދިޔަ ގޮތް ބަލާލާފައެވެ. 2 ރޫމް އެޕާޓްމަންޓެއްގެ ގޮތުގައި ހުރި މިތަނުގެ 1 ކޮޓަރީގައި ބަނގުރާ ކައްކަން ބޭނުންކުރާ ސާމާނާއި އާލާތްތައް ބަހައްޓާފައި ހުއްޓެވެ.

އެގޮތުން އާދައިގެ 2 ތަނުން ކެކޭ ގޭސް އުނދުނަކަށް ދޮޅުފޫޓް ނުވަތަ 2 ފޫޓް ހުންނަ ވަރު ދެ ޕްރެޝަރު ކުކަރު އަރުވާފައި ހުރި އިރު އެއީ ބަނގުރާ ކައްކަން ބޭނުންކުރި ދެ ޕްރެޝަރުކުަކަރެވެ. އަދި އެ ކޮޓަރީގައި އެންމެ ބޮޑު ސައިޒުގެ ބާލިދީތަކުގައި މޭވާ ކުނިކުރަން އަޅާފައި ހުރި އިރު، އެތަނުގެ ތެރޭގައި ބަނގުރާ ކައްކަން ބޭނުންކުރާ އާލާތްތަކާއި ބަންދުކުރާ ސާމާނު ހުއްޓެވެ.

މީގެ އިތުރުން ބަނގުރާ ކައްކަން ގެނެސްފައި ހުރި މޭވާ ކޭސްތަކާއި އެހެނިހެން ސާމާނުވެސް ހުއްޓެވެ. މިއިން ފުޅިއެއް ވިއްކަމުން ދިޔައީ 150 ވަރަކަށް ރުފިޔާއަށެވެ. އަދި އަތުލައިގަތް ބަނގުރަލުގެ އަގު އެކަނިވެސް 75000 އަށްވުރެ މައްޗަށް އަރައެވެ.

މި މައްސަލައިގައި ހައްޔަރުކުރި 3 މީހުން ބަލައި ފާސްކޮށް، އެޕާޓްމަންޓް ބަލައި ފާސްކޮށް ކައްކަން ތައްޔާރުކޮށް ބަންދުކޮށްފައި ހުރި 500 އެމްއެލްގެ 507 ފުޅި ބަނގުރާ ކޭސްތަކުގައި ހުރީ ބަންދުކޮށްފައެވެ. އަދި މި ތަކެތި ކަންމަތީ ފިހާރަތަކަށް ވިއްކަންވެސް ލާފައި ހުއްޓެވެ. އެގޮތުން އެ ސަރަހައްދުގެ ބައެއް ފިހާރަތަކުގެ އިތުރުން އެހެނިހެން ގޮތްގޮތުންވެސް އެ ވިއްކުމުގައި އެމީހުން ހަރަކާތްތެރިވެފައިވެއެވެ.

ފުލުހުން ވަނީ ބަނގުރާ ކައްކަން ބޭނުންކުރި ސާމާނާއި، ބަނގުރާ އަޅާފައި ހުރި ފުޅި ފުލުހުންގެ ބެލުމުގެ ދަށަށް ގެނެސްފައެވެ. އަދި މި މައްސަލަ އަންނަނީ ތަހުގީގުކުރަމުންނެވެ.