އިނީގޯ މާޓިނޭޒް، އަލް ނަޞްރަށް ބަދަލުވެއްޖެ

ބާސެލޯނާ އަށް ކުޅެމުން އައި ސްޕެއިންގެ ޑިފެންޑަރު އިނީގޯ މާޓިނޭޒް، އެ ކުލަބު ދޫކޮށްލުމަށް ފަހު ސައުދީ ޕްރޯ ލީގުގެ އަލް ނަޞްރަށް ބަދަލުވެއްޖެ އެވެ.

އެތުލެޓިކް ބިލްބާއޯ ދޫކޮށްލުމަށް ފަހު، އުމުރުން 34 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2023 ވަނަ އަހަރު އެވެ. ބާސެލޯނާއާ އެކު އެންމެ ފުރަތަމަ އޭނާ ސޮއި ކުރި ދެ އަހަރު ދުވަހުގެ އެއްބަސްވުން މި އަހަރު ހަމަވާން އޮތް ނަމަވެސް، މިއަހަރުގެ މާޗު މަހު އޭނާ ވަނީ ބާސެލޯނާގެ އެއްބަސްވުން އައު ކޮށްފަ އެވެ.

އިތުރު އެއް އަހަރަށް ބާސެލޯނާގެ އެއްބަސްވުން މާޓިނޭޒް އައު ކުރިއިރު، އެ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރު އެވެ. ނަމަވެސް ބާސެލޯނާ އާއެކު މަޝްވަރާ ކުރުމަށް ފަހު، މާޓިނޭޒް ވަނީ އެ ކުލަބާ އެކު ސޮއި ކޮށްފައިވާ އެއްބަސްވުން އުވާލަން ނިންމައިފަ އެވެ. އަދި ހިލޭ ޓްރާންސްފާއެއްގައި އޭނާ ވަނީ ބާސެލޯނާ ދޫކޮށްލަން ނިންމައިފަ އެވެ.

ބާސެލޯނާގައި މުހިންމު ދައުރެއް އަދާ ކުރި މާޓިނޭޒް އެ ކުލަބު ދޫކޮށްލަން ނިންމީ، ސައުދީ ލީގުގެ އަލް ނަޞްރަށް ބަދަލުވުމަށެވެ. އެއަށް ފަހު މިހާރު މާޓިނޭޒް އަލް ނަޞްރުގެ އެއްބަސްވުމުގައި ސޮއި ކޮށްފައިވާއިރު، އެ ކުލަބުން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ.

ހިލޭ އެއްބަސްވުމެއްގެ ދަށުން މާޓިނޭޒް އަލް ނަޞްރަށް ބަދަލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2026 ވަނަ އަހަރާ ހަމައަށް އޭނާ އަލް ނަޞްރުގައި ކުޅޭނެ އެވެ. މިއީ ޖޯޖް ޖީސަސްގެ އިރުޝާދުގެ ދަށުން ކުޅެމުން އަންނަ އަލް ނަޞްރުން މި ފަހަރު ހޯދި ދެ ވަނަ ކުޅުންތެރިޔާ އެވެ. މާޓިނޭޒްގެ ކުރިން އަލް ނަޞްރުން ވަނީ ޕޯޗުގަލްގެ ޔާއޯ ފެލިކްސް ވެސް އެ ކުލަބަށް ގެނެސްފަ އެވެ.

ބާސެލޯނާގައި ހޭދަ ކުރި ދެ ސީޒަންގެ ތެރޭގައި މާޓިނޭޒް ވަނީ އެ ކުލަބަށް ކުޅެދިން 71 މެޗުގައި ތިން ލަނޑު ޖަހައިފަ އެވެ. އަދި ބާސެލޯނާ އާއެކު އޭނާ ވަނީ ސްޕެނިޝް ލީގުގެ އިތުރުން، ކޮޕާ ޑެލް ރޭ އަދި ސްޕެނިޝް ސުޕަ ކަޕް ވެސް ކާމިޔާބު ކޮށްފަ އެވެ.