ޖިއްދާގައި އޮތް މޯލްޑިވިއަންގެ ފުލައިޓުގެ އިންޖީނަށް ދިމާވި މައްސަލަ ހައްލުކޮށް ފުރައިފި
9 އޯގަސްޓު 2025 | ހޮނިހިރު 17:34މައްސަލަ ޖެހުނީ މޯލްޑިވިއަން އަށް އެންމެ ފަހުން ގެނައި އެއަރބަސް ބޯޓު
އިންޖީނު މައްސަލަޖެހިގެން ޖިއްދާ އެއަރޕޯޓުގައި ތާށެވެފައި އޮތް މޯލްޑިވިއަންގެ ފުލައިޓް
މޯލްޑިވިއަންގެ ފުލައިޓުގެ އިންޖީނަށް ދިމާވި މައްސަލަ ހައްލުކޮށް ފުރައިފިއެވެ.
މި ފުލައިޓަކީ މިއަދު ސައުދީ ގަޑިން ހަވީރު 3:45 ގައި ދިވެހި އުމްރާވެރިން ގޮވައިގެން އަންނަން އޮތް ފުލައިޓެވެ. ނަމަވެސް ބޯޓުގެ އިންޖީނަކަށް ދިމާވި މައްސަލައަކާއި ގުޅިގެން ބޯޓު ނުފުރި ޖިއްދާ އެއަރޕޯޓުގައި އޮތުމަށްފަހު މައްސަލަ ހައްލުކޮށް ފުރާފައި ވަނީ ސައުދީ ގަޑިން 6:30 ވި ފަހުންނެވެ.
ރާއްޖެއެމްވީ އަށް މައުލޫމަތު ލިބުނުގޮތުގައި ބޯޓުގެ އެއް އިންޖީނަށް މައްސަލަ ދިމާވެފައި ވަނީ ފުރަން ތައްޔާރުވެފައި އޮއްވައެވެ. އެއިރު ބޯޓު އޮތީ އެއަރ ބުރިޖުން ނެއްޓި ރަންވޭ އަށް ދިއުމަށް ތައްޔާރު ވެފައެވެ. ނަމަވެސް އިންޖީނު ސްޓާޓު ނުވެ ފުލައިޓު ލަސްވުމުން އެކަމާއި ގުޅިގެން މޯލްޑިވިއަންގެ މީޑިއާގައި ސުވާލުކުރުމުން ބުނީ ފުލައިޓް ޑިލޭވީ ކަމަށެވެ. އަދި އެކަމާއި ގުޅުންހުރި މައުލޫމާތު ހޯދުމަށްފަހު ހިއްސާ ކުރާނެ ކަމަށެވެ.
ނަމަވެސް ޖިއްދާގައި އޮތް ބޯޓުގެ އިންޖީނަށް ދިމާވި މައްސަލަ ހައްލުކޮށް ފުރައިގެން ދިޔައިރުވެސް މޯލްޑިވިއަން އިން މައުލޫމާތު ފަހުން ހިއްސާ ނުކުރިއެވެ.
މައުލޫމާތު ލިބިފައިވާ ގޮތުގައި މައްސަލަ ޖެހުނީ މި ސަރުކާރުން ފަހުން ގެނައި އެއަރބަސް ބޯޓަށެވެ.
މި މައްސަލައާއި ގުޅިގެން މޯލްޑިވްސް ހައްޖު ކޯޕަރޭޝަންގެ އެމްޑީ މުހައްމަދު ޝަކީލް ވިދާޅުވީ ހައްޖު ކޯޕަރޭޝަންގެ ހަވާލުގައި އުމްރާއަށް ދިޔަ އުމްރާވެރިން ގޮވައިގެން ހޮނިހިރު ދުވަހު ސައުދީ އަރަބިއްޔާ އިން ރާއްޖެ އަށް އައުމަށްޓަކާ ސައުދީ ގަޑިން ހަވީރު 3:45 ގައި ފުރުމަށް ހަމަޖެހިފައިވާ ފްލައިޓަށް ދިމާވި ޓެކްނިކަލް މައްސަލައަކާ ގުޅިގެން ފުރުން ލަސްވި ފްލައިޓް މައްސަލަ ހައްލުކޮށް ސައުދީ ގަޑިން އިރުއޮއްސި 6:30 ގައި ފުރުމަށް ތައްޔާރުވި ކަމަށެވެ. އަދި ޖުމްލަ ގޮތެއްގައި ހުރިހާ އުމްރާވެރިންގެ ހާލުވެސް ރަނގަޅު ކަމަށް ޝަކީލް ވިދާޅުވިއެވެ.
ރާއްޖެއެމްވީ އާ ވާހަކަ ދެއްކި މީހަކު ބުނީ ބޯޓުގައި މަސައްލަ އެއް އުޅޭކަން އެނގުނީ ފަސިންޖަރުން އެރިފަހުން ކަމަށާއި، މައުލޫމަތު ލިބުނު ގޮތުގައި މައްސަލަ ޖެހުނީ ސްޓާޓިންގ މޯޓަރުގައެވެ. އަދި މައްސަލަ ހައްލުކުރީ ޖިއްދާ އެއަރޕޯޓުގެ އިންޖިނިއަރުންގެ އެހީތެރިކަމާއެކުއެވެ.
އެއަރޕޯޓަށް ވަރަށް ކުރިން ގޮސް އަދި ބޯޓުގައި އުމުރާވެރިން ވަރަށް ގިނަ އިރު ތިބެން ޖެހުނު ނަމަވެސް ހައްޖު ކޯޕަރޭޝަން އިން މާ ބޮޑު އަޅާލުމެއް އެކަމުގައި ބަހައްޓާފައި ނުވާތީ ބައެއް ފަރާތްތަކުން ވަނީ ހިތްހަމަ ނުޖެހުން ފާޅު ކޮށްފައެވެ.
