ލ.މާވަށުގައި ހިންގި މާރާމާރީ އެއްގައި މީހަކު މަރުވި މައްސަލަ އާއި ގުޅިގެން ޒުވާނަކު ހައްޔަރުކޮށްފިއެވެ.

ފުލުހުން ބުނީ ލ.މާވަށުގައި މީހަކަށް ތޫނު އެއްޗަކުން ހަމަލާ ދީ ޒަހަމްކޮށްލާފައިވާ ކަމުގެ މައުލޫމާތު 28 ޖުލައި ވަނަ ދުވަހުގެ ހެނދުނު 10:12 ހާ އިރު ފުލުހުންނަށް ލިބިފައިވާ ކަމަށެވެ. އަދި އަނިޔާވި މީހާ ހޮސްޕުޓަލަށް ގެންދިޔަ އިރު ވެސް ނިޔާވެފައިވާ ކަމަށް، ހޮސްޕިޓަލާއި ހަވާލާދީ ފުލުހުން ވަނީ ބުނެފައެވެ.

ނިޔާވެފައި ވަނީ ލ.މާވަށް، ނަލަހިޔާ އުމުރުން 29 އަހަރުގެ މޫސާ އިބްރާހިމްއެވެ. މިހާތަނަށް ބެލި ބެލުމުން މި މާރާމާރީ ހިނގާފައި ވަނީ ދެ މީހެއްގެ ދެމެދުގައި ކަމަށް އެނގިފައިވާ ކަމަށް ވެސް ފުލުހުން ވަނީ ހާމަކޮށްފައެވެ.

މި މައްސަލަ އާއި ގުޅިގެން ފުލުހުން ހައްޔަރު ކުރި މީހާ އަކީ ހދ.ނޮޅިވަރަންފަރު, އަސަރީ މަންޒިލް، އުމުރުން 29 އަހަރުގެ މުހައްމަދު އިބްރާހިމްއެވެ.

ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.