ރާއްޖޭގެ ޚާރިޖީ ދާއިރާގެ އެންމެ މަތިވެރި ޝަރަފު އަޙުމަދު ސަލީމް (ރަން ރީތި އަޙުމަދު ސަލީމް) އަށް އަރުވައިފި އެވެ.

މިނިވަން ދުވަހުގެ ރަސްމީ ޖަލްސާގައި ސަލީމް އަށް އެ ޝަރަފު އަރުވާފައި ވަނީ ދިވެހި ދައުލަތުގެ މަތީ މަސްލަޙަތު ހިފެހެއްޓުމުގެ އިތުރުން، ބޭރު ޤައުމުތަކާއި، ބައިނަލްއަޤުވާމީ ޖަމިއްޔާ ޖަމާއަތްތަކާ ރާއްޖެއާ ދެމެދު އުފެދިފައިވާ ގާތް ގުޅުން ބަދަހި ކުރުމަށާއި، ރާއްޖޭގެ ތަރައްޤީ އަށްޓަކައި ބޭރުގެ ޤައުމުތަކުން އެކި އެކި އެހީ ހޯއްދަވައި ދިނުމަށާއި، ރާއްޖޭގެ ޚާރިޖީ ދާއިރާގެ ކުރިއެރުމަށާއި، ތަރައްޤީ އަަށްޓަކައި ކުރައްވަމުން ގެންދަވާ މަސައްކަތް ތަކުގެ އަގު ވަޒަން ކުރުމުގެ ގޮތުންނެވެ.

އަޙުމަދު ސަލީމް ދިވެހި ދައުލަތަށް ޚިދުމަތް ކުރައްވަނުން ގެންދަވާތާ ވަނީ ބައި ގަރުނަށް ވުރެ ގިނަ ދުވަސްވެފަ އެވެ. އެންމެެ ގިނަ ދުވަހު ޚިދުމަތް ކުރައްވާފައި ވަނީ ރާއްޖޭގެ ޚާރިޖީ ދާއިރާ އަށެވެ. އެގޮތުން އަޙުމަދު ސަލީމް ދައުލަތަށް ޚިދުމަތް ކުރައްވަމުން ގެންދަވާތާ 54 އަހަރަށް ވުރެ ގިނަ ދުވަސް ވަނީ ވެފަ އެވެ.

އަޙުމަދު ސަލީމް އަށް ޚާރިޖީ ދާއިރާގެ އެންމެ މަތިވެރި ޝަރަފު އެރުވީއިރު އެ ބޭފުޅާ ހުންނެވީ ޚާރިޖީ ވުޒާރާގެ އެމްބެސެޑާ އެޓް ލާޖްގެ މަގާމުގަ އެވެ. ނަމަވެސް ޚާރިޖީ ދާއިރާގެ އެންމެ މަތިވެރި ޝަރަފާ އެކު އެ މަގާމުން އަޙުމަދު ސަލީމް ރިޓަޔާ ކުރައްވާނެ އެވެ.