ޤުބާ އުމްރާ ގުރޫޕުން އުމްރާއަށްދާ ގުރޫޕުތައް ބުރާސްފަތި ދުވަހު ފުރަނީ

ޤުބާ ހައްޖު އެންޑް އުމްރާގެ ފަރާތުން އުމްރާއަށް ދާ ގުރޫޕުތަށް ބުރާސްފަތި ދުވަހު ފުރާނެ ކަމަށް އެ ކުންފުނިން ބުނެފިއެވެ.

ރާއްޖެ އެމްވީއަށް ޤުބާ ހައްޖު އެންޑް އުމްރާ ކުންފުނިން ބުނީ އެ ކުންފުނިން އުމްރާއަށް ދާ ފުރަތަމަ ގުރޫޕުގައި ހިމެނޭ 151 އުމްރާވެރިން ފުރުމަށް ހަމަޖެހިފައި ވަނީ ބުރާސްފަތި ދުވަހުގެ ހެނދުނު 6:30 ގައި ގަތަރު އެއަރވޭސް ގެ ފުލައިޓުން ކަމަށެވެ.

Advertisement

ޤުބާ ހައްޖު އެންޑް އުމްރާ ކުންފުނިން ބުނީ ހެނދުނު ފުރާ ގުރޫޕުގައި ހިމެނޭ 151 އުމްރާވެރިން ޕްރީޗެކިންގ މިހާރު ނިންމާފައިވާ ކަމަށެވެ. އެހެންކަމުން ފުރަން ދާއިރުގައި އެ ފަރާތްތަކުން ގެންދަން ޖެހޭނީ ހަމައެކަނި އަތްދަބަސް ކަމަށް ވެސް ބުންޏެވެ.

އެ ކުންފުނިން ބުނީ އެއަރލައިން ތަކުން ޕްރީ ޗެކިންގ ހަދައިދެނީ ފުރާމީހުންގެ އަދަދު 100 އަށް ވުރެ އިތުރުވުމުން ކަމަށެވެ.

އެ ކިންފުނިން ބުނީ ބުރާސްފަތި ދުވަހު އުމްރާއަށް ފުރާ 36 މީހުންގެ ދެވަނަ ގުރޫޕު ފުރުމަށް ހަމަޖެހިފައިވަނީ ބުރާސްފަތި ދުވަހުގެ ރޭ 11:00 ގައެމިރެޓްސް ފްލައިޓުން ނެވެ.

މި ގުރޫޕުން ފުރާ އުމްރާވެރިންނަށް ބުރާސްފަތި ދުވަހުގެ ރޭ 8:00 އަށް އެއަރޕޯޓަށް ދިއުމަށް އަންގާފައިވާ ކަމަށް އެ ކުންފުނީން ބުންޏެވެ.

ޚިދުމަތްތައް ފުޅާކޮށް، ޤުބާ ހައްޖު އެންޑް އުމްރާ ޖަމާއަތުގެ އައު އޮފީސް ހުޅުވާފައި ވަނީ މިދިއަ އަހަރުގެ އޮކްޓޫބަރު މަހުގެ 20 ގައެވެ.

އޮފީސް ހުޅުވުމަށް ބޭއްވި ރަސްމިއްޔާތުގައި އެ ކުންޕުނީގެ ސެކްރެޓަރީ އަލީ ނަޖީބު ވިދާޅުވެފައިވަނީ ޤުބާ ހައްޖު އެންޑް އުމްރާ ގުރޫޕުން މަސައްކަތް ކުރަމުންދަނީ ރައްޔިތުންނަށް ރަނގަޅު ޚިދުމަތްތަކެއް ފޯރުކޮށްދިނުމަށް ކަމަށެވެ. އަދި ކުރިއަށް އޮތްތަނުގައި ކާމިޔާބު ގުރޫޕަކަށް ހެދުމަށް ގިނަ މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ.

މީގެ އިތުރުން ނަޖީބު ވިދާޅުވީ އެއްވެސް ގުރޫޕަކާއި ބައިވެރިނުވެ އަމިއްލައަށް އުމްރާއަށް ދާން ބޭނުންވާ މީހުންގެ ވިސާއާއި، މައްކާ މަދީނާގެ ތަފާތު ގިންތީ ހޮޓާ ހަރަމާއި ކައިރިންނާއި، ދުރުންވިޔަސް ހަމަޖައްސައިދޭނެ ކަމަށެވެ. އަދި އުމްރާ ގުރޫޕްތަކަށް ދިވެހި ރަހަތަކާއެކު މައްކާގައި ކޭޓަރިންގ ހަމަޖައްސައިދޭނެ ކަމަށް އޭނާ ވިދާޅުވިއެވެ.