އިންޑިއާ އައުޓް ގޮވި މުއިއްޒު، މުޅި ގައުމުގައި އިންޑިއާ ދިދައިން ޖަރީކުރަނީ، ލަދުގެ ކަންފުޅެއް ވެސް ނެތް!

'އިންޑިއާ އައުޓް' ގެ ނަމުގައި އިންޑިއާ އާ މެދު ނަފްރަތު އުފައްދުގެ ބޮޑު ކެމްޕޭނެއް ހިންގި އިސް ފަރާތްތައް ހިމެނޭ ގޮތުން އުފެދިފައިވާ ރައީސް މުހައްމަދު މުއިއްޒުގެ ސަރުކަރުން ރާއްޖޭގެ މިނިވަން ދުވަސް ފާހަގަ ކުރުމުގެ ރަސްމިއްޔާތައް އޮރެންޖް، ހުދު އަދި ފެހިކުލަ ހިމެނޭ އިންޑިއާ ދިދައިން މުޅި ގައުމު ޖަރީކުރަމުން ގެންދާކަމީ މިއަދު ގިނަބެއްގެ ހިތުގައި އެތަކެއް ސުވާލުތަކެއް އުފެދިގެން ގޮސްފައިވާ ކަމެކެވެ.

"އިންޑިއާ އައުޓް"ގެ ދުމުގައި ނުޖެހޭ އެއްވެސް މީހެއް ވެރިކަން ކުރާ ޕާޓީ ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމް، ޕީއެންސީގައި ސިޔާސީ އިސް ސަފުގައި ނުހުންނާނެ ކަމީ މިއަދު އެންމެންވެސް ގަބޫލުކުރާނޭ ހަގީގަތެކެވެ.

ވެރިކަމަށް އައުމަށްޓަކައި ރައީސް މުއިއްޒުގެ ސަރުކާރުން އެންމެ ބޮޑަށް ބޭނުންކުރި އެއްޗަކީ "އިންޑިއާ އައުޓެވެ. ރައީސް އިބްރާހީމް މުހައްމަދު ސޯލިހުގެ ސަރުކާރާމެދު ރައްޔިތުން ނަފްރަތު ކުރުވުމަށް އޭރުގެ އިދިކޮޅުން ޖެހި މަޅިއަކީ އިންޑިއާ އައުޓެވެ.

އެކަމަށްޓަކައި އަދުގެ ސަރުކާރުން އޭރު އިދިކޮޅުގައި އޮވެގެން "އިންޑިއާ އައުޓް" ސްލޯގަންގެ ދަށުން ބޭނުން ކުރީ ވަރުގަދަ ތިން އެއްޗެކެވެ. ދިވެހިންގެ ލޭ ކައްކުވާލާފަދަ މައިގަނޑު ތިން ކަމެކެވެ. މާތްވެގެންވާ އިސްލާމްދީނާ، މިނިވަންކަމާ، ގައުމުގެ ހަމަޖެހުމެވެ.

މިއީ އޭރުވެސް އަދި މިހާރުވެސް މުޅި ރާއްޖޭގެ އެންމެންނަށް ސާފު ކަމެކެވެ. އަދި ކާފީ ހެކީގެ ގޮތުގައި އޭރުގެ ފޮޓޯތަކާއި ވީޑިއޯތައް އަދި އިންޓަވިއުތަކާއި ޖަލްސާތަކާއި މުޒާހަރާތަކުގެ ސްޕީޗްތަކުގައި އެހެރީ ނުފޮރުވޭވަރަށް ރައްކާ ކުރެވިފައެވެ. އެއިން ރެކިގަނެގެން ސަލާމަތް ނުވެވޭވަރަށް އެތަކެތި އެހުރީ ހާމައަށެވެ.

އޭރުގެ އިދިކޮޅު ލީޑަރު އަދި މިހާރުގެ ރައީސުލް ޖުމްހޫރިއްޔާ އިސްކޮށް ހުންނަވައިގެން މާތްވެގެންވާ އިސްލާމްދީނަށްޓަކައި ރާއްޖޭގެ މިނިވަންކަމަށްޓަކައި އަދި ގައުމުގެ ހަމަޖެހުމަށްޓަކައި އިންޑިއާއައުޓް މިބަސް ބޭނުން ކޮށްގެން ނުކުރާ ހަމަ އެންމެ ކަމެއްވެސް ނެތެވެ.

އިންޑިއާގެ އެހީތެރިކަން ހޯދާ ދިވެހި ސަރުކާރުން ކުރަމުންދިޔަ ކަންކަން އޭރު ކަމަކު ނުދިޔައެވެ. އިންޑިއާއާއެކު ހެދި އެއްބަސްވުންތައް އެއީ ސިއްރު ކޮށްގެން ވާނެ އެއްޗެއް ނޫންކަމަށް ގޮވަމުންދިޔައިރު އެއެއްބަސްވުންތަކަކީ ރާއްޖެ އިންޑިއާގެ އަޅުވެތިކަމަށް ވެއްޓިފައިވާ އެއްބަސްވުންތަކެއް ކަމަށް ފާލުގައި ގޮވަމުންދިޔައެވެ.

އެއެއްބަސްވުންތަކާއެކު ރާއްޖޭގެ މައްޗަށް ބާރު ފޯރުވަނީ އިންޑިއާއިން ކަމަށާއި ސަރުކާރު ކޮންޓްރޯލް ކުރަނީ ސީދާ އިންޑިއާއިން ކަމަށް އޭރު އަޑު ހަރުކޮށް ގޮވަމުން ދިޔައެވެ.

ހެލިކޮޕްޓަރާއި ޑޯނިއަރ މަތިންދާ ބޯޓަކީވެސް އެޜުގެ އިދިކޮޅުން ބުނި ގޮތުންނަމަ ރާއްޖޭގެ ހަލާކެވެ. އޭގެ ބޭނުން އިންޑިއާއިން ރާއްޖޭގައި ކުރަނީ ޖާސޫސް ކުރުމަށާއި ރާއްޖޭގެ މައްޗަށް އަތްގަދަ ކުރުމަށެވެ. އެދުއްވަނީ އެމީހުން ބޭނުންވެއްޖިއްޔާ ބޭނުން ހިނދެއްގައި ބޭނުންތާކަށެވެ. އެއެއްޗެހި އޮޕަރޭޓް ކުރަން ތިބެނީ އިންޑިއާގެ މިލިޓްރީ ސިފައިންނެވެ. އެމީހުންގެ މައްޗަށް ދިވެހި ސަރުކާރާއި ދިވެހި ސިފައިންގެ ބާރެއް ނޯވެއެވެ. އެއާ ޚިލާފަށް ދިވެހި ސިފައިންނަށް އަމުރު މައުރޫފް ހިންގަނީ އެމީހުންނެވެ.

ރާއްޖޭގެ އެތައް މިތަނުގައި ތިބި އެތައް ހާސް އިންޑިއާ ސިފައިންނާ މަޝްހޫރު އުތުރު ތިލަފަޅުގައި އިންޑިއާގެ މިލިޓްރީ ބޭހެއް ހަދައިގެން ހިންގާ ވާހަކައަކީވެސް އޭރު ދެއްކި ވާހަކައެވެ. އަދި އެތަންތަންނަށް މީހުން ފޮނުވައިގެން ތަފާތު ޑްރާމާތައްވެސް ކުޅުވީއެވެ.

އެކަންކަމާހުރެ ދިވެހިރައްޔިތުން ތަބާވެގެންތިބި އިސްލާމްދީން ފުހެވޭތީއާއި ގައުމުގެ މިނިވަންކަން ގެއްލޭތީ އަދި ގައުމުގެ ހަމަޖެހުން ގެއްލޭތީ ރައްޔިތުން އޭރުގެ ސަރުކާރު ދެކެ އައީކީ އަމަށަކު ރުޅިއެއް ނޫނެވެ.

އެކަމަކު އިދިކޮޅުން އޭރު ލަދުހަޔާތް ކަނޑާލާފައި އަޑަށް ބާރުލާފައި ތިން އިރު ހުއްޓާނުލައި ދެއްކި އެވާހަކަތައް ގަބޫލުކޮށް ރައްޔިތުން ދިން ވޯޓާއެކު ޑރ މުއިއްޒު ވަނީ އިންތިޚާބު ކާމިޔާބު ކޮށް ވެރިކަމަށް ވަޑައިގެންފަ އެވެ. އެއާއެކުވެސް އައި މަޖިލިސް އިންތިޚާބަށް ޓަކައިވެސް އިންޑިއާ އަށް ރައީސް މުއިއްޒު ބަސްވިދާޅުވީ ވަރަށް ވެސް ހުތުރުކޮށެވެ. އިންޑިއާއަށް ނުކުރާ މަލާމާތެއް ނުކިޔާ އެއްޗެއް ނެތެވެ.

އެކަމަކު ސަރުކާރާ މަޖިލިސް ލިބުމާއެކު ރައީސް މުއިއްޒާއި ސަރުކާރުގެ ރާގުވަނީ މުޅިން ބަދަލު ވެފައެވެ. މިއަދު ރައީސް މުއިއްޒަކަށް އިންޑިއާ ވަރެއް ނެތެވެ. ހުޝާމިދު ކުރުމުގައި މެކުހަށް ޖަހާފައެވެ. ޝުކުރުގެ މާމެލާމެލި ބޮނޑިބޮނޑީގައެވެ. މިހާރު އެންމެ ގާތް ގައުމެވެ. އެއްކަލަ "ގެރި މޯދީ" މުޅިން އެހެން މޯދީއަކަށް ބަދަލުވެ ޝުކުރު ބަރުތީލަ ކުރަނީއެވެ. އިންޑިއާ އައުޓް މަނާކުރާ ގަރާރު އޮތްގޮތައް ބޭއްވީއެވެ.

ދިވެހިރާއްޖޭގެ 60 ވަނަ މިނިވަން ދުވަހުގެ މުނާސަބަތުގައި ބައްވާ ރަސްމީ ޖަލްސާގެ ޝަރަފުވެރި މެހެމާނަކީ ވެސް އެއްކަލަ އިންޑިއާގެ ބޮޑުވަޒީރު ނަރެންދުރާ މޯދީ އައްވެސް މި ސަރުކާރުން މިވަނީ ހަދާފައެވެ. މިނިވަން ދުވަހުގެ ރަސްމީ ޖަލްސާ ޝަރަފުވެރި ކޮށްދެއްވާނީ ވެސް އެއްކަލަ މޯދީ އެވެ.

މިއަދު މުޅި މާލެތެރެއަށް ނުކުމެ ބަލާލާ ހަމަކޮންމެ ދިމާއަކުން ވެސް ފެންނަން ހުރީ އިންޑިއާގެ އޮރެންޖާއި، ހުދު އަދި ފެހިކުލައިގެ ދިދަތަކެވެ. މިނިވަން ދުވަހާއި ދިމާކޮށް އިންޑިއާގެ ދިދައިން މުޅި މާލެ ޖަރީކުރަމުން ގެންދަނީ އެވެ. ބޮޑުވަޒީރު މޯދީ ހިތްޕުޅު ހަޖަހައްސަލަދިނުމަށެވެ. ދިވެހި ރާއްޖެ އިންޑިއާއާއި އެކު އޮތްކަން މޯދީ އަށް ދައްކާލުމަށެވެ. އިގްތިސޯދީ ގޮތުން ރާއްޖެއަށް ދަތިކަން ލިބިފައިވާ މި ދަނޑިވަޅުގައި އިންޑިއާގެ އެހީތެރިކަމެއް ލިބޭތޯ އެވެ.

ރާއްޖޭގެ 60 ވަނަ މިނިވަން ދުވަހާއި ދިމާކޮށް މުޅި ގައުމު އިންޑިއާ ދިދައިން ޖަރީކުރަމުން އަންނައިރު، އިންޑިއާ އައުޓް ކެޕްޕޭނުގައި އެންމެ އިސް ސަފުގައި ތިއްބެވީ މިހާރުގެ ރައީސް މުއިއްޒާއި މި ސަރުކާރުގެ ބޮޑުންނެވެ. އެ ހަނދާންތައް ދިވެހިން ހިތްތަކުން ފިލައިގެން ނުދެއެވެ.

ކޮންމެއަކަސް އޭރުގެ އިދިކޮޅުން ކުރިން އައުޓްކުރަން ނިކުތް އިންޑިއާ" އައުޓް ނުވެ އަދުގެ ސަރުކާރު ސައިޒްވީއެވެ. އިންޑިއާގެ ފައިބުޑަށް ވެއްޓިގަތީ އެވެ. އެއާއެކު ހާމަވެގެން އެދަނީ ރައީސް ޑރ މުއިއްޒުއާއި އަދުގެ ސަރުކާރުގައި ތިބި އިސްމީހުން އޭރު އެދެއްކެވި ވާހަކަތަކަކީ ގައުމުގެ ހަމަޖެހުން ނަގާލުމަށް އަދި ގާނޫނީ ގޮތުން އުފެދިފައިވާ ސަރުކާރާމެދު ރަނގަޅުނޫން ތަސައްވުރެއް އުފެއްދުމަށް ދެއްކި ދޮގު ވާހަކަތަކެއް ކަމެވެ. މިކަމުން ހާމަވަނީ ރައީސް ޑރ މުއިއްޒުގެ އަސްލު ސިފައެވެ.