ޑި ޕައުލް ހޯދުމާ ގާތަށް މިއާމީ އިން ޖެހިލައިފި

އެތުލެޓިކޯ މެޑްރިޑަށް ކުޅެމުން އަންނަ އާޖެންޓީނާގެ ރޮޑްރީގޯ ޑި ޕައުލް ހޯދުމަށް، އެމެރިކާގެ އިންޓަރ މިއާމީ އިން ކުރަމުން އަންނަ މަސައްކަތުގައި، އެ ކުލަބުން އޭނާ ހޯދުމާ ގާތަށް ޖެހިލައިފި ކަމަށް މީޑިއާ ރިޕޯޓުތައް ބުނެފި އެވެ.

އުޑިނޭސީ ދޫކޮށްލުމަށް ފަހު، ޑި ޕައުލް އެތުލެޓިކޯ އަށް ބަދަލުވީ 2021 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރު އެވެ. އޭނާގެ އެއްބަސްވުމުގައި ބާކީ އެއް އަހަރު އޮތްއިރު، މިއާމީ އިން އަންނަނީ އޭނާ ހޯދުމުގެ މަސައްކަތް ކުރަމުން ކަމަށް މީޑިއާ ތަކުގައި ވަނީ ބުނެފަ އެވެ.

މިއާމީ އިން އަންނަނީ ޑި ޕައުލް ހޯދުމުގެ މަޝްވަރާތައް އެތުލެޓިކޯއާ އެކު ކުރިއަށް ގެންދަމުންނެވެ. މީޑިއާ ތަކުގައި ބުނެފައިވާ ގޮތުން، ކުރިއަށް އޮތް ދުވަސް ތަކުގެ ތެރޭގައި މިއާމީ އިން ޑި ޕައުލްގެ ޑީލް ކާމިޔާބުކޮށް، އޭނާގެ ސޮއި ހޯދުމުގެ ފުރުސަތު ވަރަށް ބޮޑެވެ.

މީޑިއާ ތަކުގައި ބުނެފައިވާ ގޮތުން މިހާރު މިއާމީ އިން ވަނީ އެތުލެޓިކޯ އާއެކު އިބްތިދާއީ އެއްބަސްވަމަކަށް އައިސްފަ އެވެ. އެކަމުގައި ޝާމިލުވާ ހުުރިހާ ފަރާތްތަކެއް މެދުގައި އަދި ވެސް މަަޝްވަރާތައް ކުރިއަށް ގެންދަމުން އަންނަ ކަމަށާއި، މިހާރު ކުރިއަށް ދަނީ އެންމެ ފަހުގެ ކަންކަން ފައިނަލް ކުރުމުގެ މަޝްވަރާ ކަމަށް ބުނެފައިވެ އެވެ.

މީގެ ކުރިން މީޑިއާ ތަކުގައި ބުނެފައިވާ ގޮތުގައި ޑި ޕައުލް ހޯދުމަށް މިއާމީ އިން ދެ ޕްލޭނެއް ގެންގުޅުނެވެ. އެގޮތުން އެންމެ ފުރަތަމަ ބޭނުން ވަނީ މި ސީޒަންގައި އޭނާ ގެނައުމަށެވެ. އެގޮތުން އޭނާގެ އެއްބަސްވުން އުވާލުމަށް ދައްކަން ޖެހޭ ފީ ދެއްކުމަށް ވެސް މިއާމީ އޮތީ ތައްޔާރަށް ކަމަށް ބުނެފައިވެ އެވެ.

ނަމަވެސް އެކަން ނުވެއްޖެ ނަމަ، ދެން މިއާމީ އިން ބޭނުން ވަނީ އަންނަ އަހަރު އޭނާގެ އެއްބަސްވުމުގެ މުއްދަތު ހަމަވުމުން ހިލޭ ޓްރާންސްފާއެެއްގެ ދަށުން އޭނާ ހޯދުމަށް ކަމަށް ވެސް އޭރު މީޑިއާ ތަކުގައި ބުނެފައިވެ އެވެ.

މިއާމީ އިން އޭނާ ހޯދުމުގެ މަސައްކަތް ކުރަމުން އަންނައިރު، މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އަކީ ޑި ޕައުލްއާ ގާތް ގުޅުމެއް އޮންނަ ކުޅުންތެރިޔެކެވެ. އާޖެންޓީނާ ޤައުމީ ޓީމުގައި މި ފަހަކަށް އައިސް މި ދެ ކުޅުންތެރިންގެ ގުޅުން ފާހަގަ ކޮށްލެވެ އެވެ.

ޑި ޕައުލް ވަނީ މިހާތަނަށް އޭނާ އެތުލެޓިކޯ އަށް ކުޅެދިން 187 މެޗުގައި 14 ލަނޑު ޖަހައިފަ އެވެ. މީގެ އިތުރުން އޭނާ ވަނީ އާޖެންޓީނާ ޤައުމީ ޓީމަށް ކުޅެދިން 78 މެޗުގައި ދެ ލަނޑު ޖަހައިފަ އެވެ. އާޖެންޓީނާ އާއެކު އޭނާ ވަނީ ފީފާ ކުލަބު ވޯލްްޑް ކަޕްގެ އިތުރުން، ކޮޕާ އެމެރިކާ އަދި ބައްރުތަކުގެ މެދުގައި ކުޅޭ ފައިނަލިސިމާ ކާމިޔާބު ކޮށްފަ އެވެ.