ފްލެޓް ލިބުނު މީހުންގެ އަނބިމީހާ ނުވަތަ ފިރިމީހާ އަށް، ބިންވެރިޔާ ސްކީމުން ލިބުނު ގޯތި ދޫކޮށްލަން ޖެހޭ ގޮތަށް މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރ އިން ނިންމި ނިންމުން ބަދަލުކޮށްފިއެވެ.

އެކަން ހާމަކުރީ ގެދޮރުވެރިޔާ ސްކީމްގެ ދަށުން ދޫކުރާ ފްލެޓް ދޫކުރުމުގެ އުސޫލުގެ ދަށުން، ދޫކުރުމަށް ހަމަޖެހިފައިވާ 4000 ފްލެޓްގެ އުސޫލާއި ގުޅޭ ގޮތުން ޖުލައި 19ވީ ހޮނިހިރު ދުވަހު ކުރި އިއުލާނެއްގައެވެ.

އެ އިއުލާން ނެރެފައި ވަނީ އެ މިނިސްޓްރީން 29 މޭއި 2025ގައި އާއްމު ކުރި އިއުލާނާއި ހަވާލާދީއެވެ. 29 މޭއިގައި އާއްމު ކުރި އިއުލާންގައި ބުނެފައި ވަނީ ގެދޮރުވެރިޔާ ސްކީމުން ފްލެޓް ލިބޭ ފަރާތްތައް ކަނޑައެޅުމުގައި، ބިންވެރިޔާ ސްކީމުން އެ މީހެއްގެ އަނބިމީހާ އަށް ނުވަތަ ފިރިމީހާ އަށް ގޯތި ލިބިފައިވާ ފަރާތްތަކުގެ ތެރެއިން، ގެދޮރުވެރިޔާ ސްކީމުން ފްލެޓް ލިބޭނީ ބިންވެރިޔާ ސްކީމުން އެ މީހެއްގެ ފިރިމީހާ ނުވަތަ އަނބިމީހާ އަށް ލިބިފައިވާ ގޯތި ދޫކޮށްލަން އެއްބަސްވާ ފަރާތްތަކަށް ކަމަށެވެ.

އެކަމަކީ ރައްޔިތުންގެ ކަންބޮޑުވުން ހުރި ކަމެއް ކަމަށް ވާތީ، ބިންވެރިޔާ ސްކީމްގެ ދަށުން މާލެ ސަރަހައްދުން ބިން ދޫކުރުމަށް ހަމަޖެހިފައިވާ ހުޅުމާލެ ފޭސް 3 އަދި ގިރާވަރުފަޅު ހިއްކުމުގެ މަސައްކަތް ކުރިއަށް ދާތީ، އެތަނުގައި ބިންތައް އިމާރާތްކޮށް ދިރިއުޅެން ވަގުތު ނަގާނެ ކަަމަށް އެ އިއުލާންގައި ބުނެފައިވެއެވެ. އެހެންކަމުން 29 މޭއިގައި އާއްމު ކުރި އިއުލާނަށް އަމަލު ނުކުރަން ނިންމާފައިވާކަން އެ މިނިސްޓްރީން ވަނީ ފާހަގަކޮށްފައެވެ.

އެ އިއުލާންގައި އިތުރަށް ބުނެފައި ވަނީ 15 ނޮވެމްބަރު 2023ގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރ އިން އިއުލާން ކުރި ލިސްޓާއި ގުޅިގެން، ފްލެޓް ނަމްބަރު ގުރުއަތު ނަގާ ލިބޭ ފްލެޓް ކަނޑައަޅާފައިވާ ފަރާތްތަކުގެ ތެރެއިން، އަނބިމީހާ ނުވަތަ ފިރި މީހާ އަށް ގޯތި ލިބިފައިވާ މީހުންނަށް ޝަރުތު ހަމަނުވާ ކަމަށް މިހާތަނަށް ލިޔުން ހަވާލުކޮށްފައި ނުވާނެ ކަމަށެވެ.