އީރާން އާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާތަކުގައި، އީރާން އިން ޔުރޭނިއަމް އުފެއްދުން ހުއްޓާލުމަށް އެމެރިކާ އިން ބާރު އަޅާ ނަމަ، އެ ޤައުމުން މަޝްވަރާތަކުގައި ބައިވެރި ނުވާނެ ކަމަށް ބުނެފި އެވެ. 

އީރާންގެ ޚާރިޖީ ވުޒާރާ އިން ހޯމަ ދުވަހު ބުނެފައި ވަނީ އެމެރިކާ އާއި އީރާނާ ދެމެދު ކުރިއަށް ގެންދަމުން އައި ނިއުކްލިއާ މަޝްވަރާތައް އަލުން ކުރިއަށް ގެންދިޔުމަށް، އީރާން އިން މިހާތަނަށް ވަނީ ތާރީޚެއް ކަނޑައަޅާފައި ނުވާ ކަމަށެވެ. 

އީރާންގެ ރޫޙާނީ ލީޑަރު އާޔަތުﷲ އަލީ ޚާމަނާއީ އަށް ލަފާދޭ ފަރާތެއް ކަމަށްވާ އަލީ ވެލަޔަތީ ވިދާޅުވެފައި ވަނީ، އީރާން އިން ޔުރޭނިއަން އުފެއްދުން ހުއްޓާލުމަކީ މަޝްވަރާތަކުގެ ޝަރުތެއް ކަމަށްވާ ނަމަ، އެ ފަދަ މަޝްވަރާތަކެއް ނުބޭއްވޭނެ ކަމަށެވެ. 

މިދިޔަ ޖޫން މަހުގެ ތެރޭގައި އިސްރާއީލް އިން އީރާންގެ ނިއުކްލިއާ މަރުކަޒުތަކަށް ދިން ހަމަލާގެ ސަބަބުން، އިސްރާއީލާއި އީރާނާ ދެމެދު 12 ދުވަހުގެ މުއްދަތަކަށް ހަނގުރާމަ ކުރިއަށް ދިޔައިރު، ވަކި ހިސާބަކުން އެމެރިކާ އިން ވެސް ވަނީ އެ ހަނގުރާމައިގެ ތެރެއަށް ވަދެ އީރާން އަށް ހަމަލާ ދީފަ އެވެ. 

މިއަހަރުގެ އޭޕްރީލް މަހުގެ ތެރޭގައި އީރާން އާއި އެމެެރިކާއާ ދެމެދު ވަނީ ނިއުކްލިއާ ޕްރޮގްރާމްއާ ގުޅޭ މަޝްވަރާތައް ފަށައިފަ އެވެ. އެ މަޝްވަރާތަކުގެ ހަ ވަނަ ބުރުގެ ބައްދަލުވުމެއް ބާއްވަން ނިންމާފައި ވަނިކޮށް، އިސްރާއީލާއި އީރާނާ ދެމެދު ފެށުނު ހަނގުރާމައިގެ ސަބަބުން ވަނީ މަޝްވަރާތައް މެދު ކަނޑާލަން ޖެހިފަ އެވެ. 

އެކަމާ ގުޅިގެން އީރާންގެ ރައީސް މަސްއޫދު ޕެޒެޝްކިއާން ވިދާޅުވެފައި ވަނީ، އެ ޤައުމުން ޑިޕްލޮމަސީ އާއި އެކުވެރި ގުޅުންތަކަށް ތާއީދު ކުރާ ކަމަށެވެ. އަދި ޑިޕްލޮމަސީގެ ދޮރު އަދިވެސް ހުޅުވިފައިވާ ކަމަށާއި، އެ ޤައުމުން އޮތީ ކުރިއަށް ދާން ތައްޔާރަށް ކަމަށް ވެސް ވިދާޅުވި އެވެ. 

އެމެރިކާ އިން އީރާން އަށް ހަމަލ ދިނުމާ ގުޅިގެން، ހަމަލާ ދޭނެ ކަމުގެ އިންޒާރު ދިނުމަށް ފަހު، އީރާން އިން ވަނީ ޤަތަރުގައި ހުރި އެމެރިކާގެ ބޭސް އަކަށް އަމާޒުކޮށް ހަމަލާ ވެސް ދީފަ އެވެ. 

އެމެރިކާ އާއި އީރާންއާ ދެމެދު ކުރިއަށް ގެންދަމުން އައި މަޝްވަރާތަކުގެ މެދުވެރިއެއްގެ ދައުރު އަދާ ކުރީ އޮމާން އިންނެވެ. އެ މަޝްވަރާތަކުގައި މީގެ ކުރިން ވެސް އެމެރިކާ އިން ވަކާލާތު ކޮށްފައި ވަނީ، އީރާން އިން ޔުރޭނިއަމް އުފެއްދުން ހުއްޓާލަން ޖެހޭނެ ކަމަށެވެ. ނަމަވެސް، އީރާން އިން އެކަމާ ދެކޮޅު ހަދަ އެވެ. އެ ޤައުމުން ބުނަމުން އަންނަނީ އެއީ އެ ޤައުމަށް ލިބިގެންވާ ޙައްގެއް ކަމަށާއި، އެ ހައްގު ދޫކޮށް ނުލާނެ ކަމަށެވެ.