ޓްރޭޑްމާކާއި ބެހޭ ބިލު - ޣަފޫރު ވިދާޅުވީ މިއީ ވަރިކައިވެންޏާ ބެހޭ ގާނޫނެއް އޮއްވާ ދެއަންބަތް މީހުންނާ އިނުމާ ބެހޭ ބިލެއް އަނެއްކާ ހުށަހެޅުން ކަމަށް
14 ޖުލައި 2025 | ހޯމަ 14:48ރާއްޖޭގައި ފިކުރީ މުދާ ހިމާޔަތްކުރުމަށް ފުރިހަމަ ގާނޫނެއް ހެދިފައިވޭ
ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ)
ކޮޕީރައިޓްސްއާއި ބެހޭ ގާނޫނެއް އޮއްވާ ޓްރޭޑްމާކާއި ބެހޭ ބިލެއް ހުށަހެޅުމަކީ ވަރިކައިވެންޏާ ބެހޭ ގާނޫނެއް އޮއްވާ ދެއަންބަތް މީހުންނާ އިނުމާ ބެހޭ ބިލެއް ހުށަހެޅުން ކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަ ދައްކަވަމުން ގަޕޯ ވިދާޅުވީ ވަރިކައިވެންޏާ ބެހޭ ބިލެއް، ގާނޫނެއް އޮއްވާ ދެއަންބަތް މީހުންނާ އިނުމާ ބެހޭ ގާނޫނެއް އަނެއްކާ ހުށަހެޅުން އެއީ އެންމެ ރަނގަޅު ގޮތްތޯ ސުވާލު އުފައްދަންޖެހޭ ކަމަށެވެ. އަދި ރާއްޖޭގައި ފިކުރީ މުދާ ހިމާޔަތްކުރުމަށްޓަކައި ފުރިހަމަ ގާނޫނެއް ހެދިފައިވާ ކަމަށާއި، އެ ގާނޫނުން ހިމާޔަތް ނުކުރެވޭނެ އެއްވެސް އެއްޗެއް ނެތް ކަމަށެވެ.
އެއީ ކޮޕީރައިޓްސްއާ ބެހޭ ގާނޫނު. އެ ގާނޫނުގައި އެ ހުރީ އިންސާނާގެ ބުއްދިން ބޭރުކުރާ ހުރިހާ އެއްޗެއް ހިމާޔަތްކުރެވޭ ގޮތަށް. އަދި އޭގެ އިތުރަށް ކުރަހާ ކުރެހުންތަކާއި، އުފައްދާ އުފެއްދުންތަކާއި، އެންމެހައި އެއްޗެހި ހިމާޔަތްކުރެވޭ ގޮތަށް އޮތް ފުރިހަމަ ގާނޫނެއް އިއްޒަތްތެރި ރައީސް. އެހެން އެ ގާނޫނު އޮއްވާ ޓްރޭޑްމާރކޭ ކިޔާފައި އަނެއްކާ ގާނޫނެއް ނެރުނީމާ ކޮޕީރައިޓްސްއާ ބެހޭ ގާނޫނުން ވެސް އެބަ ފުށުއަރާ، ވިޔަފާރިކުރުމާ ބެހޭ ގާނޫނުވެސް އެބަ ފުށުއަރާ، މެދު ފަންތީގެ ވިޔަފާރިތަކާ ބެހޭ ގާނޫނަށް ވެސް މި ގާނޫނު އެބަ ފުށު އަރާ އިއްޒަތްތެރި ރައީސް. އަޅުގަނޑުމެން އެ ގާނޫނުގައި އުނިކަމެއް ވާނަމަ އެ އުނިކަމަށް އިޞްލާޙީ ބަދަލެއް އަޅުގަނޑުމެން ހުށަހަޅަން ޖެހޭނީ. އަނެއްކާ ވެސް ގާނޫނެއް ހަދާފައި މުޖުތަމަޢަށް ދޫކޮށްލީމާ މި ހުރިހާ ގާނޫނެއް ފުށުއެރީމާ ރައްޔިތު މީހާ ދެން އުޅޭނެ ގޮތެއް ވެސް ދެން އެބަޖެހޭ އިއްޒަތްތެރި ރައީސް، ހޯދަން. ފުލުހުން އެބަޖެހޭ މި ގާނޫނުތައް ތަންފީޒުކުރަން. އަދި ދައުލަތުގެ މުއައްސަސާތަކުން އެބަޖެހޭ މި ގާނޫނުގައި މި ހުރި އެއްޗެހި ރައްޔިތުންނަށް ކިޔައިދޭން.ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ)
ގަޕޯ ވިދާޅުވީ އެއްވެއް ރައްޔިތަކު އުފައްދާ އެއްވެސް އެއްޗެއް އެއީ ޓްރޭޑް މާކްކަމުގައިވިޔަސް އަދި އެ މީހާގެ ދަރިޔަކު ކަމުގައި ވިޔަސް ވުޖޫދުން ގެއްލިގެންދާނެ އެއްވެސް ގޮތެއް ނެތް ކަމަށެވެ. އަދި އެހުރިހާ ގާނޫނެއް ލިޔެވިފައި ގެޒެޓްކުރެވިފައި ގާނޫނުތަކުގެ ތެރޭގައި ހުންނާނެ ކަމަށެވެ.
ގަޕޯ ވިދާޅުވީ ގައުމު ހުއްޓުން އަރައިގެން އުޅެނީ ގާނޫނު މަދުވެގެން ނޫން ކަމަށެވެ.
ތި ބޭފުޅުން ބައްލަވާ ކޮޕީރައިޓްސްއާ ބެހޭ ގާނޫނު. އޭގައި ކޯ އްޗެއްތޯ ނެތީ؟ މިއަދު ޓްރޭޑްމާރކް ވެސް ހަމަ ބަރާބަރަށް ގާނޫނުގެ ދަށުން ރަޖިސްޓަރީކުރެވިގެން ހިމާޔަތްކުރެވިފައި ހުރީ އެ އެއްޗެހި އިއްޒަތްތެރި ރައީސް. އެހެންވީމާ، ގާނޫނެއް މި ތަނަށް، ބިލެއް މި ތަނަށް ހުށަހަޅައިގެން ސަނާ ކިޔާވަރުގެ ބިލެއްތޯ މިއީ އެ ސުވާލު ހަމަ ވަރަށް ބޮޑަށް އިއްޒަތްތެރި ރައީސް، އެބަ އުފެދޭ އިއްޒަތްތެރި ރައީސް. މިއަށްވުރެ މާ މުހިންމ ކަންތައްތައް މިއަދު ޤައުމަށް ބޭނުންވެފައި އެބަހުރި އިއްޒަތްތެރި ރައީސް. އެ ކަންކަމާ ބެހޭގޮތުން އަޅުގަނޑުމެން ގާނޫނު ހަދައިގެން މި ތަނަށް ހުށަހަޅަންވީ އިއްޒަތްތެރި ރައީސް. ރައްޔިތުންނަށް ބޭނުންވަނީ ޚިދުމަތް. އެޚިދުމަތްތައް ފޯރުކޮށްދިނުމަށް ޓަކައި އަޅުގަނޑުމެން ޖެހޭ އެބަ އެ މަސައްކަތްކުރަން އިއްޒަތްތެރި ރައީސް. މި އުޅެނީ ލޯގޯ ރަޖިސްޓަރީ ނުކުރެވިގެނެއް ނޫން. އެއީ މާ ކުރިން ވެ ނިމިފައި އޮތް ކަމެއް. އެ ކަން ބަރާބަރަށް ހިނގަމުން އެބަދޭ އިއްޒަތްތެރި ރައީސް.ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ)
ގަޕޯ ވިދާޅުވީ ބިލު ގާނޫނަކަށް ވެއްޖެއްޔާ ދެން ހުރި ހުރިހާ ގާނޫނެއް ފުށުއަރައިގެން އުޅެންވާ ގޮތާ ނޫޅެންވާ ގޮތާވެސް އޮންނާނީ އޮޅިފައި ކަމަށެވެ. އަދި މިއީ ފުންކޮށް ވިސްނާލަންޖެހޭ ކަމެއް ކަމަށް ގަޕޯ ވިދާޅުވިއެވެ.
