ޓްރޭޑްމާކް ގެ ހައްގުތައް ހިމާޔަތްކޮށް ރައްކައުތެރި ކުރުމަށް، ގާނޫނެއް ހެދުމަށް ރައްޔިތުންގެ މަޖިލިހަށް ބިލެއް ހުށަހަޅައިފިއެވެ.

ޓްރޭޑްމާކް ގެ ހައްގުތައް ހިމާޔަތް ކުރުމުގެ ގޮތުން އެޅޭނެ ފިޔަވަޅުތައް މި ބިލުގައި ވަނީ ބަޔާން ކޮށްފައެވެ.

ސަރުކާރުގެ ފަރާތުން މަޑުއްވަރީ ދާއިރާގެ މެމްބަރު އަހްމަދު ޒާހިރު ހުށަހަޅުއްވާފައިވާ މި ބިލުގެ ބޭނުނަކީ ދިވެހި ރާއްޖޭގައި އުފެއްދުންތެރިންނާއި ފަންނުވެރިންނަށް ފަހި މާހައުލެއް ގާއިމު ކުރުމަށްޓަކައި ޓްރޭޑްމާކް ރަޖިސްޓަރީ ކޮށްދިނުމާ ގުޅޭ ނިޒާމެއް ގާއިމު ކޮށް ކަމާ ގުޅޭ މައިގަނޑު އުސޫލުތައް ކަނޑައެޅުން ކަމަށެވެ.

އޭގެ އިތުރުން ރަޖިސްޓަރީ ކުރެވޭ ޓްެރޭޑްމާކް އާ ރަޖިސްޓަރީ ކޮށްފައި ނުވާ ޓްރޭޑްމާކް އާ ގުޅިގެން ޓްރޭޑްމާކް އަށާއި އޭގެ ވެރިފަރާތްތަަކަށް ލިބިގެންދާނެ ހައްގުތަކުގެ ދާއިރާ ތައް ބަޔާން ކުރުމާއި ޓްރޭޑްމާކްގެ ހައްގަށް އަރައިގަންނަ އަމަލު ތަކާ ގުޅިގެން އަޅާނެ ފިޔަވަޅުތައް ހައްގު ގެެއްލޭ ފަރާތްތަކަށް ލިބިދެވޭނެ ފަރުވާ ކަނޑައެޅުމެވެ.

މި ބިލު ބުނާ ގޮތުން ޓްރޭޑްމާކް އަކީ އެއް ފަރާތެއްގެ މުދާ ނުވަތަ ޚިދުމަތްތައް އަނެއް އަނެއް ފަރާތެއްގެ މުދާ ނުވަތަ ޚިދުމަތްތަކާ ތަފާތު ކުރުމުގެ ގާބިލުކަން ލިބިފައިވާ ކޮންމެ ނިޝާނެއް ކަމަށާއި، ޓްެރޭޑްމާކް އާ ގުޅިގެން އެކްސްކްލޫސިވް ހައްގު ލިބޭނީ އެ މާކް ރަޖިސްޓަރީ ކުރުމުން ކަމަށެވެ.

ބިލު ގާނޫނަކަށް ވުމުން ޓްރޭޑްމާކެއްގެ ގޮތުގައި އެއްވްސް ނިޝާނެއް ރަޖިސްޓަރީ ކޮށްދެވޭނީ މި ގާނޫނާއި މި ގާނޫގެ ދަށުން ހަދާ ގަވައިދުގައި ބަޔާން ކުރާ ގޮތުގެ މަތިން ކަމަށް ބުނެފައިވެއެވެ.

ރައްޔިތުންގެ މަޖިލީހުގައި ޖުލައި 15 ވާ އަންގާރަ ދުވަހު ބިލުގެ ބަހުސް ކުރިއަށް ގެންދިޔުމަށް ވަނީ އެޖެންޑާ ކޮށްފައެވެ.