ރައްކާތެރި ދަނޑުވެރިކަން ދަސްކުރަން ކައުންސިލްތައް އިންޑިއާ އަށް

ކެމިކަލާ ނުލާ ރައްކާތެރިކަމާ އެކު ދަނޑުވެރިކަން ކުރާނެ ގޮތުގެ ތަމުރީނު ދިނުމަށް ބައެއް ކައުންސިލްތައް އިންޑިއާގެ ގެންދަން ނިންމައިފިއެވެ.

މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ބުނީ ކައުންސިލްތައް ގޮވައިގެން އިންޑިއާ އަށް ދާން ނިންމީ، ރާއްޖޭގައި އުފައްދާ ދަނޑުވެރިކަމުގެ ބާވަތްތަކަކީ ކެއުމަށް ރައްކާތެރިކޮށް އުފައްދާ ތަކެތިތޯ ކަށަވަރުކުރުމަށް ރަށު ފެންވަރުގައި މަސައްކަތްކުރެވޭނެ ނިޒާމެއް ގާއިމްކުރުމުގެ މަސައްކަތައް ތައްޔާރުވުމުގެ ގޮތުން ކަމަށެވެ. މި މަސައްކަތުގެ ދަށުން ކައުންސިލްތައް އަހުލުވެރިކުރުމުގެ ޕްރޮގްރާމެއް ފަށާފައިވާ ކަަމަށް އެ މިނިސްޓްރީން ބުނެފައި ވެއެވެ.

ޕީއެސްއެމްއަށް މައުލޫމާތު ދެއްވަމުން ފިިޝަރީޒް މިނިސްޓްރީގެ އިސް ބޭފުޅެއް ކަމުގައިވާ އަލީ އާމިރު ވިދާޅުވީ، މޯލްޑިވްސް ފީލްޑް އޮފިސަރ ޓްރެއިން ޕްރޮގުރާމްގެ ނަމުގައި ފަށާ މި ޕްރޮގުރާމަކީ މީގެ ފުރަތަމަ ޕްރޮގުރާމް ކަމަށެވެ. އިންޑިއާ ސަރުކާރުގެ އެހީތެރިކަމާ އެކު ކުރިއަށްގެންދާ މި ޕްރޮގުރާމްގައި ހަ ކައުންސިލަކުން ހަ މުވައްޒަފުން އިންޑިއާގެ ޓެމިލްނާޑު އެގްރިކަލްޗަރ ޔުނިވާސިޓީގައި ތަމްރީން ހޯދާނެ ކަމަށް ވެސް އަލީ އާމިރު ވިދާޅުވިއެވެ.

ދަނޑުވެރިކަން ކުރިއަރުވާ އާލާ ކުރުމުގެ ގޮތުން މި ސަރުކާރުން ގިނަ ގުނަ މަސައްކަތްތަކެއް ފަށާފައިވެއެވެ. އެގޮތުން ރާއްޖޭގައި ފުރަތަމަ ފަހަރަށް ދަނޑުވެރިންނަށް ލޯނު ލިބޭނެ އިންތިޒާމް ހަމަޖައްސައިދީފައި ވެއެވެ. ފަސް އަހަރުގެ ދައުރު ނިމިގެންދާ އިރު، ރާއްޖޭގެ ދަނޑުވެރިކަމަށް ހެޔޮ ބަދަލެއް އައިސް ދަނޑުވެރިކަމުގެ ނަފާ އިތުރުކުރެވޭނެ ކަމަށް ސަރުކާރުން ވައުދުވެފައި ވެއެވެ.